Má-thài 第 18 章 - 巴克禮全羅

1

Tng hit sî, ha̍k-seng chiū-kūn Iâ-so͘ kóng, Tī thian-kok sím-mı̍h lâng chòe tōa?

2

Iâ-so͘ chiū kiò chı̍t ê sòe-hàn gín-ná, hō͘ i khiā tī in tiong-kan;

3

kóng, Góa sı̍t-chāi kā lín kóng, Lín nā bô o̍at-tńg lâi chiâⁿ-chòe chhin-chhiūⁿ sòe-hàn gín-ná ê, koat-tòan bōe jı̍p thian-kok.

4

Só͘-í kìⁿ-nā ka-kī khiam-pi chhin-chhiūⁿ chit ê sòe-hàn gín-ná ê, i tī thian-kok chiū-sī chòe tōa.

5

Kìⁿ-nā tī góa ê miâ chiap-la̍p chit hō sòe-hàn gín-ná ê chı̍t ê, chiū-sī chiap-la̍p góa.

6

Kìⁿ-nā hō͘ chiah ê sìn góa ê bî-sòe ê chı̍t ê siū that-gāi, hit lâng lêng-khó͘ ū tōa chio̍h-bō tiàu i ê ām-kún, thiām tī chhim hái.

7

Chit sè-kan ū chai-ē ah, tùi ū that-gāi lâng ê sū; in-ūi that-gāi ê sū, bōe bián-tit ū; chóng-sī that-gāi ê sū tùi chī-chūi lâi, hit lâng ū chai-ē.

8

Siat-sú lí chı̍t chhiú chı̍t kha that-gāi lí, chiū tio̍h chām hiat-ka̍k; lí phòa-siùⁿ á-sī pái-kha jı̍p tī o̍ah sī hó, khah-tit nn̄g chhiú nn̄g kha hiat-lo̍h éng-óan ê hé.

9

Siat-sú lí chı̍t ba̍k that-gāi lí, chiū tio̍h iah hiat-ka̍k; lí chı̍t ba̍k jı̍p tī o̍ah sī hó, khah-tit nn̄g ba̍k hiat-lo̍h tē-ge̍k ê hé.

10

Lín tio̍h kín-sīn, bo̍h-tit khòaⁿ-khin chiah ê bî-sòe tiong ê chı̍t-ê; in-ūi góa kā lín kóng, In ê thiⁿ-sài tī thiⁿ-nı̍h, siông-siông kìⁿ góa tī thiⁿ-nı̍h ê Pē ê bīn.

11

12

Lín phah-sǹg cháiⁿ-iūⁿ? Lâng nā ū chı̍t pah chiah iûⁿ, lâi phah-m̄-kìⁿ chı̍t chiah, kiám bô chhiáⁿ pàng-hē hit káu-cha̍p-káu chiah, khì soaⁿ-nı̍h chhē hit chiah phah-m̄-kìⁿ ê mah?

13

Nā kó-jiân chhē-tio̍h, góa sı̍t-chāi kā lín kóng, i ūi-tio̍h hit chiah hoaⁿ-hí, iâⁿ-kè káu-cha̍p-káu chiah bô phah-m̄-kìⁿ ê.

14

Án-ni chiah ê bî-sòe tiong ê chı̍t-ê tîm-lûn, iā m̄ sī lín tī thiⁿ-nı̍h ê Pē ê chí-ì.

15

Siat-sú lí ê hiaⁿ-tī tek-chōe lí , chiū tio̍h khì, kan-ta lí kap i tī-teh ê sî, chí-bêng i ê m̄-tio̍h; i nā thiaⁿ lí, chiū tit-tio̍h lí ê hiaⁿ-tī.

16

I nā m̄ thiaⁿ, chiū tio̍h chhōa chı̍t nn̄g lâng saⁿ-kap khì, ēng nn̄g saⁿ lâng ê chhùi chòe kan-chèng, ta̍k kù ōe thang chòe pîn-chún.

17

Nā m̄ khéng thiaⁿ in, chiū kā kàu-hōe kóng; nā koh m̄ khéng thiaⁿ kàu-hōe, chiū tio̍h khòaⁿ i chhin-chhiūⁿ gōa-pang lâng, kap thiu-hiòng ê chı̍t iūⁿ.

18

Góa sı̍t-chāi kā lín kóng, Hōan-nā lín tī tōe-nı̍h pa̍k ê, tī thiⁿ-nı̍h iā beh pa̍k in; hōan-nā lín tī tōe-nı̍h tháu ê, tī thiⁿ-nı̍h iā beh tháu in.

19

Góa koh kā lín kóng, siat-sú lín tiong-kan nn̄g lâng tī tōe-nı̍h bô lūn kiû sím-mı̍h, nā sī tâng-sim, chiū góa tī thiⁿ-nı̍h ê Pē beh kā in chòe chiâⁿ.

20

In-ūi put-lūn sím-mı̍h só͘-chāi ū nn̄g saⁿ lâng tī góa ê miâ chū-chı̍p, góa iā tī in tiong-kan.

21

Hit sî Pí-tek óa-lâi kā I kóng, Chú ah, góa ê hiaⁿ-tī tek-chōe góa, góa sià-bián i tio̍h kúi pái? Tio̍h chhit pái mah?

22

Iâ-so͘ kā i kóng, Góa bô kā lí kóng tio̍h kàu chhit pái, chiū-sī kàu chhit-cha̍p ê chhit pái.

23

Só͘-í thian-kok pí-phēng jîn-kun ài beh kap i ê lô͘-po̍k sǹg-siàu.

24

Khí-thâu sǹg ê sî, ū chhōa chı̍t-ê khiàm i chheng-bān gûn ê lâi.

25

Kì-jiân bô thang hêng, i ê chú-lâng bēng-lēng tio̍h bōe i pún-sin, kap i ê bó͘-kiáⁿ, liân i it-chhè só͘ ū ê, lâi hêng.

26

Hit ê lô͘-po̍k chiū phak-teh, pài i, kóng, Chú ah, tio̍h khoan-iông góa, góa beh lóng-chóng hêng.

27

Lô͘-po̍k ê chú-lâng chiū lîn-bín lâi pàng i, koh sià-bián i ê chè.

28

Hit ê lô͘-po̍k chhut-khì, tú-tio̍h i chı̍t-ê tâng chòe lô͘-po̍k ê, khiàm i chı̍t pah ê gûn-á, chiū lia̍h i, chhe i ê ām-kún, kóng, Lí só͘ khiàm ê tio̍h hêng.

29

Tâng chòe lô͘-po̍k ê phak-teh, kiû i kóng, Tio̍h khoan-iông góa, góa beh hêng lí.

30

Nā-sī i m̄ khéng, chiū khì kā i koaiⁿ-lo̍h kaⁿ, lâi thèng-hāu i hêng só͘ khiàm ê.

31

Chiah-ê tâng chòe lô͘-po̍k ê khòaⁿ-kìⁿ chit ê tāi-chì, chin iu-būn, chiong lóng-chóng ê sū tùi chú-lâng kóng bêng.

32

Tùi án-ni i ê chú-lâng tiàu i lâi, kā i kóng, Pháiⁿ ê lô͘-po̍k ah, in-ūi lí tùi góa kiû, góa chiū chiong lí só͘ khiàm ê lóng sià-bián.

33

Lí kiám m̄ tio̍h lîn-bín lí tâng chòe lô͘-po̍k ê, chhin-chhiūⁿ góa lîn-bín lí?

34

I ê chú-lâng siū-khì, chiong i kau-tāi hêng-tiōng, thèng-hāu i it-chīn hêng só͘ khiàm ê.

35

Án-ni lín ta̍k lâng bô ēng sim sià-bián lín ê hiaⁿ-tī, chiū góa ê Thiⁿ Pē iā beh án-ni khóan-thāi lín.