Má-thài 第 24 章 - 巴克禮全羅

1

Iâ-so͘ chhut tiān, tú teh kiâⁿ, I ê ha̍k-seng chiū-kūn I, ēng tiān-tn̂g hiah ê chhù pò I khòaⁿ.

2

Nā-sī I ìn kóng, Lín bô khòaⁿ-kìⁿ chiah ê mah? góa sı̍t-chāi kā lín kóng, Tī chia beh bô chı̍t tè chio̍h lâu tī chio̍h téng, iā bô chhia-lo̍h-khì.

3

Iâ-so͘ chē tī Kaⁿ-ná soaⁿ ê sî, ha̍k-seng su-khia chiū-kūn I kóng, Chhiáⁿ kā góan kóng, tī-sî ū chiah ê tāi-chì? iā lí koh lâi, kap sè-kài ê kiat-kio̍k ū sím-mı̍h tiāu-thâu?

4

Iâ-so͘ ìn kóng, Tio̍h kín-sīn, bo̍h-tit hō͘ lâng bê-he̍k.

5

In-ūi beh ū chōe-chōe lâng tī góa ê miâ lâi, kóng, Góa sī Ki-tok, lâi bê-he̍k chōe-chōe lâng.

6

Lín beh thiaⁿ-kìⁿ kau-chiàn kap kau-chiàn ê hong-siaⁿ, kín-sīn bo̍h-tit kiaⁿ; in-ūi chiah-ê tek-khak ū, chóng-sī bo̍at-kî iáu-bē kàu.

7

In-ūi peh-sìⁿ beh khí-lâi kong-kek peh-sìⁿ, kok beh khí-lâi kong-kek kok; chōe-chōe só͘-chāi beh ū ki-hng, tōe-tāng.

8

Chiah-ê lóng sī khó͘-thàng ê khí-thâu.

9

Hit sî lâng beh kau-hù lín tī hōan-lān, thâi-sí lín. Lín in-ūi góa ê miâ beh hō͘ bān pang òan-hūn.

10

Iā hit sî chōe-chōe lâng beh siū that-gāi, saⁿ ké-sàng, saⁿ òan-hūn.

11

Koh ū chōe-chōe ké sian-ti beh khí-lâi bê-he̍k chōe-chōe lâng.

12

In-ūi put-hoat tōa-tōa ke-thiⁿ, chōe-chōe lâng ê thiàⁿ chiām-chiām léng-tām.

13

To̍k-to̍k thun-lún kàu lō͘-bé ê, i ōe tit-tio̍h kiù.

14

Chit ê thian-kok ê hok-im beh thôan kàu thong thiⁿ-ē, chòe kan-chèng tī bān pang; hit sî bo̍at-kî chiū kàu.

15

Só͘-í lín khòaⁿ-kìⁿ chá thok sian-ti Tàn-í-lí só͘ kóng, hit ê chân-hāi khó-ò͘ⁿ ê khiā tī sèng ê só͘-chāi, (tha̍k ê lâng tio̍h hiáu-ngō͘),

16

hit sî tī Iû-thài ê tio̍h cháu-khì soaⁿ-nı̍h;

17

tī chhù-téng ê bo̍h-tit lo̍h-lâi the̍h i ke-lāi ê mı̍h;

18

tī hn̂g-nı̍h ê bo̍h-tit tò-khì hiaⁿh i ê saⁿ.

19

Tng hiah ê jı̍t, ū sin-īn kap hō͘ eⁿ-á chia̍h lin ê hū-jîn-lâng ū chai-ē ah!

20

Lín tio̍h kî-tó, bián-tit lín ê tô-cháu tī tang-thiⁿ sî, á-sī an-hioh-jı̍t.

21

In-ūi hit sî beh ū tōa hōan-lān, tùi sè-kan ê khí-thâu kàu taⁿ bē bat ū án-ni; āu-lâi iā koat-tòan bô.

22

Nā bô kiám-chió hiah ê jı̍t, chiū hōan ū jio̍k-thé ê bô chı̍t-ê tit kiù, to̍k-to̍k ūi-tio̍h kéng ê peh-sìⁿ, hiah ê jı̍t beh kiám-chió.

23

Hit sî nā ū lâng kā lín kóng, Lí khòaⁿ, Ki-tok tī chia, á-sī kóng, Tī hia, lín bo̍h-tit sìn.

24

In-ūi beh ū ké Ki-tok, ké sian-ti khí-lâi kiâⁿ tōa ê sîn-jiah kap tiāu-thâu; beh sī ōe, liân kéng ê peh-sìⁿ iā bê-he̍k i.

25

Góa í-keng tāi-seng kā lín kóng.

26

Só͘-í lâng nā kā lín kóng, Lí khòaⁿ, I sī tī khòng-iá, lín bo̍h-tit chhut-khì; á-sī kóng, Lí khòaⁿ, I sī tī ba̍t chhù, lín bo̍h-tit sìn.

27

In-ūi chhin-chhiūⁿ sih-nà tùi tang-sì teh sih, nā kàu sai-sì, Jîn-chú ê koh lâi iā beh án-ni.

28

Sin-si nā tī hia, eng-chiáu iā beh chū-chı̍p tī hia.

29

Tú-tú chiah ê jı̍t ê hōan-lān liáu-āu, jı̍t beh o͘-àm, ge̍h bô chhut kng, chhiⁿ tùi thiⁿ ka-la̍uh, thiⁿ-siōng tín-tāng.

30

Hit sî Jîn-chú ê tiāu-thâu beh chhut-hiān tī thiⁿ-nı̍h; tī tōe-nı̍h chiah ê cho̍k-lūi lóng beh thî-khàu, iā beh khòaⁿ-kìⁿ Jîn-chú ēng kôan-lêng kap tōa êng-kng chē thiⁿ ê hûn lîm-kàu.

31

I beh chhe I ê thiⁿ-sài, ēng hō-thâu hiáng-liāng ê siaⁿ, in beh tùi sì-hng chit pêng ê thiⁿ-piⁿ kàu hit pêng ê thiⁿ-piⁿ, chū-chı̍p I só͘ kéng ê peh-sìⁿ.

32

Lín tio̍h tùi bû-hoa-kó chhiū chhú phì-jū; tng i ki nńg hio̍h hoat ê sî, chiū chai hē-thiⁿ kūn lah.

33

Án-ni, lín khòaⁿ lóng-chóng chiah ê sū, chiū chai í-keng kūn, kàu mn̂g-kháu lah.

34

Góa sı̍t-chāi kā lín kóng, Chit sè-tāi koat-tòan bē kè-khì, kàu chiah ê tāi-chì lóng chiâⁿ.

35

Thiⁿ kap tōe beh hòe-bô, góa ê ōe bōe hòe-bô.

36

Nā-sī lūn hit jı̍t, hit sî, lâng m̄ chai, thiⁿ-sài iā m̄ chai, Kiáⁿ iā m̄ chai, to̍k-to̍k Pē chai nā-tiāⁿ.

37

Koh chhin-chhiūⁿ Ná-a ê jı̍t, Jîn-chú ê koh lâi iā beh án-ni.

38

In-ūi tōa chúi ê tāi-seng hiah ê jı̍t, lâng teh lim-chia̍h, kè-chhōa, kàu Ná-a jı̍p tōa chûn ê jı̍t,

39

in kèng-jiân m̄ chai, kàu tōa chúi kàu, it-chīn bia̍t in, Jîn-chú ê koh lâi iā beh án-ni.

40

Hit sî beh ū nn̄g lâng tī hn̂g-nı̍h, chı̍t-ê chhú-khì, chı̍t-ê pàng-teh.

41

Nn̄g ê hū-jîn-lâng oe bō, chı̍t-ê chhú-khì, chı̍t-ê pàng-teh.

42

Só͘-í tio̍h tiuⁿ-tî, in-ūi lín m̄ chai lín ê Chú sím-mı̍h jı̍t beh lâi.

43

Ke-chú nā chai chha̍t sím-mı̍h kiⁿ beh kàu, i chiū tiuⁿ-tî, bô iông-ún lâng iah khang i ê chhù, che sī lín só͘ chai.

44

Só͘-í lín ia̍h tio̍h pī-pān piān; in-ūi lín bô phah-sǹg ê sî, Jîn-chú lâi lah.

45

Chī-chūi sī chīn-tiong tì-hūi ê lô͘-po̍k, chú-lâng só͘ siat-lı̍p lâi kóan i ke-lāi ê lâng, thang chiàu sî pun bí-niû hō͘ in.

46

Chú-lâng lâi, tú-tio̍h i án-ni kiâⁿ, hit ê lô͘-po̍k ū hok-khì.

47

Góa sı̍t-chāi kā lín kóng, chú-lâng beh siat-lı̍p i lâi kóan i it-chhè só͘ ū ê.

48

To̍k-to̍k hit ê pháiⁿ ê lô͘-po̍k, nā sim-lāi kóng, Góa ê chú-lâng teh iân-chhiân;

49

chiū phah hiah-ê kap i tâng chòe lô͘-po̍k ê, koh kap chùi-hàn saⁿ-kap lim-chia̍h,

50

chiū tī bô phài-phe ê jı̍t, m̄ chai ê sî, hit ê lô͘-po̍k ê chú-lâng beh kàu.

51

tāng-tāng hêng-ho̍at i, chhú-tī i kap ké-hó ê lâng pîⁿ-téng, tī hia beh ū thî-khàu kā-gê chhiat-chhí.