Chim-giân 第 21 章 - 巴克禮全羅

1

Ông ê sim tī Iâ-hô-hoa ê chhiú-tiong; Chhin-chhiūⁿ chúi-kau, chiàu I ê só͘ ài phòa hō͘ i lâu.

2

Lâng ê só͘ kiâⁿ ka-kī khòaⁿ-chòe chèng-tı̍t, To̍k-to̍k Iâ-hô-hoa chhek-to̍k lâng ê sim.

3

Kiâⁿ-gī péng-kong, Sī pí hiàn-chè koh khah tit-tio̍h Iâ-hô-hoa chiap-la̍p.

4

Ba̍k kôaiⁿ sim kiau, Í-kı̍p pháiⁿ-lâng ê teng lóng sī chōe.

5

Un-khûn kè-e̍k-ê tit-tio̍h chhiong-sēng; To̍k-to̍k sò-sèng--ê ōe tì-kàu khiàm-kheh.

6

Ēng khúi-chà ê chı̍h lâi tit-tio̍h chîⁿ ê, Sī chhin-chhiūⁿ chhe-lâi chhe-khì ê phû-hûn, ka-kī chhú sí.

7

Pháiⁿ-lâng ê kiông-pō beh sàu-tû ka-kī; In-ūi in m̄-khéng kiâⁿ kong-pêng.

8

Tîm-le̍k tī chōe-ok ê, i ê lō͘ sī chin oan-oat; Chóng-sī chheng-kiat ê lâng, i ê só͘ kiâⁿ sī chèng-tı̍t.

9

Lêng-khó͘ tiàm tī chhù-téng ê kak-thâu, Bo̍h-tit kap chháu-nāu ê hū-jîn-lâng saⁿ-kap tòa tī khoan-khoah ê chhù.

10

Pháiⁿ-lâng ê sim ài lâng pháiⁿ; I ê ba̍k-chiu pēng bô khó-lîn i ê chhù-piⁿ.

11

Bú-bān ê lâng siū hêng-ho̍at, gōng-tı̍t ê lâng chiū tit-tio̍h tì-hūi; Tì-hūi ê lâng siū kà-sī, chiū tit-tio̍h chai-bat.

12

Gī-lâng chhún-to̍k pháiⁿ-lâng ê ke, Chai pháiⁿ-lâng ōe chhia-tó kàu bia̍t-bô.

13

That-ba̍t hī-khang m̄-thiaⁿ sòng-hiong lâng ai-kiû ê, I chiong-lâi kiû-kiò iā bô tit-tio̍h thiaⁿ.

14

Àm-chīⁿ sàng mı̍h at-chí siū-khì; Heng-chêng ê lé-mı̍h ōe soah tōa siū-khì.

15

Péng-kong kiâⁿ-gī tùi hó-lâng chòe hoaⁿ-hí; Tùi tī pháiⁿ-lâng chòe pāi-hōai.

16

Lī-khui bêng-lí ê lō͘ ê, Hit ê lâng tiàm tī im-hûn ê hōe-tiong.

17

Ài chhia-chhí-ê beh tì-kàu sòng-hiong; Hò͘ⁿ chiú kap iû-ê bōe-ōe hó-gia̍h.

18

Pháiⁿ-lâng chòe gī-lâng sio̍k-hôe ê kè-chîⁿ; Kan-chà ê lâng chòe chèng-tı̍t lâng ê thòe-sin.

19

Lêng-khó͘ tiàm tī khòng-iá, M̄-thang kap chháu-nāu kāu-khôe ê hū-jîn-lâng saⁿ-kap tòa.

20

Tì-hūi ê lâng chhù-lāi ū kùi-khì ê pó-mı̍h kap iû; Gōng-lâng chiū sńg-liáu-liáu.

21

Tui-chhē kong-gī kap jîn-chû ê, Chiū chhē-tio̍h o̍ah-miā kap kong-gī kap êng-hián.

22

Tì-hūi ê lâng peh-chiūⁿ ióng-sū ê siâⁿ, Pāi-hōai i só͘ óa-khò ê sè-le̍k.

23

Pó-siú i ê chhùi kap chı̍h ê, Chiū pó-siú i ê sîn-hûn bián siū chai-hāi.

24

Kiau-ngō͘ chū-ko ê lâng miâ kiò bú-bān, I ēng kiau-ngō͘ chhiong-kông chòe tāi-chì.

25

Pîn-tōaⁿ ê lâng beh tùi tham-io̍k lâi sí; In-ūi i ê chhiú m̄-khéng chòe kang.

26

Ū lâng thong-jı̍t tham-io̍k put-ti-chiok; Nā-sī gī ê lâng siá-sì(**si), lóng bô kian-līn.

27

Pháiⁿ-lâng ê chè-hiàn sī khó-ò͘ⁿ ê; Hô-hòng i chûn pháiⁿ ì-sù lâi hiàn ah?

28

Lām-sám kan-chèng ê lâng beh bia̍t-bô; To̍k-to̍k chhin-hī thiaⁿ lâi kóng-ê, bô lâng ōe piān-tó i.

29

Pháiⁿ-lâng bīn-phê kāu; Nā-sī chèng-tı̍t ê lâng kín-sīn i ê só͘-kiâⁿ.

30

Bô hit-hō tì-hūi chhang-miâ kè-e̍k, Thang tí-te̍k Iâ-hô-hoa.

31

Bé sī ūi-tio̍h kau-chiàn ê jı̍t lâi pī-pān--ê; Chóng-sī tek-sèng sī tùi Iâ-hô-hoa.