Má-thài 第 17 章 - 巴克禮全羅

1

Kè la̍k jı̍t, Iâ-so͘ lēng-gōa tòa Pí-tek, Ngá-kok, kap Ngá-kok ê hiaⁿ-tī Iok-hān, chhōa in peh-chiūⁿ kôaiⁿ soaⁿ;

2

tng in ê bīn-chêng hêng-chōng piàn-ōaⁿ, I ê bīn kng iàⁿ-iàⁿ, chhin-chhiūⁿ jı̍t, I ê saⁿ pe̍h, chhin-chhiūⁿ kng.

3

Hut-jiân ū Mô͘-se, Í-lī-a tùi in hián-hiān, kap I kóng ōe.

4

Pí-tek ìn Iâ-so͘ kóng, Chú ah, lán tī chia chin hó; lí nā ài, góa beh tī chia tah saⁿ keng liâu-á; chı̍t keng hō͘ lí, chı̍t keng hō͘ Mô͘-se, chı̍t keng hō͘ Í-lī-a.

5

I iáu teh kóng ōe ê sî, hut-jiân ū kng-kng ê hûn tà in, koh ū siaⁿ tùi hûn-nı̍h chhut, kóng, Chit-ê sī góa thiàⁿ ê Kiáⁿ, góa só͘ hoaⁿ-hí ê; lín tio̍h thiaⁿ I.

6

Ha̍k-seng thiaⁿ-kìⁿ, chiū phak-lo̍h-khì, chīn-chāi kiaⁿ.

7

Iâ-so͘ chìn-chêng bong in, kóng, Khí-lâi, bo̍h-tit kiaⁿ.

8

In kia̍h ba̍k, bô khòaⁿ-kìⁿ chı̍t lâng, chí-ū Iâ-so͘ nā-tiāⁿ.

9

Lo̍h soaⁿ ê sî Iâ-so͘ bēng-lēng in, kóng, Jîn-chú iáu-bē tùi sí-lâng tiong koh-o̍ah, bo̍h-tit ēng só͘ khòaⁿ-kìⁿ ê kā lâng kóng.

10

I ê ha̍k-seng mn̄g I kóng, Án-ni chiū keng-ha̍k-sū kóng Í-lī-a tio̍h seng lâi, sī cháiⁿ-iūⁿ?

11

I ìn kóng, Í-lī-a kó-jiân lâi, beh heng-khí bān-hāng sū;

12

nā-sī góa kā lín kóng, Í-lī-a í-keng lâi, iā in m̄ bat i; chiàu in só͘ ài lâi khóan-thāi i; chhin-chhiūⁿ án-ni Jîn-chú ia̍h beh siū in ê hām-hāi.

13

Ha̍k-seng chiah ōe hiáu-tit I só͘ kā in kóng ê, sī chí kiâⁿ sóe-lé Iok-hān.

14

Í-keng kàu chèng lâng hia, ū chı̍t lâng chiū-kūn I, kūi I kóng,

15

Chú ah, lîn-bín góa ê kiáⁿ, in-ūi i iûⁿ-hîn chin kan-khó͘; ta̍uh-ta̍uh po̍ah-lo̍h hé, ta̍uh-ta̍uh po̍ah-lo̍h chúi.

16

Góa chhōa i chiū-kūn lí ê ha̍k-seng, in bōe-ōe i-hó i.

17

Iâ-so͘ ìn kóng, Hàiⁿ ah! m̄ sìn koh pōe-ge̍k ê sè-tāi ah, góa beh kap lín tòa jōa kú? góa beh thun-lún lín jōa kú? tòa i lâi chia chiū-kūn góa.

18

Iâ-so͘ chek-pī kúi; kúi chiū tùi i chhut; tùi hit chı̍t sî gín-ná chiū hó.

19

Hit sî ha̍k-seng àm-chīⁿ chiū-kūn Iâ-so͘ kóng, Góan cháiⁿ-iūⁿ bōe kóaⁿ i?

20

I kā in kóng, Sī ūi-tio̍h lín ê sió sìn; góa sı̍t-chāi kā lín kóng, Lín nā ū sìn chhin-chhiūⁿ chı̍t lia̍p kòa-chhài chí, lín chiū beh kā chit ê soaⁿ kóng, Tùi chia sóa khì hia, ia̍h beh sóa khì; koh lín teh-beh bô chı̍t hāng bōe.

21

22

In iáu tòa Ka-lī-lī ê sî, Iâ-so͘ kā ha̍k-seng kóng, Jîn-chú beh siū sàng-kau tī lâng ê chhiú.

23

In beh thâi I, tē saⁿ jı̍t koh-o̍ah. Ha̍k-seng chin iu-būn.

24

In kàu Ka-pek-lông, ū siu teng-sè ê chiū-kūn Pí-tek, kóng, Lín sian-siⁿ kiám bô la̍p teng-sè mah? i kóng, Ū.

25

Í-keng jı̍p chhù, Iâ-so͘ tāi-seng kā i kóng, Se-bûn ah, lí phah-sǹg cháiⁿ-iūⁿ? Sè-chiūⁿ chiah ê ông, tùi chī-chūi siu hiòng kap thiu teng-sè? sī tùi ka-kī ê kiáⁿ-jî, á-sī tùi gōa-bīn lâng ah?

26

I chı̍t-ē kóng, Tùi gōa-bīn lâng. Iâ-so͘ chiū kā i kóng, Nā-sī án-ni, chiū kiáⁿ-jî thang m̄ bián.

27

Chóng-sī bián-tì that-gāi in, lí khì hái-nı̍h pàng tiò, lia̍h tāi-seng chiūⁿ-tiò ê hî, khui i ê chhùi, beh tit-tio̍h gûn chı̍t ê; the̍h-lâi, ūi-tio̍h góa kap lí la̍p hō͘ in.