Bîn-sò͘ Kì-lio̍k 第 12 章 - 巴克禮全羅

1

Bí-lī-àm kap A-lûn hiâm Mô͘-se, ūi-tio̍h i só͘ chhōa Kó͘-sı̍t ê cha-bó͘-kiáⁿ; in-ūi Mô͘-se bat chhōa Kó͘-sı̍t lâng ê cha-bó͘-kiáⁿ chòe bó͘.

2

In kóng, Iâ-hô-hoa kiám toaⁿ-toaⁿ kap Mô͘-se kóng-ōe? Kiám iā bô kap góan kóng-ōe mah? Chit ê ōe Iâ-hô-hoa thiaⁿ-kìⁿ.

3

Hit ê Mô͘-se chòe-lâng ke̍k-kî un-jiû, iâⁿ-kè sè-chiūⁿ ê chèng-lâng.

4

Iâ-hô-hoa hut-jiân tùi Mô͘-se A-lûn Bí-lī-àm, kóng, Lín saⁿ-lâng chhut-lâi kàu hōe-bō͘ chia; in saⁿ-lâng chiū chhut-lâi.

5

Iâ-hô-hoa tī hûn-thiāu-tiong kàng-lîm, khiā tī Pò͘-pîⁿ mn̂g-kháu, tiàu A-lûn kap Bí-lī-àm; in nn̄g lâng chiū chhut-lâi.

6

I kóng, Tio̍h thiaⁿ Góa ê ōe; lín tiong-kan nā ū sian-ti, Góa Iâ-hô-hoa beh ēng īⁿ-siōng hō͘ in bat Góa, tī bîn-bāng-tiong kap in kóng-ōe.

7

Góa ê lô͘-po̍k Mô͘-se m̄-sī án-ni; i chīn-tiong tī Góa ê chôan-ke.

8

Góa beh bīn tùi bīn kap i kóng-ōe, chiū-sī bêng-bêng kóng, bô ēng chhai-gú; koh i beh khòaⁿ-kìⁿ Iâ-hô-hoa ê hêng-iông; lín hiâm Góa ê lô͘-po̍k Mô͘-se, siáⁿ-sū bô kiaⁿ ah?

9

Iâ-hô-hoa siū-khì in, chiū khì.

10

Hûn tùi Pò͘-pîⁿ-téng sóa-khui; khòaⁿ ah, Bí-lī-àm thái-ko chhin-chhiūⁿ seh. A-lûn khòaⁿ Bí-lī-àm, khòaⁿ ah, i sī thái-ko.

11

A-lûn tùi Mô͘-se kóng, Góa ê chú ah, kiû lí bo̍h-tit in-ūi góan ê gû-gōng hōan-chōe, chiong chit ê chōe kui tī góan.

12

Kiû lí m̄-thang hō͘ i chhin-chhiūⁿ í-keng sí, chiah tùi lāu-bú ê thai chhut, bah í-keng nōa chı̍t-pòaⁿ.

13

Mô͘-se chiū ai-kiû Iâ-hô-hoa kóng, Siōng-tè ah, kiû Lí i-hó i.

14

Iâ-hô-hoa tùi Mô͘-se kóng, Siat-sú i ê lāu-pē phùi-nōa tī i ê bīn, i kiám bô kiàn-siàu chhit-jı̍t mah? Taⁿ tio̍h kā i koaiⁿ tī iâⁿ-gōa chhit-jı̍t, jiân-āu chiah thang chhōa i jı̍p-lâi.

15

Tùi án-ni koaiⁿ Bí-lī-àm tī iâⁿ-gōa chhit-jı̍t; peh-sìⁿ bô khí-sin, thèng-hāu Bí-lī-àm koh jı̍p-lâi.

16

Āu-lâi peh-sìⁿ tùi Hap-sé-lio̍k khí-sin, tī Pa-lân ê khòng-iá an-iâⁿ.