Chim-giân 第 9 章 - 巴克禮全羅

1

Tì-hūi ū khí i ê chhù, Ū phah i chhit ki thiāu.

2

Ū thâi i ê cheng-siⁿ, ū tiau-hô i ê chiú, Ū pān i ê iân-toh.

3

Chhe i ê lú-pī chhut-khì, ka-kī tī siâⁿ-lāi ke̍k-kôaiⁿ ê só͘-chāi teh kiò.

4

Kóng, Kìⁿ-nā gōng-tı̍t ê lâng, tio̍h oat lâi chia; Koh kā bû-ti ê lâng kóng,

5

Lín lâi, chia̍h góa ê piáⁿ, Lim góa tiau-hô ê chiú.

6

Lín khì-sak gû-gōng, chiū tit-tio̍h o̍ah, Iā tio̍h kiâⁿ kng-bêng ê lō͘.

7

Kui-chèng bú-bān ê lâng, ka-kī chio lêng-jio̍k, Chek-pī pháiⁿ-lâng--ê, ka-kī chhú kiàn-siàu.

8

M̄-thang chek-pī bú-bān ê lâng, kiaⁿ-liáu i òan-hūn lí; Tio̍h chek-pī tì-hūi ê lâng, i beh thiàⁿ lí.

9

Kà-sī tì-hūi ê lâng, i chiū it-hoat ū tì-hūi, Chí-sī gī-lâng, i chiū ke-thiⁿ ha̍k-būn.

10

Kèng-ùi Iâ-hô-hoa sī tì-hūi ê kun-pún, Bat hit-ūi Sèng-ê, chiū-sī chhang-miâ.

11

In-ūi tùi góa, lí ê jı̍t-chí beh khah-chōe, Lí ê nî-hè iā ná beh ke-thiⁿ.

12

Lí nā chòe tì-hūi, chiū-sī ūi-tio̍h pún-sin chòe tì-hūi; Lí nā bú-bān, chiū beh ka-kī tam-tng.

13

Gû-gōng ê hū-jîn-lâng gâu jióng; I sī gōng-tı̍t, m̄-bat pòaⁿ-hāng.

14

I chē tī i ka-kī ê mn̂g-kháu, Chē tī siâⁿ-lāi kôaiⁿ-tōe ê chō-ūi.

15

Ài kiò kè-lō͘ ê lâng, Chiū-sī tı̍t-tı̍t kiâⁿ in ê lō͘ ê lâng,

16

Kóng, Kìⁿ-nā gōng-tı̍t ê lâng tio̍h oat lâi chia; Koh kā bû-ti ê lâng kóng,

17

Thau-iúⁿ-lâi ê chúi sī tiⁿ--ê; Thau-chia̍h ê piáⁿ sī ū chu-bī-ê.

18

Chóng-sī hit-hō lâng m̄-chai tī i hia--ê sī im-hûn; I ê lâng-kheh tī im-hú chhim ê só͘-chāi.