Bîn-sò͘ Kì-lio̍k 第 17 章 - 巴克禮全羅

1

Iâ-hô-hoa hoan-hù Mô͘-se kóng,

2

Lí kā Í-sek-lia̍t lâng kóng, tùi in kia̍h kóaiⁿ-á, ta̍k chi-phài chı̍t-ki, chiū-sī tùi hiah ê chi-phài ê siú-léng, kiōng kia̍h cha̍p-jī ki; lí siá ta̍k-lâng ê miâ tī i ê kóaiⁿ-á.

3

Tī Lī-bī hit-ki kóaiⁿ-á tio̍h siá A-lûn ê miâ; in-ūi ta̍k chi-phài ê thâu-lâng lóng ū chı̍t ki kóaiⁿ-á.

4

Lí tio̍h chiong hiah-ê hē tī hōe-bō͘-lāi hoat-kūi ê thâu-chêng, chiū-sī Góa kap lín siong-hōe ê só͘-chāi.

5

Góa só͘ kéng hit-lâng, i ê kóaiⁿ-á beh puh-gê; án-ni Góa beh hō͘ Í-sek-lia̍t lâng ai-òan ê ōe, chiū-sī in só͘ ai-òan lín ê ōe, lóng soah, bô koh hō͘ Góa thiaⁿ-kìⁿ.

6

Mô͘-se chiū kā Í-sek-lia̍t lâng kóng; in ê siú-léng chiū ēng kóaiⁿ-á kau hō͘ i, chiàu in ê chi-phài chı̍t ê siú-léng chı̍t-ki, kiōng cha̍p-jī ki kóaiⁿ-á; A-lûn ê kóaiⁿ-á iā tī hiah ê kóaiⁿ-á ê tiong-kan.

7

Mô͘-se chiū chiong hiah ê kóaiⁿ-á hē tī hoat-kūi ê pò͘-pîⁿ-lāi, tī Iâ-hô-hoa ê bīn-chêng.

8

Bîn-á-jı̍t Mô͘-se jı̍p-khì hoat-kūi ê pò͘-pîⁿ; khòaⁿ ah, sio̍k Lī-bī ê ke, A-lûn ê kóaiⁿ-á, í-keng puh-gê, siⁿ hoe-m̂, khui-hoe, kiat-chiâⁿ hēng-jîn.

9

Mô͘-se tùi Iâ-hô-hoa ê bīn-chêng kia̍h hiah ê kóaiⁿ-á chhut-lâi, kàu Í-sek-lia̍t ê chèng-lâng hia; in khòaⁿ-kìⁿ ta̍k-lâng kia̍h in ê kóaiⁿ-á.

10

Iâ-hô-hoa tùi Mô͘-se kóng, Ēng A-lûn ê kóaiⁿ-á iû-gôan hē tī hoat-kūi chêng, lâu-teh, chòe chiah ê pōe-ge̍k ê lâng ê kàm-kài; án-ni lí chiū hō͘ in tùi Góa ai-òan ê ōe soah, bián-tit in sí-bô.

11

Mô͘-se án-ni kiâⁿ, sī chiàu Iâ-hô-hoa só͘ bēng-lēng-ê lâi kiâⁿ.

12

Í-sek-lia̍t lâng tùi Mô͘-se kóng, Khòaⁿ ah, góan sí lah, góan bia̍t-bô lah, lóng bia̍t-bô lah.

13

Kìⁿ-nā óa-kūn, chiū-sī óa-kūn Iâ-hô-hoa ê hōe-bō͘ ê, lóng sí; góan beh lóng-chóng sí mah?