Chim-giân 第 10 章 - 巴克禮全羅

1

Só͘-lô-bûn ê chim-giân. Tì-hūi ê kiáⁿ hō͘ lāu-pē hoaⁿ-hí; Gû-gōng ê kiáⁿ hō͘ lāu-bú iu-būn.

2

Put-gī ê chîⁿ lóng bô lī-ek; Chú-ū kong-gī ōe kiù lâng thoat-lī sí-bô.

3

Iâ-hô-hoa bô hō͘ gī-lâng tú-tio̍h iau-gō; Pháiⁿ-lâng só͘ him-bō͘-ê, I bô hō͘ i chiâⁿ.

4

Chhiú pîn-tōaⁿ-ê, beh tú-tio̍h sòng-hiong; Chhiú kut-la̍t-ê, beh tit-tio̍h hó-gia̍h.

5

Hē-thiⁿ chek-chū-ê, sī tì-hūi ê kiáⁿ; Siu-koah ê sî ài-khùn--ê, sī sià-pāi ê kiáⁿ.

6

Hok-khì lîm-kàu gī-lâng ê thâu-khak; Kiông-pō jia-iám pháiⁿ-lâng ê chhùi.

7

Gī-lâng ê kì-liām siū o-ló; Pháiⁿ-lâng ê miâ tek-khak chhàu.

8

Sim-lāi tì-hūi-ê, beh thiaⁿ-siū bēng-lēng, Chhùi kóng gōng-ōe-ê, beh sit-pāi.

9

Kiâⁿ chèng-tı̍t lō͘--ê, kiâⁿ-ta̍h an-ún; Thàn oan-khiau lō͘--ê, beh lō͘-hiān.

10

Nih-ba̍k hōe-ì--ê, hō͘ lâng iu-būn; Chhùi kóng gōng-ōe--ê, beh sit-pāi.

11

Gī-lâng ê chhùi sī o̍ah-miā ê chúi-chôaⁿ; Kiông-pō jia-iám pháiⁿ-lâng ê chhùi.

12

Òan-hūn ōe jiá-khí saⁿ-chiⁿ; Jîn-ài ōe jia-khàm lóng-chóng ê kè-sit.

13

Tī bêng-lí ê lâng chhùi-lāi chhē-tio̍h tì-hūi; Bû-ti ê lâng ê ka-chiah ū kóaiⁿ-á piān-piān.

14

Tì-hūi ê lâng chek-chū kiàn-sek; Gōng-lâng ê chhùi beh khòai-khòai sit-pāi.

15

Hó-gia̍h lâng ê châi-bu̍t sī i kian-kò͘ ê siâⁿ; Sòng-hiong lâng ê khiàm-kheh sī i sit-pāi ê in-toaⁿ.

16

Gī-lâng ê tio̍h-bôa tì-kàu o̍ah; Pháiⁿ-lâng só͘ thàn--ê, tì-kàu ū chōe.

17

Thiaⁿ-siū khòan-kài--ê, sī kiâⁿ tī o̍ah-miā ê lō͘; Khì-sak chek-pī--ê, chiū-sī kiâⁿ bê-lō͘.

18

Khǹg-ba̍t i ê òan-hūn--ê, chhùi kóng pe̍h-chha̍t; Húi-pòng lâng--ê, sī gōng-lâng.

19

Kāu-ōe ê lâng bōe-bián ū kè-sit; Iok-sok chhùi-chı̍h--ê, sī ū tì-hūi.

20

Gī-lâng ê chı̍h, chhin-chhiūⁿ bûn-gûn; Pháiⁿ-lâng ê sim bô sím-mı̍h kà-tı̍t.

21

Gī-lâng ê chhùi pôe-ióng chōe-chōe lâng; Gōng-lâng in-ūi bû-ti lâi sí.

22

Iâ-hô-hoa ê sù-hok, hō͘ lâng hó-gia̍h; Iā bô chham iu-būn tī lāi-bīn.

23

Gû-gōng ê lâng lia̍h kiâⁿ-pháiⁿ chòe kún-chhiò; Chóng-sī bêng-lí ê lâng lia̍h tì-hūi chòe hoaⁿ-hí.

24

Pháiⁿ-lâng só͘ kiaⁿ--ê, beh lîm-kàu i; Gī-lâng só͘ ài ê, beh tit-tio̍h ún-chún.

25

Kông-hong chı̍t-ē kè, pháiⁿ-lâng kui tī bô; Gī-lâng sī éng-óan ê tōe-ki.

26

Lâng chhe pîn-tōaⁿ ê lâng, Sī chhin-chhiūⁿ chhùi-khí tú-tio̍h chhò͘, ba̍k-chiu tú-tio̍h hé-hun.

27

Kèng-ùi Iâ-hô-hoa, chiū ke-thiⁿ jı̍t-chí; Chóng-sī pháiⁿ-lâng ê nî-hè beh kiám-chió.

28

Gī-lâng ê ǹg-bāng sī hoaⁿ-hí; Pháiⁿ-lâng ê him-bō͘ sī khang-khang.

29

Iâ-hô-hoa ê lō͘ tùi-tī chèng-tı̍t ê lâng chòe ōe-só͘; Tùi-tī kiâⁿ-pháiⁿ ê lâng chòe húi-bia̍t.

30

Gī-lâng éng-óan bô î-sóa; Pháiⁿ-lâng bōe tit-tio̍h khiā-khí tī tōe-chiūⁿ.

31

Gī-lâng ê chhùi siⁿ-chhut tì-hūi; Kōai-biū ê chı̍h beh siū koah-tn̄g.

32

Gī-lâng ê chhùi-tûn chai thang hō͘ lâng hoaⁿ-hí; Pháiⁿ-lâng ê chhùi kóng kōai-biū ê ōe.