Chim-giân 第 18 章 - 巴克禮全羅

1

Ka-kī hun-piat-ê sī kiû i só͘ ì-ài, Koh thòng-hūn it-chhè chin ê tì-hūi.

2

Gōng-lâng bô hoaⁿ-hí bêng-lí, To̍k-to̍k ài hián-bêng i ê sim-ì.

3

Pháiⁿ-lâng lâi, biáu-sī iā tè i lâi; Kiàn-siàu kàu, lêng-jio̍k kap i kàu.

4

Lâng chhùi-lāi ê ōe chhin-chhiūⁿ chhim ê chúi, Tì-hūi ê chúi-chôaⁿ chhin-chhiūⁿ teh lâu ê khoe-chúi.

5

Thé-thiap pháiⁿ-lâng ê chêng-biān, Phòaⁿ-tòan lâi oan-óng gī-lâng, lóng sī m̄-hó.

6

Gōng-lâng khui-chhùi chiū khí oan-ke, I ê chhùi sī kiò lâng phah.

7

Gōng-lâng ê chhùi sī i ê pāi-bô, I ê chhùi-tûn sī i ê lêng-hûn ê lô-bāng.

8

O̍h-ōe ê lâng ê giân-gú chhin-chhiūⁿ hó-chia̍h ê mı̍h, Chhim jı̍p lâng ê pak-lāi.

9

Chòe-kang sǹg-hēng ê, Kap chân-hāi-ê chòe hiaⁿ-tī.

10

Iâ-hô-hoa ê miâ sī kian-kò͘ ê tâi, Gī ê lâng cháu--jı̍p-khì, chiū tit-tio̍h an-ún.

11

Hó-gia̍h lâng ê châi-bu̍t sī i kian-kò͘ ê siâⁿ, Chiàu i phah-sǹg sī chhin-chhiūⁿ kôaiⁿ ê chhiûⁿ.

12

Pāi-hōai ê tāi-seng lâng ê sim sī kiau-ngō͘, Chun-kùi ê thâu-chêng sī khiam-pi.

13

Bē thiaⁿ ê tāi-seng chiū ìn, Chiū-sī i ê gōng kap lêng-jio̍k.

14

Lâng ê sim-sîn ōe jím-siū i ê pīⁿ-thiàⁿ; Sim-sîn siū-siong, chī-chūi ōe tng-tit-khí ah?

15

Chhong-bêng ê lâng ê sim tit-tio̍h chai-bat, Tì-hūi lâng ê hī-khang kiû chai-bat.

16

Lé-mı̍h sī thòe lâng khui lō͘, Chhōa i kàu tāi-jîn ê bīn-chêng.

17

Tāi-seng piān-lūn-ê chhin-chhiūⁿ ū gī-lí, To̍k-to̍k chhù-piⁿ lâi chiū cha-chhat i.

18

Thiu-chhiam ōe hō͘ oan-ke soah, Iā ōe pâi-kái tī ū sè-le̍k ê lâng ê tiong-kan.

19

Siū khek-khui ê hiaⁿ-tī beh tit-tio̍h i koh hô, pí chhú kian-kò͘ ê siâⁿ khah-oh; Chit-hō ê saⁿ-chiⁿ chhin-chhiūⁿ iâⁿ-chē ê mn̂g-kông.

20

Lâng kóng-ōe ê hāu-kó ōe hō͘ i ê pak-tó͘ chhiong-móa, I ê chhùi-tûn só͘ chhut ê, beh hō͘ i pá-chiok.

21

Siⁿ-sí ê kôan chāi-tī chhùi-chı̍h; Thiàⁿ-i--ê beh chia̍h i ê ké-chí.

22

Tit-tio̍h bó͘ ê chiū-sī tit-tio̍h hok-khì, Iā sī tit-tio̍h Iâ-hô-hoa ê un-hūi.

23

Sòng-hiong lâng khún-chhiat lâi kiû, Hó-gia̍h lâng pháiⁿ siaⁿ-sàu lâi ìn.

24

Chōe-chōe pêng-iú ê, ka-kī chhú pāi-bô, Ū chı̍t ê ti-kí-ê pí hiaⁿ-tī khah chhin.