Chim-giân 第 11 章 - 巴克禮全羅

1

Khúi-chà ê thian-phêng sī Iâ-hô-hoa só͘ iàm-ò͘ⁿ; Kong-pêng ê tô-chí sī I só͘ hoaⁿ-hí.

2

Kiau-ngō͘ lâi, kiàn-siàu ia̍h lâi; Chóng-sī tì-hūi sī kap khiam-pi ê lâng saⁿ-kap tī-teh.

3

Chèng-tı̍t ê lâng, i ê chin-sı̍t beh ín-chhōa i; Kan-chà ê lâng, i ê kōai-phiah beh pāi-hōai i.

4

Tōa siū-khì ê jı̍t, chîⁿ-châi bô lī-ek; Chí-ū kong-gī ōe kiù lâng thoat-lī sí-bô.

5

Ôan-chôan ê lâng ê gī beh pho͘-pîⁿ i ê lō͘; To̍k-to̍k pháiⁿ-lâng beh in-ūi i ê pháiⁿ po̍ah-tó.

6

Chèng-tı̍t ê lâng ê gī beh chín-kiù i; Kan-chá ê lâng beh hō͘ in ê pháiⁿ lia̍h-tio̍h.

7

Pháiⁿ-lâng chı̍t-ē sí, i ê ǹg-bāng beh bô--khì; Chōe-jîn só͘ him-bō͘-ê, iā bô--khì.

8

Gī-lâng tit-tio̍h thoat-lī hōan-lān; Ū pháiⁿ-lâng chòe i ê thòe-sin.

9

Bô kèng-khiân ê lâng ēng chhùi hāi chhù-piⁿ; To̍k-to̍k gī-lâng tùi chai-bat tit-tio̍h kiù.

10

Gī-lâng heng-thong, thong-siâⁿ hoaⁿ-hí; Pháiⁿ-lâng bia̍t-bô, lâng lóng chhut hoaⁿ-hí ê siaⁿ.

11

Siâⁿ in-ūi chèng-tı̍t ê lâng ê chiok-hok chiū heng-khí; Chóng-sī in-ūi pháiⁿ-lâng ê chhùi chiū chhia-tó.

12

Biáu-sī chhù-piⁿ--ê, sī bû-ti ê lâng; Chóng-sī bêng-lí ê lâng chēng-chēng bô chòe-siaⁿ.

13

Sì-kòe kiâⁿ, kóng lâng ê tn̂g-té, lāu-siat pì-bı̍t ê sū; Sim sêng-sı̍t ê lâng khǹg-ba̍t tāi-chì.

14

Bô tì-hūi ê chí-tō, peh-sìⁿ chiū sit-pāi; Bô͘-sū chōe, chiū tit-tio̍h an-ún.

15

Kā siⁿ-hūn lâng chòe pó-jīn, beh tōa siū khek-khui; M̄-ài kā lâng tah-èng--ê, chiū tit-tio̍h an-ún.

16

Hó tek-hēng ê hū-jîn-lâng tit-tio̍h miâ-siaⁿ; Kiông-béng ê ta-po͘-lâng tit-tio̍h chîⁿ-châi.

17

Jîn-chû ê lâng lī-ek ka-kī ê sìⁿ-miā; Chân-jím ê lâng hāi ka-kī ê seng-khu.

18

Pháiⁿ-lâng keng-êng, tit-tio̍h hu-ké ê kang-chîⁿ; Iā gī ê chéng-chí--ê, tit-tio̍h sı̍t-chāi ê hāu-kó.

19

Tn̂g-tn̂g kiâⁿ-gī--ê, beh tit-tio̍h o̍ah; Tui-jip pháiⁿ-tāi--ê, beh tì-kàu sí;

20

Sim-lāi kōai-phiah--ê, sī Iâ-hô-hoa só͘ iàm-ò͘ⁿ; Kiâⁿ tāi-chì ôan-chôan--ê, sī I só͘ hoaⁿ-hí.

21

Pháiⁿ-lâng chhiú khan chhiú, tek-khak bōe bián siū hêng-ho̍at; Gī-lâng ê hō͘-è beh tit-tio̍h chín-kiù.

22

Hū-jîn-lâng súi, iā bô bêng-lí, Chhin-chhiūⁿ kim-khôan kòa tī ti ê phīⁿ.

23

Gī-lâng só͘ ì-ài--ê, lóng sī hó; Pháiⁿ-lâng só͘ ǹg-bāng--ê, kiat-kio̍k sī siū-khì.

24

Ū lâng ná the̍h-chhut, chiū ná ke-thiⁿ; Ū lâng kian-līn, chiū hóan-tńg sòng-hiong.

25

Ài siá-sì--ê, beh tit-tio̍h hong-sēng; Lūn-te̍k lâng-ê, beh tit-tio̍h lūn-te̍k.

26

Tún gō͘-kak m̄ thiò--ê, peh-sìⁿ beh chiù-chó͘ i; Kam-gōan thiò-chhut--ê, beh tit-tio̍h chiok-hok.

27

Chhut-la̍t chòe hó-ê, beh tit-tio̍h un-hūi; Choan-bū hāi lâng-ê, hāi beh kàu i ê seng-khu.

28

Óa-khò ka-kī ê chîⁿ-châi--ê, beh po̍ah-tó; Gī-lâng beh heng-ōng, chhin-chhiūⁿ chhiⁿ-chhùi ê chhiū-hio̍h.

29

Kiáu-jiáu ka-kī ê ke--ê, só͘ chiap-siū--ê sī hong; Gû-gōng ê lâng beh chòe sim-lāi tì-hūi ê lâng ê lô͘-po̍k.

30

Gī-lâng só͘ kiat ê ké-chí sī o̍ah-miā ê chhiū; Tì-hūi ê lâng tit-tio̍h lâng ê lêng-hûn.

31

Khòaⁿ ah, gī-lâng tī sè-kan siū pò-èng; Hô-hòng pháiⁿ-lâng kap ū-chōe ê lâng ah?