Bîn-sò͘ Kì-lio̍k 第 28 章 - 巴克禮全羅

1

Iâ-hô-hoa hoan-hù Mô͘-se kóng,

2

Lí tio̍h bēng-lēng Í-sek-lia̍t lâng kóng, Góa ê lé-mı̍h, chiū-sī hiàn-hō͘ Góa chòe phang-phang chiah ê hé-chè ê chia̍h-mı̍h, lín tio̍h chiàu jı̍t-kî kín-sīn hiàn hō͘ Góa.

3

Koh tio̍h kā in kóng, Lín tio̍h hiàn hō͘ Iâ-hô-hoa ê hé-chè, chiū-sī bô hâ-chhû bē-móa-nî ê iûⁿ-káng-á, ta̍k-jı̍t nn̄g-chiah, chòe kú-tn̂g hiàn ê sio-chè.

4

Chá-khí-sî tio̍h hiàn iûⁿ-á chı̍t-chiah, hông-hun ê sî tio̍h hiàn iûⁿ-á chı̍t-chiah.

5

Koh tio̍h hiàn iù-mī-hún i-hoat cha̍p-hūn-chı̍t, kap tiau-hô khoeh-hó ê iû chı̍t-him sì-hūn-chı̍t chòe sò͘-chè.

6

Che sī tī Se-nái soaⁿ só͘ tiāⁿ-tio̍h chòe siông-siông hiàn ê sio-chè, chiū-sī hiàn hō͘ Iâ-hô-hoa chòe phang-phang ê hé-chè.

7

Ūi-tio̍h chí chı̍t chiah iûⁿ-á, tio̍h sòa hiàn kòan-tiān ê chiú, chı̍t-him sì-hūn ê chı̍t-hūn; tī sèng-só͘ tiong, lí tio̍h chiong kāu ê chiú hiàn hō͘ Iâ-hô-hoa chòe kòan-tiān.

8

Ê-hng sî, tio̍h hiàn tē-jī chiah iûⁿ-á, chhin-chhiūⁿ chá-khí-sî ê sò͘-chè, iā chhin-chhiūⁿ i ê kòan-tiān, hiàn i hō͘ Iâ-hô-hoa chòe phang-phang ê hé-chè.

9

Koh tī an-hioh-jı̍t tio̍h hiàn nn̄g-chiah bô hâ-chhû bē-móa-nî ê iûⁿ-káng-á, iā ēng tiau-hô iû ê iù-mī-hún i-hoat cha̍p-hūn ê nn̄g-hūn, chòe sò͘-chè, kap i ê kòan-tiān.

10

Che sī ta̍k ê an-hioh-jı̍t ê sio-chè, hit ê siông-siông hiàn ê sio-chè, kap i ê kòan-tiān í-gōa.

11

Ta̍k-ge̍h ê chhoe-it, lín tio̍h hiàn sio-chè hō͘ Iâ-hô-hoa, chiū-sī gû-káng-á nn̄g-chiah, mî-iûⁿ-káng chı̍t-chiah, bô hâ-chhû bē-móa-nî ê iûⁿ-káng-á chhit-chiah.

12

Ūi ta̍k chiah gû-káng-á, tio̍h ēng tiau-hô iû ê iù-mī-hún i-hoat cha̍p-hūn ê saⁿ-hūn, chòe sò͘-chè; ūi hit chiah iûⁿ-káng, iā tio̍h ēng tiau-hô iû ê iù-mī-hún i-hoat cha̍p-hūn ê nn̄g-hūn, chòe sò͘-chè.

13

Ūi-tio̍h ta̍k chiah iûⁿ-á tio̍h ēng tiau-hô iû ê iù-mī-hún cha̍p-hūn ê chı̍t-hūn, chòe sò͘-chè, kap phang-phang ê sio-chè; sī hiàn hō͘ Iâ-hô-hoa ê hé-chè.

14

I ê kòan-tiān tio̍h ēng chiú, ūi-tio̍h chı̍t chiah gû-káng-á ēng pòaⁿ-him, ūi-tio̍h chı̍t chiah iûⁿ-káng ēng chı̍t-him ê saⁿ-hūn-chı̍t, ūi-tio̍h chı̍t chiah iûⁿ-á chiū ēng chı̍t-him ê sì-hūn-chı̍t; che sī ta̍k-ge̍h ê sio-chè, chı̍t-nî ê tiong-kan, ta̍k-ge̍h tio̍h án-ni.

15

Koh tio̍h ēng chı̍t chiah soaⁿ-iûⁿ-káng chòe sio̍k-chōe-chè, hiàn hō͘ Iâ-hô-hoa; tio̍h tī siông-siông hiàn ê sio-chè, kap i ê kòan-tiān, í-gōa lâi hiàn i.

16

Chiaⁿ-ge̍h cha̍p-sì jı̍t sī Iâ-hô-hoa ê pôaⁿ-kè-choeh.

17

Chit-ge̍h cha̍p-gō͘ jı̍t sī choeh-iân; tio̍h chia̍h bô-kàⁿ-piáⁿ chhit-jı̍t kú.

18

Tī i ê thâu-chı̍t jı̍t tio̍h ū sèng-hōe, lóng m̄-thang chòe lô-tōng ê kang.

19

Lí tio̍h hiàn hé-chè chòe sio-chè hō͘ Iâ-hô-hoa, chiū-sī gû-káng-á nn̄g-chiah, mî-iûⁿ-káng chı̍t-chiah, bē-móa-nî ê iûⁿ-káng-á chhit-chiah; lín lóng tio̍h ēng bô hâ-chhû ê.

20

In ê sò͘-chè, ēng tiau-hô iû ê iù-mī-hún, ūi-tio̍h chı̍t chiah gû-káng hiàn cha̍p-hūn-saⁿ, ūi-tio̍h chı̍t chiah iûⁿ-káng hiàn cha̍p-hūn-nn̄g.

21

Ūi-tio̍h hí chhit chiah iûⁿ-á, ta̍k chiah tio̍h hiàn cha̍p-hūn-chı̍t.

22

Koh hiàn chı̍t chiah soaⁿ-iûⁿ-káng chòe sio̍k-chōe-chè, kā lín sio̍k-chōe.

23

Lín hiàn chiah-ê, tio̍h tī chá-khí-sî ê sio-chè, chiū-sī siông-siông hiàn ê sio-chè í-gōa.

24

Liân-liân chhit-jı̍t kú, ta̍k-jı̍t chiàu chit ê lē, ēng phang-phang ê hé-chè ê chia̍h-mı̍h, hiàn hō͘ Iâ-hô-hoa; tio̍h tī siông-siông hiàn ê sio-chè, kap i ê kòan-tiān, í-gōa lâi hiàn.

25

Tē-chhit jı̍t lín tio̍h ū sèng-hōe, lóng m̄-thang chòe sím-mı̍h lô-tōng ê kâng.

26

Chhit ê chhit jı̍t choeh, khí-thâu-se̍k ê thó͘-sán, lín hiàn sin ê sò͘-chè hō͘ Iâ-hô-hoa ê jı̍t, tio̍h ū sèng-hōe, lóng m̄-thang chòe lô-tōng ê kang.

27

Lín tio̍h hiàn phang-phang ê sio-chè hō͘ Iâ-hô-hoa, chiū-sī gû-káng-á nn̄g-chiah, mî-iûⁿ-káng-á chı̍t-chiah, bē-móa-nî ê iûⁿ-káng-á chhit-chiah.

28

In ê sò͘-chè, ēng tiau-hô iû ê iù-mī-hún, ūi-tio̍h chı̍t chiah gû-káng hiàn cha̍p-hūn-saⁿ, ūi-tio̍h chı̍t chiah iûⁿ-káng hiàn cha̍p-hūn-nn̄g.

29

Ūi-tio̍h hí chhit chiah iûⁿ-á, ta̍k-chiah tio̍h hiàn cha̍p-hūn-chı̍t.

30

Koh hiàn chı̍t chiah soaⁿ-iûⁿ-káng, kā lín sio̍k-chōe.

31

Lín tio̍h hiàn chiah-ê, kap i ê kòan-tiān, tī siông-siông hiàn ê sio-chè kap i ê sò͘-chè í-gōa, lín lóng tio̍h ēng bô hâ-chhû-ê.