Chim-giân 第 8 章 - 巴克禮全羅

1

Tì-hūi kiám bô teh kiò? Chhang-miâ kiám bô chhut-siaⁿ?

2

I tī lō͘-piⁿ kôaiⁿ-tōe ê téng-bīn, Tī sı̍p-jī-lō͘-kháu teh khiā.

3

Tī siâⁿ-mn̂g piⁿ, tī siâⁿ-mn̂g kháu, Tī siâⁿ chhut-jı̍p ê só͘-chāi, tōa-siaⁿ kiò kóng,

4

Chèng-lâng ah, góa kiò lín, Góa ǹg sè-kan lâng chhut-siaⁿ.

5

Kóng, Gōng-tı̍t ê lâng ah, lín tio̍h ōe hiáu-tit thong-ta̍t ê lí; Gû-gōng ê lâng ah, lín sim-lāi tio̍h bêng-pe̍k.

6

Lín tio̍h thiaⁿ, in-ūi góa beh kóng ke̍k-hó ê sū; Góa beh khui-chhùi lūn chèng-tı̍t ê sū.

7

Góa ê chhùi beh kóng-chhut chin-sı̍t; Góa ê chhùi-tûn òan-hūn pháiⁿ-tāi.

8

Góa só͘ kóng ê ōe, lóng sī kong-gī; Kî-tiong bô oan-khiau kōai-biū.

9

Che ōe bêng-lí ê lâng lóng ōe hiáu-tit, Tit-tio̍h tì-sek ê lâng lóng lia̍h-chòe chèng-tı̍t.

10

Lín tio̍h sêng-siū góa ê kà-sī, khah-hó tit-tio̍h pe̍h-gûn; Tit-tio̍h tì-sek, khah-hó tit-tio̍h n̂g-kim.

11

In-ūi tì-hūi pí âng-pó-chio̍h khah-hó; It-chhè só͘ him-bō͘--ê, lóng bōe kap i pí-tit.

12

Góa tì-hūi ēng thong-ta̍t chòe khiā-khí ê só͘-chāi; Koh chhē-tio̍h tì-sek kap kè-e̍k.

13

Kèng-ùi Iâ-hô-hoa chāi-tī òan-hūn pháiⁿ-tāi; Hit-hō kiau-ngō͘, lām-sám, kap pháiⁿ-lō͘, Í-kı̍p kōai-biū ê chhùi, lóng sī góa só͘ òan-hūn.

14

Góa ū kè-e̍k kap chin ê tì-sek; Góa chiū-sī chhang-miâ, góa ū lêng-le̍k.

15

Tè-ông tùi góa lâi chē-ūi; Jîn-kun tùi góa tiāⁿ-tio̍h kong-pêng ê hoat.

16

Ông-chhin kap kùi-cho̍k, sè-chiūⁿ it-chhè ê sím-phòaⁿ-si, Lóng sī tùi góa lâi chiáng-kôan.

17

Thiàⁿ góa--ê, góa iā thiàⁿ i; Khún-chhiat chhē góa--ê, beh chhē-tio̍h.

18

Hó-gia̍h chun-kùi chāi-tī góa, Kú-tn̂g ê pù-ū kap kong-gī iā chāi-tī góa.

19

Góa ê ké-chí khah-hó n̂g-kim, iâⁿ-kè hó-kim; Góa ê chhut-sek iâⁿ-kè bûn-gûn.

20

Góa kiâⁿ tī kong-gī ê lō͘; Kiâⁿ tī kong-pêng chiah ê lō͘-tiong.

21

Hō͘ thiàⁿ góa ê lâng sêng-siū hè-châi; Iā chhiong-móa in ê hú-khò͘.

22

Tī Iâ-hô-hoa chō-hòa ê khí-thâu, Tī ke̍k khí-thâu chhòng-chō ê tāi-seng, góa sī I só͘ ū.

23

Tùi éng-óan, tùi ke̍k khí-thâu, Bē ū sè-kài ê tāi-seng, góa í-keng siū siat-lı̍p.

24

Bē ū chhim-ian, bē ū chōe-chōe chúi ê chúi-chôaⁿ, Í-keng siⁿ góa.

25

Tōa-soaⁿ bē tiāⁿ-tio̍h, sió-soaⁿ bē ū ê tāi-seng, Í-keng siⁿ góa.

26

Iâ-hô-hoa iáu-bē chhòng-chō tōa-tōe kap chhân-iá, Í-kı̍p tōe-chiūⁿ thô͘-hún ê gôan-chit.

27

I kiàn-lı̍p chiah ê thiⁿ; Siat îⁿ-khôan tī chhim-ian ê téng-bīn;

28

Téng-bīn an-tì kiong-chhong; Kian-kò͘ chhim-ian ê chúi-chôaⁿ;

29

Kā hái tiāⁿ-tio̍h kài-hān; Hō͘ chúi bô pôaⁿ-kè I ê bēng-lēng; Tiāⁿ-tio̍h tōa-tōe ê kun-ki, góa kap I tī-teh.

30

Hit-sî góa tī-hia chòe sai-hū-thâu; Jı̍t-jı̍t hō͘ I hoaⁿ-hí, Siông-siông tī I bīn-chêng khòai-lo̍k;

31

Tī thang khiā-khí ê tōe khòai-lo̍k; Iā kap sè-kan lâng saⁿ-kap hoaⁿ-hí.

32

Lín chiah ê kiáⁿ, taⁿ tio̍h thiaⁿ-thàn góa; In-ūi chip-siú góa ê tō-lō͘--ê, chiū ū hok-khì.

33

Tio̍h thiaⁿ kà-sī, chiū tit-tio̍h tì-hūi, M̄-thang khì-cho̍at i.

34

Thiaⁿ-thàn góa, jı̍t-jı̍t tī góa ê mn̂g-kháu teh tán, Tī góa ê mn̂g-khiā-piⁿ thèng-hāu ê, Hit-hō lâng ū hok-khì.

35

In-ūi chhē-tio̍h góa--ê, chiū chhē-tio̍h o̍ah-miā; Iā beh tùi Iâ-hô-hoa tit-tio̍h un-hūi.

36

Tek-chōe góa--ê, sī hāi ka-kī ê sìⁿ-miā; Òan-hūn góa--ê, lóng sī ka-kī chhú sí.