Má-thài 第 8 章 - 巴克禮全羅

1

Iâ-so͘ í-keng lo̍h soaⁿ, kui tōa tīn ê lâng tè I.

2

Tú-tn̄g ū chı̍t ê thái-ko ê chiū-kūn lâi pài I kóng, Chú ah, lí nā khéng, chiū ōe hō͘ góa chheng-khì.

3

I chiū chhun chhiú bong i kóng, Góa khéng, lí thang chheng-khì; i ê thái-ko liâm-piⁿ chheng-khì.

4

Iâ-so͘ koh kā i kóng, Kín-sīn bo̍h-tit kā lâng kóng; to̍k-to̍k khì, chiong pún-sin hō͘ chè-si giām, ia̍h tio̍h hiàn Mô͘-se só͘ hoan-hù ê lé-mı̍h, lâi chòe chèng-kù tī lâng.

5

Í-keng jı̍p Ka-pek-lông, ū pé-chóng chiū-kūn I, lâi kiû I kóng,

6

Chú ah, góa ê lô͘-po̍k piàn-sūi, tó tī chhù-lāi, kan-khó͘ kàu ke̍k.

7

I chiū kā i kóng, Góa lâi khì i i.

8

Pé-chóng ìn kóng, Chú ah, lí kàu góa tau, góa tng bōe khí; lí kan-ta kóng chı̍t kù ōe, góa ê lô͘-po̍k chiū ōe hó.

9

In-ūi góa ia̍h sī hō͘ lâng kóan ê lâng, iā ū peng hō͘ góa kóan; kā chit-ê kóng, Khì, i chiū khì; kā hit-ê kóng, Lâi, i chiū lâi; kā góa ê lô͘-po̍k kóng, Kiâⁿ án-ni, i chiū kiâⁿ án-ni.

10

Iâ-so͘ thiaⁿ-kìⁿ chiū kî-kòai, kā tè I ê lâng kóng, Góa sı̍t-chāi kā lín kóng, chhin-chhiūⁿ chit hō ê chhim sìn, liân Í-sek-lia̍t tiong, góa bē bat tú-tio̍h.

11

Góa koh kā lín kóng, tùi tang tùi sai, ū chōe-chōe lâng beh kàu, kap A-pek-la̍h-hán, Í-sat, Ngá-kok, chē toh tī thian-kok;

12

nā-sī kok ê chú-bîn beh tú-tio̍h kóaⁿ-chhut tī gōa-bīn ê o͘-àm; tī hia beh ū thî-khàu kā-gê chhiat-chhí.

13

Iâ-so͘ chiū kā pé-chóng kóng, Khì ah, chiàu lí ê sìn kā lí chiâⁿ; tú-tú hit sî, i ê lô͘-po̍k chiū hó.

14

Iâ-so͘ jı̍p Pí-tek ê ke, khòaⁿ-kìⁿ i ê tiūⁿ-ḿ, hōan-tio̍h jia̍t-pīⁿ tó-teh.

15

Chiū bong i ê chhiú, jia̍t chiū thè; hū-jîn-lâng chiū khí-lâi su-hāu I.

16

Kàu hông-hun-àm, ū lâng chhōa chōe-chōe hōan-tio̍h kúi ê chiū-kūn I; I ēng chı̍t kù ōe kóaⁿ-chhut hiah ê sîn; koh i-hó it-chhè ū pīⁿ ê lâng;

17

chiū-sī beh èng-giām sian-ti Í-sài-a só͘ kóng ê, kóng, I pún-sin thòe-siū lán ê lóan-jio̍k, tam-tng lán ê pīⁿ-chèng.

18

Iâ-so͘ khòaⁿ-kìⁿ kui tōa tīn ê lâng ûi I, chiū hoan-hù kè-khì hit pêng hōaⁿ.

19

Ū chı̍t ê keng-ha̍k-sū lâi, kā I kóng, Sian-siⁿ ah, lí bô lūn tá-lo̍h khì, góa beh tè lí.

20

Iâ-so͘ chiū kā i kóng, Hô͘-lî ū khang, thiⁿ-tiong ê pe-chiáu ū siū; to̍k-to̍k Jîn-chú bô khòa thâu-khak ê só͘-chāi.

21

Koh chı̍t ê ha̍k-seng kā I kóng, Chú ah, hō͘ góa seng tò-khì bâi-chòng góa ê lāu-pē.

22

To̍k-to̍k Iâ-so͘ kā i kóng,, Lí tè góa, chhut-chāi sí lâng khì bâi-chòng in ê sí lâng.

23

Í-keng lo̍h chûn, I ê ha̍k-seng tè I.

24

Hut-jiân hái-nı̍h khí tōa hong-éng, tì-kàu chûn hō͘ éng khàm; nā-sī Iâ-so͘ teh khùn.

25

Ha̍k-seng chiū-kūn lâi kiò I khí-lâi, kóng, Chú ah, kiù o͘h, beh bô miā lah!

26

I chiū kā in kóng, Sió-sìn ê lâng ah, cháiⁿ-iūⁿ hiah bô táⁿ? Chiū khí-lâi, chek-pī hong kap hái, chiū tōa pîⁿ-tiāⁿ.

27

Hiah ê lâng kî-kòai kóng, chit-ê sī sím-mı̍h hō lâng, hong kap hái ia̍h sūn I?

28

Í-keng kè-khì hit pêng hōaⁿ, kàu Ka-tāi-lia̍p lâng ê tōe; ū hōan-tio̍h kúi ê, nn̄g lâng, tùi thióng-bōng chhut-lâi, tú-tio̍h I, sè-bīn hiông kài-kài; tì-kàu bô lâng káⁿ tùi hit tiâu lō͘ kè.

29

In hut-jiân âu-kiò kóng, Siōng-tè ê Kiáⁿ ah, góan kap lí ū sím-mı̍h kan-sia̍p? sî bē kàu, lí lâi chia sī beh khó͘-chhó͘ góan mah?

30

Lī in hn̄g-hn̄g ū tōa kûn ê ti teh thó-chia̍h;

31

hiah ê kúi kiû I kóng, Lí nā kóaⁿ góan, chiū chhe góan jı̍p ti kûn.

32

I chiū kā in kóng, Khì ah. Kúi chiū chhut-lâi, khì jı̍p ti; hut-jiân chôan-kûn chông lo̍h soaⁿ-khàm, jı̍p hái, sí tī chúi-nı̍h.

33

Kò͘ ti ê cháu khì jı̍p siâⁿ; chiong chiah ê sū, í-kı̍p hōan-tio̍h kúi ê lâng só͘ tú-tio̍h ê, lóng kā lâng kóng.

34

Thong siâⁿ ê lâng chhut-khì, chhē-tio̍h Iâ-so͘; í-keng kìⁿ-tio̍h, chiū kiû I lī-khui in ê tōe-kài.