Chim-giân 第 6 章 - 巴克禮全羅

1

Góa ê kiáⁿ, lí nā ūi-tio̍h chhù-piⁿ chòe tiong-pó, Thòe gōa-lâng tah-èng;

2

Lí chiū hō͘ chhùi-lāi ê ōe tauh--tio̍h, Hō͘ chhùi-lāi ê ōe khîⁿ--tio̍h.

3

Góa ê kiáⁿ, lí kì-jiân lo̍h tī chhù-piⁿ ê chhiú-tiong, Taⁿ tio̍h án-ni kiâⁿ, lâi kiù ka-kī. Lí tio̍h khiam-pi khì khún-kiû lí ê chhù-piⁿ.

4

M̄-thang hō͘ lí ê ba̍k-chiu khùn--khì, M̄-thang hō͘ lí ê ba̍k-chiu-phê pàng-khoeh.

5

Tio̍h kiù ka-kī, chhin-chhiūⁿ lo̍k thoat-lī phah-la̍h ê lâng ê chhiú; Chhin-chhiūⁿ chiáu thoat-lī lia̍h chiáu-á ê lâng ê chhiú.

6

Pîn-tōaⁿ ê lâng ah, lí tio̍h khì khòaⁿ káu-hiā, Siūⁿ i ê kiâⁿ-chòe, thang tit-tio̍h tì-hūi.

7

I bô thâu-ba̍k, Bô kam(**kàm)-tok, bô sī-tōa,

8

Iáu-kú tī hē-thiⁿ pī-pān i ê chia̍h-mı̍h, Tī siu-koah ê sî chek-chū i ê bí-niû.

9

Pîn-tōaⁿ lâng ah, lí beh khùn kàu tī-sî ah? Lí sím-mı̍h sî khùn-chhíⁿ khí-lâi ah?

10

Koh khùn tiap-á-kú, koh bîn tiap-á-kú, Sok-chhiú the tiap-á-kú;

11

Lí ê sòng-hiong beh chhin-chhiūⁿ chha̍t lâi; Lí ê khiàm-kheh chhin-chhiūⁿ chhēng chiàn-kah--ê lâi.

12

Bô hē-lo̍h ê pháiⁿ-lâng, Kiâⁿ-chòe chiū ēng kōai-biū ê chhùi,

13

Nih-ba̍k hōe-ì, ēng kha pí ì-sù, Ēng chńg-thâu-á chí-tiám.

14

Sim-lāi kōai-phiah, siông-siông kè-bô͘ pháiⁿ-sū; Sì-kòe so-lōng oan-ke.

15

Só͘-í i ê chai-ē hut-jiân lîm-kàu; I beh hut-jiân pāi-hōai, bô hoat thang i-tī.

16

Ū la̍k-hāng sī Iâ-hô-hoa só͘ òan-hūn, Liân I ê sim só͘ iàm-ò͘ⁿ--ê, ū chhit-hāng;

17

Chiū-sī kiau-ngō͘ ê ba̍k-chiu, kóng pe̍h-chha̍t ê chı̍h, Chhiú thâi bô-chōe ê lâng;

18

Sim tô͘-bô͘ pháiⁿ-sū, Kha kín-kín kiâⁿ hām-hāi;

19

Kóng pe̍h-chha̍t ê ké kan-chèng, Tī hiaⁿ-tī tiong so-lōng oan-ke ê lâng.

20

Góa ê kiáⁿ, tio̍h chip-siú lí ê lāu-pē ê bēng-lēng, M̄-thang khì-sak lí ê lāu-bú ê kà-sī.

21

Tio̍h siông-siông kì-tiâu tī lí ê sim, Kòa tī lí ê ām-kún.

22

Lí kiâⁿ-lō͘ ê sî chiū ín-chhōa lí; Lí khùn ê sî chiū pó-siú lí; Lí khùn-chhíⁿ chiū kap lí tâm-lūn.

23

In-ūi bēng-lēng sī teng, kà-sī sī kng; Chiàu-hoat ê chek-pī sī o̍ah-miā ê lō͘;

24

Ōe pó-siú lí bô chhin-kūn pháiⁿ ê hū-jîn-lâng, Bô thiaⁿ kī-lú thiám-mī ê ōe.

25

Lí ê sim-lāi m̄-thang lôan-bō͘ i ê súi-sek; Iā m̄-thang hō͘ i ê ba̍k-chiu-phê ín-iú.

26

In-ūi kī-lú ōe hō͘ lâng chí-ū chhun chı̍t-tè-piáⁿ; Îm-hū ōe chhiúⁿ-to̍at lâng pó-kùi ê o̍ah-miā.

27

Lâng kiám ōe phō hé tī heng-chêng, I ê saⁿ ia̍h bô to̍h--khì mah?

28

Lâng kiám ōe ta̍h tī jia̍t ê hé-thòaⁿ, I ê kha ia̍h bô sio--tio̍h mah?

29

Chhin-kūn chhù-piⁿ ê bó͘--ê, ia̍h sī án-ni; Kìⁿ-nā bong i ê, bōe bián-tit siū-chōe.

30

Chha̍t in-ūi iau thau-the̍h mı̍h lâi chí-ki, Lâng bô khòaⁿ-khin i.

31

Siat-sú hō͘ lâng lia̍h-tio̍h, tio̍h pê chhit-pē; Tio̍h chiong ke-lāi só͘-ū--ê, lóng hō͘ lâng.

32

Kap lâng ê bó͘ kiâⁿ-îm--ê, chiū-sī bô tì-sek; Kiâⁿ chit ê sū--ê, beh sún-hāi ka-kī ê sìⁿ-miā.

33

I beh siū siong-hāi kap lêng-jio̍k; I ê kiàn-siàu bōe-ōe sóe-tû.

34

In-ūi tò͘-khī chiū-sī lâng ê tōa siū-khì; Pò-siû ê sî tek-khak bô khoan-iông.

35

Ēng gûn sio̍k-chōe, i iā m̄-tı̍h; Lí sui-jiân sàng chōe-chōe lé-mı̍h, i iā m̄ pàng lí soah.