Chim-giân 第 7 章 - 巴克禮全羅

1

Góa ê kiáⁿ, lí tio̍h pó-siú góa ê ōe, Sim-lāi khǹg góa ê bēng-lēng.

2

Pó-siú góa ê bēng-lēng chiū tit-tio̍h o̍ah; Pó-siú góa ê kà-sī, chhin-chhiūⁿ pó-siú ba̍k-chiu-jîn.

3

Pa̍k tī lí ê chńg-thâu-á, Khek tī lí ê sim-pi.

4

Tio̍h tùi tì-hūi kóng, Lí sī góa ê chí-bē, Tio̍h kiò chhang-miâ chòe lí ê chhin-lâng.

5

I ōe pó-hō͘ lí siám-pī îm-hū, Siám-pī kóng thiám-mī ōe ê kī-lú.

6

Góa bat khiā tī góa ê chhù ê thang-á, Tùi góa ê thang-á-chí khòaⁿ-chhut-khì.

7

Khòaⁿ-kìⁿ gû-gōng lâng ê lāi-bīn, hāu-siⁿ-ke ê tiong-kan, Bêng-bêng khòaⁿ-kìⁿ ū chı̍t-ê bû-ti ê siàu-liân lâng,

8

Tùi koe-lō͘ keng-kè, kūn îm-hū ê chhù-kak, Kiâⁿ hit-tiâu thàu-kàu i ê chhù ê lō͘;

9

Tī hông-hun, tī ê-hng, Tī mî--sî ê o͘-àm.

10

Khòaⁿ ah, ū chı̍t ê hū-jîn-lâng tú-tio̍h i, Sī kī-lú ê táⁿ-pān, ū káu-kòai ê sim-su.

11

Chit ê hū-jîn-lâng gâu-jióng, bô siū iok-sok; I ê kha bô tòa chhù.

12

Ū-sî tī koe-lō͘--nih, ū-sî tī khui-khoah ê só͘-chāi; Ū-sî tī ta̍k ê hāng-kháu teh tng-tán.

13

Khîⁿ hit ê siàu-liân lâng, kap i chim-chhùi; Bô kiàn-siàu ê bīn-sek, tùi i kóng,

14

Góa chia ū pêng-an-chè; Kin-á-jı̍t ū siā góa ê gōan.

15

Só͘-í góa chhut-lâi ngiâ-chih lí, Khún-chhiat chhē-kìⁿ lí ê bīn, tú-hó tú-tio̍h lí.

16

Góa í-keng ēng siù-hoe ê thán-á, Kap Ai-kı̍p ê sòaⁿ só͘ chit ū hoe-chōa ê pò͘, chhu tī góa ê bîn-chhn̂g.

17

Góa koh ēng bu̍t-io̍h, tîm-hiuⁿ, jio̍k-kùi, Hiù góa ê chhn̂g.

18

Lâi ah, lán thang hióng-siū ài-chêng kàu móa-ì, tı̍t-kàu thiⁿ-kng, Lán thang saⁿ-kap lôan-ài khòai-lo̍k.

19

In-ūi ta-po͘-lâng bô tī chhù--nih, Chhut-khì kiâⁿ hn̄g-lō͘.

20

I chhiú tòa gûn-tē; Kàu ge̍h-îⁿ chiah tò-lâi.

21

Îm-hū ēng chōe-chōe kî-khiáu ê ōe ín-iú i, Ēng thiám-mī ê chhùi pek i saⁿ-kap khì.

22

I liâm-piⁿ tè i khì, Chhin-chhiūⁿ gû khan khì thâi; Koh chhin-chhiūⁿ gōng-lâng tòa só-liān, khì siū hêng-ho̍at.

23

Kàu chìⁿ siā-jı̍p i ê koaⁿ, Chhin-chhiūⁿ chiáu-á kín-kín jı̍p lô-bāng, Iā m̄-chai che sī koan-hē i ê sìⁿ-miā.

24

Chiah ê kiáⁿ ah, taⁿ tio̍h thiaⁿ-thàn góa. Liû-sim thiaⁿ góa só͘ kóng ê ōe.

25

Lí ê sim m̄-thang ì-hiòng i ê lō͘, M̄-thang bê tī i ê lō͘.

26

In-ūi i hō͘ chōe-chōe lâng siū-siong tó--lo̍h-khì; Koh chin-chōe lâng hō͘ i thâi-sí.

27

I ê chhù sī chòe im-hú ê lō͘, Chhōa kàu sí-bô ê chhù-the̍h.