Má-thài 第 25 章 - 巴克禮全羅

1

Hit sî thian-kok beh pí-phēng cha̍p ê chāi-sek-lú, kia̍h in ê teng, chhut-khì ngiâ-chih sin-kiáⁿ-sài.

2

Kî-tiong gō͘-ê gōng ê, gō͘ -ê tì-sek ê.

3

Gōng ê kia̍h in ê teng, bô lēng-gōa tòa iû.

4

To̍k-to̍k tì-sek ê kia̍h in ê teng lēng-gōa tòa iû tī in ê khì-kū lāi.

5

Sin-kiáⁿ-sài iân-chhiân, chiū lóng tuh-ka-chē teh khùn.

6

Pòaⁿ mî, ū tōa siaⁿ kiò kóng, Sin-kiáⁿ-sài lâi lah; lín chhut-lâi chih i.

7

Hit sî chiah ê chāi-sek-lú lóng khí-lâi, siu-chéng in ê teng.

8

Gōng ê kā tì-sek ê kóng, chhiáⁿ chiong lín ê iû pun góan, in-ūi góan ê teng beh hoa lah.

9

Tì-sek ê ìn kóng, Kiaⁿ-liáu lín góan lóng bô kàu; khah hó khì tùi bōe ê lâng ka-kī bóe.

10

Khì bóe ê sî, sin-kiáⁿ-sài kàu, hiah ê piān-ê kap i jı̍p hun-in ê iân-toh; mn̂g chiū koaiⁿ.

11

Jiân-āu kî-û ê chāi-sek-lú ia̍h lâi, kóng, Chú ah, Chú ah, kā góan khui.

12

Nā-sī i ìn kóng, Góa sı̍t-chāi kā lín kóng, Góa m̄ bat lín.

13

Só͘-í tio̍h tiuⁿ-tî, in-ūi lín m̄ chai hit ê jı̍t, hit ê sî.

14

In-ūi chhin-chhiūⁿ chı̍t lâng beh khì gōa-kok; chiū tiàu i ka-kī ê lô͘-po̍k chiong só͘ ū ê kau-tāi in.

15

Chı̍t-ê hō͘ i gûn gō͘ chheng, chı̍t-ê hō͘ i nn̄g chheng, chı̍t-ê hō͘ i chı̍t chheng; kok chiàu in ê châi-tiāu; chiū khì gōa-kok.

16

Niá gō͘ chheng ê, sûi-sî khì chòe seng-lí, koh thàn gō͘ chheng.

17

Niá nn̄g chheng ê ia̍h sī án-ni, koh thàn nn̄g chheng.

18

To̍k-to̍k hit-ê niá chı̍t chheng ê khì, chiū ku̍t tōe, lâi khǹg-ba̍t i ê chú-lâng ê gûn.

19

Kè kú-kú chiah ê lô͘-po̍k ê chú-lâng kàu, kap in sǹg-siàu.

20

Niá gō͘ chheng ê lâi, koh tòa gō͘ chheng, kóng, Chú ah, lí kau-tāi góa gō͘ chheng; lí khòaⁿ, góa ū koh thàn gō͘ chheng.

21

I ê chú-lâng kā i kóng, Hó ah, hó koh chīn-tiong ê lô͘-po̍k, lí tī chió-ê í-keng chīn-tiong, góa beh siat-lı̍p lí lâi kóan chōe-ê; thang jı̍p lí ê chú-lâng ê khòai-lo̍k.

22

Niá nn̄g chheng ê ia̍h lâi, kóng, Chú ah, lí kau-tāi góa nn̄g chheng; lí khòaⁿ, góa ū koh thàn nn̄g chheng.

23

I ê chú-lâng kā i kóng, Hó ah, hó koh chīn-tiong ê lô͘-po̍k, lí tī chió-ê í-keng chīn-tiong, góa beh siat-lı̍p lí lâi kóan chōe-ê; thang jı̍p lí ê chú-lâng ê khòai-lo̍k.

24

Niá chı̍t chheng ê ia̍h lâi, kóng, Chú ah, góa chai lí sī giâm-ha̍t ê lâng; bē iā ê só͘-chāi, chiū beh siu-koah; bē hun-sòaⁿ ê só͘-chāi, chiū beh khioh chòe tui.

25

Só͘-í góa kiaⁿ, chiū chiong lí chı̍t chheng gûn khì tâi tī tōe-nı̍h; taⁿ lí ê gôan-mı̍h hêng lí.

26

I ê chú-lâng chiū ìn i kóng, Pháiⁿ koh pîn-tōaⁿ ê lô͘-po̍k ah, lí kì-jiân chai góa bē iā ê só͘-chāi, chiū beh siu-koah, bē hun-sòaⁿ ê só͘-chāi, chiū beh khioh chòe tui.

27

Chiū tio̍h chiong góa ê gûn hē tī chîⁿ-tiàm; góa lâi ê sî thang tit-tio̍h góa ê pún-gûn kap lī-sek.

28

Só͘-í tio̍h tùi i the̍h hit chı̍t chheng, lâi hō͘ hit ê ū cha̍p chheng ê.

29

In-ūi kìⁿ-nā ū ê, beh hō͘ i, hō͘ i ū chhun; bô ê, liân i só͘ ū ê, ia̍h beh the̍h i.

30

Ia̍h hit ê bô lī-ek ê lô͘-po̍k, kóaⁿ i tī gōa-bīn o͘-àm ê só͘-chāi; tī hia beh ū thî-khàu, kā-gê chhiat-chhí.

31

Tng Jîn-chú tī I ê êng-kng, kap lóng-chóng ê thiⁿ-sài lâi ê sî, I beh chē I êng-kng ê chō-ūi,

32

chū-chı̍p bān pang tī I ê bīn-chêng; I chiū beh hun-piat in, chhin-chhiūⁿ bo̍k-chiá hun-piat mî-iûⁿ lī-khui soaⁿ-iûⁿ.

33

Chiong mî-iûⁿ hē tī I ê chiàⁿ-pêng, soaⁿ-iûⁿ hē tī I ê tò-pêng.

34

Hit sî Ông beh kā chiàⁿ-pêng ê kóng, Lín tùi góa ê Pē tit-tio̍h un-tián ê, chìn-chêng lâi sêng-chiap kok, chiū-sī tùi chhòng-chō sè-kan í-lâi kā lín pī-pān ê.

35

In-ūi góa iau, lín bat hō͘ góa chia̍h; góa chhùi-ta, lín hō͘ góa lim; góa chhut-gōa, lín hō͘ góa tòa; góa thǹg-pak-theh, lín hō͘ góa chhēng;

36

góa phòa-pīⁿ, lín khòaⁿ-kò͘ góa; góa tī kaⁿ-nı̍h, lín lâi chhē góa.

37

Hit sî gī lâng beh ìn I kóng, Chú ah, góan sím-mı̍h sî khòaⁿ-kìⁿ lí iau, lâi hō͘ lí chia̍h? chhùi-ta, lâi hō͘ lí lim?

38

Sím-mı̍h sî khòaⁿ-kìⁿ lí chhut-gōa, lâi hō͘ lí tòa? thǹg-pak-theh, lâi hō͘ lí chhēng?

39

Sím-mı̍h sî khòaⁿ-kìⁿ lí phòa-pīⁿ, á-sī tī kaⁿ-nı̍h, lâi chhē lí?

40

Ông beh ìn i kóng, Góa sı̍t-chāi kā lín kóng, Lín kì-jiân kiâⁿ i tī góa ê hiaⁿ-tī chì-bî-sòe ê ê chı̍t-ê, chiū-sī kiâⁿ i tī góa.

41

Koh beh kā tò-pêng ê kóng, Lín siū chiù-chó͘ ê, tio̍h lī-khui góa, jı̍p éng-óan ê hé, chiū-sī ūi-tio̍h Mô͘-kúi kap i chiah ê sù-chiá só͘ pī-pān ê.

42

In-ūi góa iau, lín m̄ bat hō͘ góa chia̍h; góa chhùi-ta, lín m̄ bat hō͘ góa lim; góa chhut-gōa, lín m̄ bat hō͘ góa tòa;

43

góa thǹg-pak-theh, lín m̄ bat hō͘ góa chhēng; góa phòa-pīⁿ kap tī kaⁿ-nı̍h, lín m̄ bat khòaⁿ-kò͘ góa.

44

In ia̍h beh ìn kóng, Chú ah, góan sím-mı̍h sî khòaⁿ-kìⁿ lí iau, á-sī chhùi-ta, á-sī chhut-gōa, á-sī thǹg-pak-theh, á-sī phòa-pīⁿ, á-sī tī kaⁿ-nı̍h, lâi bô ho̍k-sāi lí ah?

45

I chiū beh ìn i kóng, Góa sı̍t-chāi kā lín kóng, Lín kì-jiân bô kiâⁿ i tī chiah ê chì-bî-sòe ê ê chı̍t ê, chiū-sī bô kiâⁿ i tī góa.

46

Chiah ê lâng beh khì jı̍p éng-óan ê hêng-ho̍at; nā-sī gī ê lâng jı̍p éng-óan o̍ah.