Chim-giân 第 22 章 - 巴克禮全羅

1

Hó miâ-siaⁿ khah iâⁿ-kè tōa hoat-châi; Un-hūi khah-hó kim-gûn.

2

Hó-gia̍h sòng-hiong saⁿ óng-lâi; Lóng sī Iâ-hô-hoa só͘ chhòng-chō.

3

Thong-ta̍t ê lâng khòaⁿ-kìⁿ chai-ē chiū siám-bih; Gōng-tı̍t ê lâng chìn-chêng khì siū chai-hāi.

4

Khiam-pi kèng-ùi Iâ-hô-hoa ê pò-siúⁿ, Chiū-sī hó-gia̍h, chun-kùi, o̍ah-miā.

5

Kōai-phiah ê lâng ê lō͘, ū chhì-phè kap lô-bāng; Pó-siú i ê lêng-hûn--ê, chiū lī-khui i hn̄g-hn̄g.

6

Kàu-ióng gín-ná tio̍h ēng ha̍p-gî ê hoat, Chiū i kàu-lāu iā bô oai-chho̍ah.

7

Hó-gia̍h--ê kóan-hat sòng-hiong lâng; Khiàm-chè-ê chòe chè-chú ê chhe-ēng.

8

Chai-chèng chōe-ok--ê, beh siu chai-ē; I siū-khì ê kóaiⁿ beh hòe-tû.

9

Hó-sim ê lâng beh tit-tio̍h hok-khì; In-ūi chiong i ê bí-niû pun hō͘ sòng-hiong lâng.

10

Kóaⁿ-chhut bú-bān ê lâng chiū bô saⁿ-chiⁿ; Oan-ke kap lêng-jio̍k iā beh soah.

11

Ài chheng-khì sim-koaⁿ ê lâng, In-ūi i kóng un-tián ê ōe, ông beh chòe i ê pêng-iú.

12

Iâ-hô-hoa ê ba̍k-chiu khòaⁿ-kò͘ chhang-miâ ê lâng; Chóng-sī I pāi-hōai kóng kan-chà ê lâng ê giân-gú.

13

Pîn-tōaⁿ ê lâng kóng, Ū sai tī gōa-bīn, Góa tī koe-lō͘--nih beh siū hāi-sí.

14

Îm-hū ê chhùi sī chhim-khiⁿ; Iâ-hô-hoa só͘ iàm-ò͘ⁿ--ê beh po̍ah-lo̍h tī hí lāi-bīn.

15

Gû-gōng pa̍k-tîⁿ tī gín-ná ê sim-lāi; Nā-sī kàu-tok ê kóaiⁿ-á kóaⁿ i lī-khui hn̄g-hn̄g.

16

Khi-hū sòng-hiong lâng, lâi lī-ek ka-kī, Koh sàng lé-mı̍h hō͘ hó-gia̍h lâng-ê, lóng tì-kàu khiàm-kheh.

17

Lí tio̍h àⁿ hī-khang thiaⁿ tì-hūi ê lâng ê ōe; choan-sim tī góa ê chai-bat.

18

Nā chûn tī lí ê sim, tiàu tī lí ê chhùi-tûn, Che chiū-sī hó.

19

Góa kin-á-jı̍t tiâu-tî ēng che chí-sī lí, Ūi-tio̍h beh hō͘ lí óa-khò Iâ-hô-hoa.

20

Kè-e̍k kap chai-bat ê hó-sū, Góa kiám bô siá hō͘ lí mah?

21

Hō͘ lí chai chin-lí ê ōe ê khak-sı̍t; Hō͘ lí thang ēng chin ê ōe hê-hok chhe lí ê.

22

M̄-thang chhiúⁿ-kiap sòng-hiong lâng ê mı̍h, in-ūi i sòng-hiong; Iā m̄-thang tī siâⁿ-mn̂g-kháu khi-hū khùn-khó͘ ê lâng.

23

In-ūi Iâ-hô-hoa beh thòe i sin-oan; Chhiúⁿ-to̍at in ê, Iâ-hô-hoa beh chhiúⁿ-to̍at hiah ê lâng ê sìⁿ-miā.

24

Khòai siū-khì ê lâng, m̄-thang kap i kau-pôe; Tōa siū-khì ê lâng, bo̍h-tit kap i óng-lâi.

25

Kiaⁿ-liáu lí o̍h i ê só͘-kiâⁿ, Ka-kī hām-lo̍h tī lô-bāng.

26

Lí m̄-thang chòe hit-hō kā lâng tah-èng ê, Á-sī kā khiàm-chîⁿ-ê chòe pó-jīn.

27

Lí nā bô thang hêng, Kiaⁿ-liáu lâng ōe lâi giâ lí teh khùn ê bîn-chhn̂g.

28

Chá-sî lí ê chó͘-kong só͘ lı̍p ê tōe-kài, Lí m̄-thang chhian-sóa.

29

Lí ū khòaⁿ-kìⁿ lâng un-khûn pān tāi-chì ê bô? i beh khiā tī ông ê bīn-chêng, Bô beh khiā tī hā-chiān ê lâng ê bīn-chêng.