Chim-giân 第 19 章 - 巴克禮全羅

1

Sòng-hiong lâi kiâⁿ chèng-tı̍t ê, Iâⁿ-kè kóng kōai-biū koh gû-gōng ê.

2

Sim bô chai-bat sī m̄-hó; Kha kín cháu ê, bōe bián-tit hōan-chōe.

3

Lâng in-ūi gû-gōng lâi pāi-hōai i ê lō͘, I ê sim chiū khì-hiâm Siōng-tè.

4

Hó-gia̍h chiū ke-thiⁿ chōe-chōe pêng-iú, Sòng-hiong chiū pêng-iú kap i lī-pia̍t.

5

Lām-sám kan-chèng ê lâng bōe bián-tit siū hêng-ho̍at; Kóng pe̍h-chha̍t bōe-ōe tô-thoat hêng-ho̍at.

6

Tōa-liōng ê lâng chōe-chōe lâng tùi i kiû un; Sàng-mı̍h-ê, lâng-lâng chòe i ê pêng-iú.

7

Sòng-hiong lâng i ê hiaⁿ-tī lóng òan-hūn i, Hô-hòng i ê pêng-iú koh khah lī-khui i; Jip beh kap in kóng-ōe, in í-keng bô tī-teh.

8

Tit-tio̍h tì-hūi ê, thiàⁿ-sioh i ê lêng-hûn, Pó-siú bêng-lí ê, beh tit-tio̍h hok-khì.

9

Lām-sám kan-chèng ê, bōe bián-tit siū hêng-ho̍at; Kóng pe̍h-chha̍t ê, beh tú-tio̍h bia̍t-bô.

10

Gōng-lâng hióng-siū iàn-lo̍k, sī bô ha̍p-gî; Hô-hòng lô͘-po̍k kóan-hat kùi-cho̍k ah?

11

Lâng ū kiàn-sek chiū bô khòai-khòai siū-khì; Sià-bián lâng ê kè-sit chiū-sī i ê êng-kng.

12

Ông ê tōa siū-khì chhin-chhiūⁿ sai hm̄-hm̄-háu; I ê un-tián chhin-chhiūⁿ chháu-téng ê lō͘-chúi.

13

Gōng ê kiáⁿ sī lāu-pē ê chai-ē; Bó͘ ê chháu-nāu chhin-chhiūⁿ hō͘-chúi chha̍uh-chha̍uh tih.

14

Chhù-the̍h châi-sán sī chó͘-kong só͘ lâu ê, To̍k-to̍k gâu ê bó͘ sī Iâ-hô-hoa só͘ sù ê.

15

Lán-tō hō͘ lâng khùn tāng-bîn, Pîn-tōaⁿ ê lâng beh tú-tio̍h iau-gō.

16

Siú kài-bēng ê, sī siú lêng-hûn, Bô sòe-jī i ê só͘ kiâⁿ ê, beh tì-kàu sí-bô.

17

Lîn-bín sòng-hiong lâng ê, chiū-sī chioh hō͘ Iâ-hô-hoa; I beh chiàu i só͘ kiâⁿ ê hó-sū lâi hêng i.

18

Thàn iáu ū ǹg-bāng, tio̍h kàu-tok lí ê kiáⁿ, Lí m̄-thang ū ì-sù beh hō͘ i sí.

19

Tōa siū-khì ê lâng tek-khak tio̍h siū hêng-ho̍at, Lí nā kiù i tio̍h koh ke chı̍t pái.

20

Lí tio̍h thiaⁿ khó͘-khǹg siū kà-sī, Hō͘ lí kàu-bé ū tì-hūi.

21

Lâng sim-lāi ū chōe-chōe kè-bô͘, To̍k-to̍k Iâ-hô-hoa ê chí-ì chiah ōe ún-tàng.

22

Lâng só͘ ì-ài sī i jîn-chû ê liōng, Sòng-hiong lâng pí kóng pe̍h-chha̍t khah-hó.

23

Kèng-ùi Iâ-hô-hoa chiū ōe tit-tio̍h o̍ah-miā; I beh an-ku pá-chiok bô tú-tio̍h chai-ē.

24

Pîn-tōaⁿ ê lâng chhun-chhiú tī pôaⁿ--nih, Iā m̄-khéng the̍h kàu chhùi.

25

Phah bú-bān ê lâng, gōng-tı̍t-ê beh chhíⁿ-ngō͘; Chek-pī bêng-lí ê lâng, i chiū khah chai-bat.

26

Pháiⁿ khóan-thāi lāu-pē kek-tio̍k lāu-bú ê, Sī sià-pāi tì-kàu lêng-jio̍k ê kiáⁿ.

27

Góa ê kiáⁿ ah, lâng nā kà-sī lí khì-sak tì-sek ê ōe, Lí koat-tòan m̄-thang thiaⁿ.

28

Chòe bô-iáⁿ-chiah ê kan-chèng hì-lāng kong-pêng, Pháiⁿ-lâng thun-lo̍h chōe-ok.

29

Hêng-ho̍at sī ūi-tio̍h bú-bān ê lâng siat; Piⁿ-phah iā sī ūi-tio̍h gōng-lâng ê ka-chiah.