Bí-ka 第 4 章 - 巴克禮全羅

1

Kàu hiah ê jı̍t ê liáu-āu, Iâ-hô-hoa tiān ê soaⁿ beh kiàn-lı̍p tī chiah ê soaⁿ ê téng-bīn, pôaⁿ-kè lóng-chóng ê soaⁿ-niá; bān-kok ê peh-sìⁿ lóng beh lâi kui i.

2

Ū chōe-chōe kok beh khì, kóng, Lâi ah, lán chiūⁿ Iâ-hô-hoa ê soaⁿ, kàu Ngá-kok ê Siōng-tè ê tiān; I beh ēng I ê tō-lō͘ kà-sī lán, lán iā beh kiâⁿ I ê lō͘; in-ūi lu̍t-hoat beh tùi Sek-an chhut, Iâ-hô-hoa ê ōe beh tùi Iâ-lō͘-sat-léng thôan-pò.

3

I beh tī chōe-chōe kok ê peh-sìⁿ-tiong kiâⁿ sím-phòaⁿ, ūi-tio̍h chōe-chōe hn̄g-hn̄g kiông-béng ê kok lâi kái-koat; in beh chiong in ê to phah-chòe lôe-thâu, chiong in ê chhiuⁿ phah-chòe liâm-á; chit-kok bô kia̍h-to kong-kek hit-kok, in iā bô koh ha̍k-sı̍p kau-chiàn.

4

Lâng-lâng lóng beh chē tī i ka-kī ê phû-tô-chhiū-kha, kap ka-kī ê bû-hoa-kó chhiū-kha, bô lâng hō͘ i kiaⁿ; in-ūi che sī bān-kun ê Iâ-hô-hoa chhin-chhùi kóng--ê.

5

Bān peh-sìⁿ ta̍k-ê hōng i ê siōng-tè ê miâ lâi kiâⁿ; chóng-sī góan beh hōng góan ê Siōng-tè Iâ-hô-hoa ê miâ lâi kiâⁿ, tı̍t-kàu éng-óan.

6

Iâ-hô-hoa kóng, Kàu hit-jı̍t, Góa beh chū-chı̍p pái-kha--ê, chio-chı̍p siū kóaⁿ-chhut--ê, kap Góa só͘ bat hō͘ i siū-khó͘-ê.

7

Góa beh hō͘ pái-kha--ê chòe só͘-chhun ê peh-sìⁿ, hō͘ siū-kóaⁿ kàu hn̄g-hn̄g--ê chòe kiông ê kok; Iâ-hô-hoa beh tī Sek-an soaⁿ chòe ông tī-lí in, tùi taⁿ kàu éng-óan.

8

Lūn-kàu lí chòe kui-kûn iûⁿ ê chiú-kiⁿ-lâu, chòe Sek-an siâⁿ ê soaⁿ ah, kok-kôan beh kui tī lí, koh chá-sî ê kok-kôan, Iâ-lō͘-sat-léng siâⁿ ê kok-ūi lóng beh kui tī lí.

9

Taⁿ lí siáⁿ-sū tōa-siaⁿ thî-khàu ah? thòng-khó͘ khîⁿ-tio̍h lí, chhin-chhiūⁿ beh siⁿ-kiáⁿ ê hū-jîn-lâng, sī in-ūi lín tiong-kan bô ông mah? lín ê bô͘-sū sí-bô mah?

10

Sek-an ê cha-bó͘-kiáⁿ ah, lí tio̍h thàng-thiàⁿ kan-khó͘, chhin-chhiūⁿ siⁿ-kiáⁿ ê hū-jîn-lâng, in-ūi lí beh chhut-siâⁿ khiā-khí tī chhân--nih, beh kàu Pa-pí-lûn, tī-hia tit-tio̍h kiù, Iâ-hô-hoa beh tī-hia sio̍k-hôe lí, thoat-lī lí ê tùi-te̍k ê chhiú.

11

Taⁿ chōe-chōe kok ê peh-sìⁿ chū-chı̍p kong-kek lí, kóng, Gōan Sek-an siū bak lâ-sâm, hō͘ góan chhin-ba̍k khòaⁿ-kìⁿ.

12

Chóng-sī in m̄-chai Iâ-hô-hoa ê ì-sù, iā bô bêng-pe̍k I ê kè-e̍k; I chū-chı̍p in, chhin-chhiūⁿ tiū-pé chū-chı̍p tī gō͘-kak-tiûⁿ.

13

Sek-an ê cha-bó͘-kiáⁿ ah, khí-lâi, ta̍h gō͘-kak; Góa beh hō͘ lí ê kak chiâⁿ-chòe thih, hō͘ lí ê tôe chiâⁿ-chòe tâng; lí beh phah-chhùi chōe-chōe kok ê peh-sìⁿ, chiong in só͘ chhiúⁿ ê mı̍h hiàn hō͘ Iâ-hô-hoa, chiong in ê chîⁿ-châi hiàn hō͘ phó͘ thiⁿ-ē ê Chú.