Má-thài 第 9 章 - 巴克禮全羅

1

Iâ-so͘ lo̍h chûn kè hái, khì kàu I ê pún siâⁿ.

2

Tú-tn̄g ū lâng kng chı̍t ê piàn-sūi ê tó tī pho͘-á-nı̍h lâi chiū-kūn I; Iâ-so͘ khòaⁿ-kìⁿ in ê sìn, chiū kā piàn-sūi ê kóng, Kiáⁿ ah, chòe lí an-sim, lí ê chōe sià lah.

3

Ū keng-ha̍k-sū kúi-nā lâng sim-lāi kóng, Chit lâng chhiàm-kôan lām-sám kóng.

4

Iâ-so͘ chai in ê sim-ì, chiū kóng, Lín siáⁿ-sū sim-lāi khǹg pháiⁿ ì-sù ah?

5

Kóng, Lí ê chōe sià, á-sī kóng, Khí-lâi kiâⁿ, tá-lo̍h chı̍t hāng khah khòai?

6

Chóng-sī beh hō͘ lín chai, Jîn-chú tī tōe-nı̍h ū kôan thang sià chōe, chiū kā piàn-sūi ê kóng, Khí-lâi, giâ lí ê pho͘-á, tò-khì lí ê chhù.

7

I chiū khí-lâi, tò-khì i ê chhù.

8

Chèng lâng khòaⁿ-kìⁿ chiū kiaⁿ; kui êng-kng Siōng-tè, chiū-sī ēng chit hō kôan hō͘ lâng ê.

9

Iâ-so͘ tùi hia keng-kè, khòaⁿ-kìⁿ chı̍t lâng, miâ Má-thài, chē tī hiòng-koan; chiū kā i kóng, Tè góa; i chiū khí-lâi tè I.

10

Iâ-so͘ chē toh tī i ê chhù, ū chōe-chōe thiu-hiòng ê kap pháiⁿ lâng lâi, kap Iâ-so͘ chham I ê ha̍k-seng tâng chē.

11

Hoat-lī-sài lâng khòaⁿ-kìⁿ, kā I ê ha̍k-seng kóng, Lín sian-siⁿ siáⁿ-sū kap thiu-hiòng ê í-kı̍p pháiⁿ lâng saⁿ-kap chia̍h?

12

Iâ-so͘ thiaⁿ-kìⁿ chiū kóng, Ióng-kiāⁿ ê lâng bô khiàm-ēng i-seng, to̍k-to̍k phòa-pīⁿ ê chiū tio̍h.

13

Chóng-sī, Góa ài lîn-bín, m̄ ài chè-sū, chit kù sím-mı̍h ì-gī, lín tio̍h khì o̍h. In-ūi góa lâi m̄ sī beh chio gī lâng, sī beh chio pháiⁿ lâng.

14

Hit sî Iok-hān ê ha̍k-seng chiū-kūn I kóng, Góan kap Hoat-lī-sài lâng ta̍uh-ta̍uh kìm-chia̍h, nā-sī lí ê ha̍k-seng bô kìm-chia̍h, sī cháiⁿ-iūⁿ?

15

Iâ-so͘ kā in kóng, Sin-kiáⁿ-sài kap hō-chhōa ê lâng saⁿ-kap tī-teh, hō-chhōa ê lâng kiám ōe ai-siong mah? to̍k-to̍k sî-jı̍t beh kàu, sin-kiáⁿ-sài tùi in tiong-kan bô--khì, hit sî in chiū beh kìm-chia̍h.

16

Bô lâng ēng sin pò͘ pó͘ kū saⁿ; in-ūi só͘ pó͘ ê hit tè, ōe kiù-lı̍h hit niá saⁿ, i ê phòa-khang koh khah tōa.

17

Lâng iā bô ēng sin chiú tóe tī kū phê-lông; nā sī ū, chiū lông lı̍h, chiú lāu, lông ia̍h sòa pháiⁿ; to̍k-to̍k ēng sin chiú tóe tī sin phê-lông, chiū nn̄g hāng lóng pó-chôan.

18

Kóng chiah ê ōe ê sî, tú-tn̄g ū chı̍t ê koaⁿ lâi pài I kóng, Góa ê cha-bó͘-kiáⁿ tú-á sí, chóng-sī lí lâi ēng chhiú bong i, i chiū ōe o̍ah.

19

Iâ-so͘ khí-lâi tè i khì, I ê ha̍k-seng ia̍h khì.

20

Tú-tn̄g ū chı̍t ê hū-jîn-lâng, hiat-lāu cha̍p-jī nî, kiâⁿ óa I ê ka-chiah-āu, bong I saⁿ-á-ku ê chhiu;

21

in-ūi i sim-lāi phah-sǹg kóng, Góa kan-ta bong I ê saⁿ, chiū ōe hó.

22

Iâ-so͘ o̍at-tńg-sin, khòaⁿ i chiū kóng, Hū-jîn-lâng ah, chòe lí an-sim, lí ê sìn hō͘ lí hó lah; tùi hit sî hū-jîn-lâng chiū hó.

23

Iâ-so͘ kàu hit ê koaⁿ ê chhù, khòaⁿ-kìⁿ pûn ta̍t-á ê, iā ū chèng lâng teh khàu;

24

chiū kóng, Thè-khì, in-ūi cha-bó͘ gín-ná m̄ sī sí, sī teh khùn. In chiū léng-chhiò I.

25

Í-keng kóaⁿ chèng lâng chhut, chiū jı̍p-khì, khan i ê chhiú; cha-bó͘ gín-ná chiū khí-lâi.

26

Chit ê hong-siaⁿ piàn thôan tī hit ê tōe-hng.

27

Iâ-so͘ tùi hia keng-kè, ū nn̄g ê chhiⁿ-mî lâng tè I, kiò kóng, Tāi-pı̍t ê hō͘-è, lîn-bín góan.

28

Í-keng jı̍p chhù, chhiⁿ-mî lâng chiū-kūn I. Iâ-so͘ kā in kóng, Lín sìn góa ōe chòe chit ê sū mah? Ìn kóng, Chú ah, ū.

29

I chiū bong in ê ba̍k-chiu kóng, chiàu lín ê sìn, kā lín chòe chiâⁿ.

30

In ê ba̍k-chiu chiū khui. Iâ-so͘ giâm-giâm hoan-hù in kóng, Kín-sīn bo̍h-tit hō͘ lâng chai.

31

Nā-sī in chhut-khì, piàn thôan I ê miâ tī hit tōe-hng.

32

In chhut-khì ê sî, tú-tn̄g ū lâng chhōa chı̍t ê é-káu hōan-tio̍h kúi ê lâi chiū-kūn Iâ-so͘.

33

Kúi í-keng kóaⁿ chhut, é-káu ê chiū kóng ōe; hiah ê chèng lâng lóng kî-kòai kóng, Í-sek-lia̍t tiong bē bat khòaⁿ-kìⁿ án-ni.

34

Nā-sī Hoat-lī-sài lâng kóng, I óa-khò kúi-ông lâi kóaⁿ kúi.

35

Iâ-so͘ piàn kiâⁿ chiah ê siâⁿ chiah ê hiuⁿ-siā, tī in ê hōe-tn̂g kà-sī lâng, thôan thian-kok ê hok-im, i-hó ta̍k iūⁿ ê chèng-thâu, ta̍k iūⁿ ê pīⁿ-thiàⁿ.

36

I khòaⁿ-kìⁿ hiah ê chèng lâng, chiū khó-lîn in; in-ūi in khùn-khó͘ sì-sòaⁿ, chhin-chhiūⁿ iûⁿ bô bo̍k-chiá.

37

Tùi án-ni chiū kā I ê ha̍k-seng kóng,

38

Thang siu-sêng ê sī chōe, chòe kang ê sī chió; só͘-í lín tio̍h kiû hn̂g Chú pek kang khì kā I siu-sêng.