Bîn-sò͘ Kì-lio̍k 第 16 章 - 巴克禮全羅

1

Lī-bī ê cheng-sun, Ko-hat ê sun, Í-su-hap ê kiáⁿ Khó-la̍h, kap Liû-piān ê kiáⁿ-sun-tiong Í-lī-ap ê kiáⁿ Tāi-tan, A-pí-lân, kap Pí-le̍k ê kiáⁿ An,

2

kiat chı̍t-tóng, kap Í-sek-lia̍t tiong ê lâng, chiū-sī hōe-tiong ê siú-léng nn̄g-pah gō͘-cha̍p lâng, sī ū bêng-bōng siū kéng-tiàu hù-hōe ê lâng, saⁿ-kap khí-lâi tī Mô͘-se ê bīn-chêng.

3

In chū-chı̍p kong-kek Mô͘-se A-lûn kóng, Lín chhiàm-kôan, chôan-hōe ta̍k-lâng lóng sī sèng, Iâ-hô-hoa iā tī in tiong-kan; lín siáⁿ-sū chū-ko pôaⁿ-kè Iâ-hô-hoa ê hōe-chiòng ah?

4

Mô͘-se thiaⁿ-kìⁿ chit ê ōe chiū phak tī tōe-nı̍h,

5

tùi Khó-la̍h kap i ê chôan-tóng ê lâng kóng, Kàu bîn-á-chá-khí, Iâ-hô-hoa beh chí-sī sím-mı̍h lâng sī sio̍k I ê, sím-mı̍h lâng sī sèng, chiū beh hō͘ hit-lâng chhin-kūn I; I só͘ kéng-sóan ê lâng beh hō͘ in chhin-kūn I.

6

Lín tio̍h án-ni kiâⁿ; Khó-la̍h kap i ê tóng, tio̍h the̍h hiuⁿ-lô͘;

7

bîn-á-jı̍t tī Iâ-hô-hoa ê bīn-chêng, ēng hé tóe tī hí lāi-bīn, hē hiuⁿ tī hit téng-bīn; Iâ-hô-hoa só͘ kéng ê lâng, i beh chòe sèng; lín Lī-bī ê kiáⁿ-sun chhiàm-kôan lah.

8

Mô͘-se koh tùi Khó-la̍h kóng, Lī-bī ê kiáⁿ-sun ah, lín tio̍h thiaⁿ;

9

Í-sek-lia̍t ê Siōng-tè, tùi Í-sek-lia̍t ê hōe-tiong hun-piat lín, hō͘ lín chhin-kūn I, pān Iâ-hô-hoa hōe-bō͘ ê sū, iā khiā tī hōe-chiòng ê bīn-chêng lâi chòe in ê chhe-ēng.

10

I koh hō͘ lí, kap lí lóng-chóng ê hiaⁿ-tī Lī-bī ê kiáⁿ-sun, saⁿ-kap chhin-kūn I, lín lia̍h che chòe sió-khóa mah? Lín iáu-kú iau-kiû chè-si ê chit mah?

11

Só͘-í lí kap lí ê tóng chū-chı̍p, sī teh kong-kek Iâ-hô-hoa; A-lûn sī sím-mı̍h, lín kéng-jiân ai-òan i ah?

12

Mô͘-se chhe lâng khì kiò Í-lī-ap ê kiáⁿ Tāi-tan, A-pí-lân; in kóng, Góan m̄ chiūⁿ-khì;

13

lí chhōa góan tùi siông-siông lâu lin kap bı̍t ê tōe chiūⁿ-lâi, beh tī khòng-iá thâi-sí góan, che kiám sī sió-khóa, lí iáu-kú beh ka-kī siat-lı̍p chòe jîn-kun lâi kóan-hat góan mah?

14

Koh lí bô-iáⁿ chhōa góan kàu lâu lin kap bı̍t ê tōe, iā bô ēng chhân-hn̂g, kap phû-tô-hn̂g, hō͘ góan chòe gia̍p; chóng bô lí beh iah chiah ê lâng ê ba̍k-chiu mah? Góan bô beh chiūⁿ-khì.

15

Mô͘-se siū-khì kàu-ke̍k, tùi Iâ-hô-hoa kóng, Kiû Lí bo̍h-tit kàm-la̍p in só͘ hiàn ê; góa pēng bô khan in chı̍t chiah lû, iā bô hāi in chı̍t-lâng.

16

Mô͘-se tùi Khó-la̍h kóng, Lí kap lí ê tóng hiah ê lâng, kap A-lûn, bîn-á-jı̍t lóng tio̍h lâi khiā tī Iâ-hô-hoa ê bīn-chêng.

17

Lín ta̍k-lâng tòa i ê hiuⁿ-lô͘, kiōng nn̄g-pah gō͘-cha̍p ê, hē hiuⁿ tī hí téng-bīn, ta̍k-lâng tòa i ê hiuⁿ-lô͘ kàu Iâ-hô-hoa ê bīn-chêng; lí kap A-lûn iā kok tòa ka-kī ê hiuⁿ-lô͘.

18

Tùi án-ni in ta̍k-lâng the̍h i ê hiuⁿ-lô͘, tóe hé tī hí lāi-bīn, hē hiuⁿ tī hit téng-bīn, kap Mô͘-se A-lûn khiā tī hōe-bō͘ mn̂g-kháu.

19

Khó-la̍h chio-chı̍p hōe-chiòng kàu hōe-bō͘ mn̂g-kháu, kong-kek in; Iâ-hô-hoa ê êng-kng hián-hiān tī hōe-chiòng.

20

Iâ-hô-hoa hoan-hù Mô͘-se A-lûn kóng,

21

Lín tio̍h lī-khui chit ê hōe-tiong, Góa thang tī chı̍t-ba̍k-nih-kú ê tiong-kan châu-bia̍t in.

22

In chiū phak tī tōe-nı̍h, kóng, Siōng-tè ah, siúⁿ-sù o̍ah-miā hō͘ kìⁿ-nā ū jio̍k-thé-ê ê Siūong-tè ah, chı̍t-lâng hōan-chōe, Lí chiū beh siū-khì chôan-hōe mah?

23

Iâ-hô-hoa hoan-hù Mô͘-se kóng,

24

Lí tio̍h hoan-hù hōe-chiòng tùi in kóng, Lín tio̍h lī-khui Khó-la̍h, Tāi-tan, A-pí-lân pò͘-pîⁿ ê sì-ûi.

25

Mô͘-se khí-lâi khì Tāi-tan, A-pí-lân hia, Í-sek-lia̍t ê tiúⁿ-ló iā tè i khì.

26

I hoan-hù hōe-chiòng kóng, Lín tio̍h lī-khui chiah ê pháiⁿ-lâng ê pò͘-pîⁿ. in ê mı̍h-kiāⁿ lóng m̄-thang bong, kiaⁿ-liáu lín iā siū bia̍t tī in ê chōe-tiong.

27

In chiū lī-khui Khó-la̍h, Tāi-tan, A-pí-lân pò͘-pîⁿ ê sì-ûi; Tāi-tan, A-pí-lân kap in ê bó͘, in ê kiáⁿ, in ê sòe-kiáⁿ, lóng chhut-lâi khiā tī in ka-kī ê pò͘-pîⁿ mn̂g-kháu.

28

Mô͘-se kóng, Iâ-hô-hoa chhe Góa kiâⁿ che it-chhè ê sū, lín tùi án-ni thang chai, in-ūi góa m̄-sī chū-choan lâi kiâⁿ.

29

Siat-sú chiah ê lâng sí chhin-chhiūⁿ pêng-siông lâng sí, in só͘ tú-tio̍h chhin-chhiūⁿ pêng-siông lâng só͘ tú-tio̍h, chiū Iâ-hô-hoa bô chhe góa.

30

Siat-sú Iâ-hô-hoa chòe chı̍t-hāng sin ê sū, hō͘ tōe khui-chhùi, chiong in kap it-chhè sio̍k in-ê lóng thun-lo̍h-khì, hō͘ in o̍ah-o̍ah tūi-lo̍h im-kan, lín chiū chai chiah ê lâng sī biáu-sī Iâ-hô-hoa.

31

Chiah ê ōe i tú-á kóng soah, in ē-bīn ê tōe chiū lı̍h-khui.

32

Tōe chiū khui-chhùi, chiong in kap in ê ke-kòan, í-kı̍p it-chhè sio̍k Khó-la̍h ê jîn-teng châi-bu̍t, lóng thun-lo̍h-khì.

33

Hiah ê lâng kap it-chhè sio̍k in-ê, lóng o̍ah-o̍ah lo̍h im-kan; tōe chiū koh ha̍p-óa tī in ê téng-bīn, in chiū tùi hōe-tiong bia̍t-bô.

34

Tī in sì-ûi ê Í-sek-lia̍t lâng, thiaⁿ-kìⁿ in âu-kiò, chiū lóng tô-cháu kóng, Kiaⁿ-liáu tōe iā kā lán thun-lo̍h-khì.

35

Koh ū hé tùi Iâ-hô-hoa hia chhut, thun-bia̍t hiah ê hiàn-hiuⁿ ê nn̄g-pah gō͘-cha̍p lâng.

36

Iâ-hô-hoa hoan-hù Mô͘-se kóng,

37

Lí tio̍h hoan-hù chè-si A-lûn ê kiáⁿ Í-lī-a-sat, tùi hé-tiong khioh hiah ê hiuⁿ-lô͘ khí-lâi, phah-sòaⁿ tī-hia ê hé; in-ūi hiah ê hiuⁿ-lô͘ í-keng sī sèng.

38

Ēng hiah ê hōan-chōe hāi ka-kī ê sìⁿ-miā ê lâng ê hiuⁿ-lô͘, tûi chòe kui-phìⁿ, lâi an chè-tôaⁿ; in-ūi in hiàn tī Iâ-hô-hoa ê bīn-chêng, só͘-í sī sèng-ê, thang hō͘ Í-sek-lia̍t lâng chòe kàm-kài.

39

Chè-si Í-lī-a-sat chiū the̍h hiah ê lâng só͘ hiàn ê tâng-lô͘, tûi chòe kui-phìⁿ, lâi an chè-tôaⁿ, hō͘ Í-sek-lia̍t lâng chòe kàm-kài;

40

hō͘ gōa-bīn lâng, m̄-sī sio̍k A-lûn ê hō͘-è ê, bōe thang óa-kūn Iâ-hô-hoa lâi sio-hiuⁿ, bián-tit in chhin-chhiūⁿ Khó-la̍h kap i ê tóng; che sī chiàu Iâ-hô-hoa thok Mô͘-se só͘ bēng-lēng ê.

41

Keh-jı̍t Í-sek-lia̍t lâng chôan-hōe lóng ai-òan Mô͘-se A-lûn, kóng, Lín hāi-sí Iâ-hô-hoa ê peh-sìⁿ.

42

Hōe-chiòng chū-chı̍p kong-kek Mô͘-se A-lûn ê sî, ǹg hōe-bō͘ khòaⁿ, khòaⁿ ah, ū hûn khàm i, Iâ-hô-hoa ê êng-kng hián-hiān.

43

Mô͘-se A-lûn chiū kàu hōe-bō͘ chêng.

44

Iâ-hô-hoa hoan-hù Mô͘-se kóng,

45

Lín tio̍h lī-khui chit ê hōe-tiong, hō͘ Góa thang tī chı̍t-ba̍k-nih-kú ê tiong-kan bia̍t-bô in; in nn̄g-lâng chiū phak tī tōe-nı̍h.

46

Mô͘-se tùi A-lûn kóng, The̍h hit ê hiuⁿ-lô͘, ēng tôaⁿ-téng ê hé tóe tī hí tiong-kan, hē hiuⁿ tī hí téng-bīn, kín-kín tòa kàu hōe-chiòng hia, kā in sio̍k-chōe; in-ūi ū tōa siū-khì tùi Iâ-hô-hoa chhut, un-e̍k í-keng hoat-choh.

47

A-lûn chiàu Mô͘-se só͘-kóng-ê the̍h-lâi, cháu kàu hōe-tiong; khòaⁿ ah, un-e̍k í-keng hoat tī peh-sìⁿ-tiong, i chiū hē hiuⁿ, kā peh-sìⁿ sio̍k-chōe.

48

I khiā tī o̍ah-lâng sí-lâng ê tiong-kan, un-e̍k chiū soah.

49

Tû-khì in-ūi Khó-la̍h ê tāi-chì sí-ê í-gōa, tú-tio̍h un-e̍k sí ê, kiōng ū chı̍t-bān sì-chheng chhit-pah lâng.

50

A-lûn tò-lâi kàu Mô͘-se hia, kàu hōe-bō͘ mn̂g, un-e̍k chiah soah.