Chim-giân 第 12 章 - 巴克禮全羅

1

Hoaⁿ-hí siū kàu-tok--ê, chiū-sī hoaⁿ-hí chai-bat; Òan-hūn chek-pī--ê, chiū-sī cheng-siⁿ.

2

Hó-lâng beh tit-tio̍h Iâ-hô-hoa ê un-hūi; Siat khúi-kè ê lâng, I beh tēng i ê chōe.

3

Lâng bōe-ōe tùi pháiⁿ lâi kiàn-lı̍p; Gī-lâng ê kun-pún éng bōe iô-tāng.

4

Châi-tek ê hū-jîn-lâng sī tiōng-hu ê bián-liû; Sià-pāi ê hū-jîn-lâng hō͘ tiōng-hu chhin-chhiūⁿ kut hiú-nōa.

5

Gī-lâng ê liām-thâu sī kong-pêng; Pháiⁿ-lâng ê kè-bô͘ sī khúi-chà.

6

Pháiⁿ-lâng ê ōe sī tng-tán beh hāi lâng; Chèng-tı̍t ê lâng ê chhùi, beh kiù i.

7

Pháiⁿ-lâng tó-hōai kui tī bô; Gī-lâng ê ke beh khiā-chāi.

8

Lâng beh chiàu i ê tì-hūi tit-tio̍h o-ló; Sim-lāi kōai-biū--ê, beh siū biáu-sī.

9

Siū lâng khòaⁿ-khin--ê, iáu-kú ū lô͘-po̍k ê, Khah-iâⁿ ka-kī chun-tōa, iā khiàm-kheh bí-niû ê.

10

Gī-lâng koan-sim i ê cheng-siⁿ ê o̍ah-miā; Pháiⁿ-lâng ê lîn-bín iā sī chân-jím.

11

Chèng-choh i ê chhân-hn̂g ê, beh ū bí-niû kàu-gia̍h, Kau-pôe bô hē-lo̍h ê lâng sī bû-ti.

12

Pháiⁿ-lâng him-bō͘ put-gī ê lâng ê lô-bāng; Gī-lâng ê kun-thâu siⁿ-chhut ké-chí.

13

Chhùi-tûn ê kè-sit sī pháiⁿ ê lô-bāng; To̍k-to̍k gī-lâng beh thoat-lī hōan-lān.

14

Lâng in-ūi chhùi só͘ kiat ê ké-chí beh tit-tio̍h hok-khì móa-móa; Lâng chiàu i ê chhiú só͘ chòe--ê, beh tit-tio̍h pò-èng.

15

Gōng-lâng khòaⁿ ka-kī ê lō͘ chòe chèng-tı̍t; To̍k-to̍k tì-hūi ê lâng thiaⁿ lâng khó͘-khǹg.

16

Gōng-lâng ê m̄-gōan liâm-piⁿ hián-chhut; Thong-ta̍t ê lâng khǹg-ba̍t kiàn-siàu.

17

Kóng sı̍t-ōe--ê, hián-bêng kong-gī; Lām-sám kan-chèng--ê, hián-chhut khúi-khiat.

18

Kóng-ōe sò-sèng--ê, chhin-chhiūⁿ to ê chha̍k-lâng; Tì-hūi ê lâng ê chı̍h ōe i-hó lâng.

19

Sêng-sı̍t ê chhùi éng-óan kian-kò͘; Pe̍h-chha̍t ê chı̍h put-kò tiap-á-kú.

20

Tô͘-bô͘ pháiⁿ-tāi--ê, sim chûn khúi-chà; Khǹg lâng hô-hó--ê, beh tit-tio̍h hoaⁿ-hí.

21

Gī-lâng bô tú-tio̍h chai-hāi; Pháiⁿ-lâng tú-tio̍h chai-hō móa-móa.

22

Pe̍h-chha̍t ê chhùi-tûn sī Iâ-hô-hoa só͘ iàm-ò͘ⁿ; Kiâⁿ tāi-chì sêng-sı̍t--ê, sī I só͘ hoaⁿ-hí.

23

Thong-ta̍t ê lâng ún-khǹg chai-bat; Gōng-lâng ê sim hián-chhut gû-gōng;

24

Un-khûn ê lâng i ê chhiú beh chiáng-kôan; Pîn-tōaⁿ ê lâng beh chòe lâng ê khó͘-kang.

25

Lâng ê sim khòa-lū, hō͘ i lóe-chì; Chı̍t-kù hó-ōe, hō͘ i hoaⁿ-hí.

26

Gī-lâng ín-chhōa i ê chhù-piⁿ; Pháiⁿ-lâng ê lō͘ hō͘ lâng sit-bê.

27

Pîn-tōaⁿ ê lâng bô pek phah-la̍h só͘ tit-tio̍h--ê; Un-khûn ê lâng tit-tio̍h lâng pó-kùi ê châi-bu̍t.

28

Tī kong-gī ê lō͘ ū o̍ah-miā; I ê lō͘-kèng pēng bô sí-bô.