Bîn-sò͘ Kì-lio̍k 第 18 章 - 巴克禮全羅

1

Iâ-hô-hoa tùi A-lûn kóng, Lí kap lí chiah ê kiáⁿ, kap lí ê pún-cho̍k, tio̍h saⁿ-kap tam-tng sèng-só͘ ê chōe; lí kap lí chiah ê kiáⁿ iā tio̍h tam-tng lín chè-si-chit ê chōe.

2

Lí tio̍h chhōa lí ê hiaⁿ-tī Lī-bī ê chi-phài, lí ê chó͘-kong ê chi-phài, chìn-chêng lâi, hō͘ in kap lí liân-ha̍p lâi su-hāu lí; nā-sī lí kap lí ê kiáⁿ, lóng tio̍h tī hoat-kūi ê hōe-bō͘-chêng.

3

In tio̍h chòe lí ê chhe-ēng, iā tio̍h chòe Pò͘-pîⁿ ê chhe-ēng; to̍k-to̍k m̄-thang kūn sèng-só͘ ê khì-kū kap tôaⁿ, bián-tit in kap lín lóng sí.

4

In tio̍h kap lí liân-ha̍p, iā tio̍h chòe hōe-bō͘ ê chhe-ēng, liāu-lí Pò͘-pîⁿ lóng-chóng ê kang; to̍k-to̍k gōa-bīn lâng m̄-thang óa-kūn lín.

5

Lín tio̍h chòe sèng-só͘ ê chhe-ēng, kap tôaⁿ ê chhe-ēng, bián-tit siū-khì koh kàu tī Í-sek-lia̍t lâng.

6

Góa, khòaⁿ ah, Góa bat tùi Í-sek-lia̍t lâng ê tiong-kan kéng lín ê hiaⁿ-tī Lī-bī lâng lâi siúⁿ-sù lín, kap kui Iâ-hô-hoa, lâi liāu-lí hōe-bō͘ ê kang.

7

Só͘-í lí kap lí ê kiáⁿ tio̍h saⁿ-kap siú chè-si ê chit, liāu-lí tôaⁿ kap tiùⁿ-lî-lāi it-chhè ê kang; lín tio̍h án-ni ho̍k-bū; Góa í-keng siúⁿ-sù lí chè-si ê chit-jīm ê kang, chhin-chhiūⁿ sàng mı̍h; kìⁿ-nā gōa-bīn lâng kūn-óa-ê, tek-khak hō͘ i sí.

8

Iâ-hô-hoa koh kā A-lûn kóng, Góa, khòaⁿ ah, Góa í-keng ēng hiàn hō͘ Góa ê kú-chè, chiū-sī Í-sek-lia̍t lâng hun-piat chòe-sèng ê mı̍h, kau lí siú i; in-ūi lí siū boah-iû, chiah ê mı̍h kui lí kap lí ê kiáⁿ-sun, chòe éng-óan ê hūn-gia̍h.

9

Bô keng-kè hé, chì-sèng ê mı̍h ê tiong-kan, sio̍k tī lí-ê sī chiah-ê: kìⁿ-nā in ê lé-mı̍h, in ê sò͘-chè, in ê sio̍k-chōe-chè, in ê pó͘-kè-sit-chè, in só͘ hiàn hō͘ Góa ê, lóng chòe chì-sèng, kui hō͘ lí kap lí ê kiáⁿ-sun.

10

Lí tio̍h khòaⁿ chiah-ê chòe chì-sèng lâi chia̍h i; kìⁿ-nā ta-po͘-teng lóng thang chia̍h; lí tio̍h lia̍h chit ê mı̍h chòe-sèng.

11

Chiah-ê iā sī lí ê, lé-mı̍h ê kú-chè, í-kı̍p Í-sek-lia̍t lâng só͘ hiàn ê iô-chè, Góa lóng siúⁿ-sù lí, kap lí ê kiáⁿ, cha-bó͘-kiáⁿ, chòe éng-óan ê hūn-gia̍h; kìⁿ-nā tī lí ke-tiong chheng-khì ê lâng lóng thang chia̍h.

12

Siōng-hó ê iû, siōng-hó ê chiú, siōng-hó ê gō͘-kak, chiū-sī in khí-thâu-se̍k hiàn hō͘ Iâ-hô-hoa ê, Góa lóng siúⁿ-sù lí.

13

In ê tōe khí-thâu-se̍k ê mı̍h, só͘ hiàn hō͘ Iâ-hô-hoa ê, lóng kui hō͘ lí; lí ke-lāi chheng-khì ê lâng lóng thang chia̍h.

14

Í-sek-lia̍t tiong kìⁿ-nā siū hun-piat hiàn-chīn ê, lóng tio̍h kui hō͘ lí.

15

Kìⁿ-nā ū jio̍k-thé thâu-chiūⁿ-siⁿ-ê, bô-lūn lâng á-sī cheng-siⁿ, in só͘ hiàn hō͘ Iâ-hô-hoa ê, lóng kui tī lí; to̍k-to̍k lâng thâu-chiūⁿ-siⁿ-ê lí tio̍h sio̍k i; bô chheng-khì ê cheng-siⁿ thâu-chiūⁿ-siⁿ-ê, lí iā tio̍h sio̍k i.

16

Tī móa-ge̍h í-gōa só͘ tio̍h sio̍k ê, tio̍h chiàu lí só͘ kó͘ ê kè, chiàu sèng-só͘ ê sià-khek-le̍k, ēng gûn gō͘ sià-khek-le̍k sio̍k-hôe i; chı̍t sià-khek-le̍k sī jī-cha̍p kùi-la̍h.

17

To̍k-to̍k thâu-chiūⁿ-siⁿ ê gû, thâu-chiūⁿ-siⁿ ê mî-iûⁿ, thâu-chiūⁿ-siⁿ ê soaⁿ-iûⁿ, lí m̄-thang sio̍k; che sī sèng, tio̍h hiù i ê huih tī tôaⁿ-nı̍h, tio̍h sio i ê iû chòe hé-chè, chòe phang-phang hiàn hō͘ Iâ-hô-hoa.

18

Hiah ê bah kui tī lí, chhin-chhiūⁿ só͘ iô ê heng kap chiàⁿ-thúi kui tī lí chı̍t-iūⁿ.

19

Kìⁿ-nā sèng-mı̍h ê kú-chè, sī Í-sek-lia̍t lâng hiàn hō͘ Iâ-hô-hoa ê, Góa lóng siúⁿ-sù lí, kap lí ê kiáⁿ, cha-bó͘-kiáⁿ, chòe éng-óan tit-tio̍h ê hūn-gia̍h; che sī hō͘ lí kap lí ê hō͘-è, tī Iâ-hô-hoa ê bīn-chêng, chòe éng-óan bōe-hòe ê iok.

20

Iâ-hô-hoa tùi A-lûn kóng, Lí tī in ê tōe-hng m̄-thang ū sán-gia̍p, tī in ê tiong-kan iā m̄-thang ū hūn-gia̍h; tī Í-sek-lia̍t lâng tiong Góa chiū-sī lí ê hūn-gia̍h, sī lí ê sán-gia̍p.

21

Khòaⁿ ah, tī Í-sek-lia̍t tiong só͘ thiu ê cha̍p-hūn-chı̍t, Góa í-keng siúⁿ-sù Lī-bī ê kiáⁿ-sun chòe gia̍p; in-ūi in só͘ chòe ê kang sī hōe-bō͘ ê kang, só͘-í siúⁿ-sù in, lâi pò-tap in ê tio̍h-bôa.

22

Tùi taⁿ í-āu, Í-sek-lia̍t lâng m̄-thang óa-kūn hōe-bō͘, bián-tit in tam-tng chōe lâi sí.

23

To̍k-to̍k Lī-bī lâng tio̍h chòe hōe-bō͘ ê kang, tam-tng in ê chōe; che beh chòe lín ta̍k sè-tāi éng-óan ê lē; in tī Í-sek-lia̍t lâng ê tiong-kan m̄-thang ū sán-gia̍p.

24

In-ūi Í-sek-lia̍t lâng só͘ thiu ê cha̍p-hūn-chı̍t, só͘ hiàn hō͘ Iâ-hô-hoa chòe kú-chè ê, Góa í-keng siúⁿ-sù Lī-bī lâng chòe-gia̍p; só͘-í Góa tùi in kóng, in tī Í-sek-lia̍t lâng ê tiong-kan m̄-thang ū sán-gia̍p.

25

Iâ-hô-hoa hoan-hù Mô͘-se kóng,

26

Lí tio̍h hoan-hù Lī-bī lâng kā in kóng, Lín tùi Í-sek-lia̍t lâng ê tiong-kan thiu cha̍p-hūn-chı̍t, chiū-sī Góa hō͘ lín chòe gia̍p ê; hit-sî lín tio̍h tùi hit ê cha̍p-hūn-chı̍t ê tiong-kan koh thiu cha̍p-hūn-chı̍t, chòe kú-chè, hiàn hō͘ Iâ-hô-hoa.

27

Lí ê kú-chè beh kā lín sǹg chòe gō͘-kak-tiûⁿ ê be̍h, kap móa tī phû-tô-khut ê chiú.

28

Án-ni, lín tùi Í-sek-lia̍t tiong só͘ tit-tio̍h ê cha̍p-hūn-chı̍t, tio̍h tùi hit-ê hiàn kú-chè hō͘ Iâ-hô-hoa; lín tio̍h tùi hit-ê, ēng Iâ-hô-hoa ê kú-chè hō͘ chè-si A-lûn.

29

Lín só͘ tit-tio̍h it-chhè ê lé-mı̍h, tio̍h tùi hit tiong-kan, chiong tē-it hó-ê, chiū-sī hun-piat chòe-sèng ê hūn-gia̍h, hiàn hiah ê kú-chè hō͘ Iâ-hô-hoa.

30

Só͘-í lí tio̍h tùi in kóng, Lín í-keng tùi hit tiong-kan kú-khí hit ê chì-hó-ê, che chiū-sī kā Lī-bī lâng sǹg chòe gō͘-kak-tiûⁿ ê ngó͘-kok, iā chhin-chhiūⁿ chiú-khut ê chiú.

31

Lín kap lín ê ke-kòan, ta̍k só͘-chāi thang chia̍h i; che sī lín ê kang-chîⁿ, sī pò-tap lín tī hōe-bō͘-lāi só͘ chòe ê kang.

32

Lín í-keng tùi hit tiong-kan kú-khí hit ê chì-hó-ê, chiū bô in-ūi án-ni lâi hōan-chōe; lín m̄-thang phah lâ-sâm Í-sek-lia̍t lâng ê sèng-mı̍h, bián-tit lín sí-bô.