Chim-giân 第 23 章 - 巴克禮全羅

1

Lí nā kap koaⁿ-tiúⁿ chē-toh, Tio̍h chù-ì hit-ê tī lí bīn-chêng ê;

2

Lí nā sī tham-chia̍h ê lâng, Chiū tio̍h ēng to hē tī nâ-âu.

3

M̄-thang tham i ê hó chia̍h-mı̍h; In-ūi sī phiàn-lâng ê chia̍h-mı̍h.

4

M̄-thang thoa-bôa lâi kiû hó-gia̍h; M̄-thang óa-khò ka-kī ê chhang-miâ.

5

Lí kiám beh chù-ba̍k tī hit ê khang-hu--ê mah? In-ūi chîⁿ-châi ka-kī beh hoat-sı̍t, chhin-chhiūⁿ eng-chiáu pe chiūⁿ thiⁿ.

6

M̄-thang chia̍h kian-līn ê lâng ê pn̄g, Iā m̄-thang tham i ê hó chu-bī.

7

In-ūi i ê sim án-ni siūⁿ, i chòe lâng iā án-ni; I sui-jiân tùi lí kóng, Chhiáⁿ chia̍h, chhiáⁿ lim, Chóng-sī i ê sim bô ì-hiòng lí.

8

Chiū lí só͘ chia̍h hit-tiám-á beh thò͘--chhut-lâi; Só͘ kóng ê hó-ōe kui tī khang-khang.

9

M̄-thang kóng-ōe hō͘ gōng-lâng thiaⁿ, In-ūi i beh khòaⁿ-khin lí tì-hūi ê ōe.

10

M̄-thang î-sóa chá-sî só͘ lı̍p ê tōe-kài, Iā m̄-thang chhim-jı̍p bô-pē ê kiáⁿ ê chhân-tōe.

11

In-ūi sio̍k-hôe in-ê, ū tōa kôan-lêng, I beh tùi lí lâi sin in ê oan.

12

Tio̍h choan-sim ǹg tī kà-sī, Àⁿ hī-khang tī tì-hūi ê ōe.

13

Gín-ná m̄-thang bô kàu-tok; Lí ēng chhê phah i bōe tì-kàu sí.

14

Lí ēng chhê phah i, Chiū thang kiù i ê lêng-hûn bián lo̍h im-hú.

15

Góa ê kiáⁿ, lí ê sim nā ū tì-hūi, Góa ê sim tek-khak chin hoaⁿ-hí.

16

Lí ê chhùi nā kóng chèng-tı̍t, Góa ê sim-tn̂g iā beh khòai-lo̍k.

17

Lí m̄-thang him-sōan pháiⁿ-lâng, to̍k-to̍k tio̍h thong-jı̍t kèng-ùi Iâ-hô-hoa.

18

In-ūi iáu ū chiong-lâi ê pò-èng, Lí ê ǹg-bāng iā bōe-ōe tōan-cho̍at.

19

Góa ê kiáⁿ, lí tio̍h thiaⁿ, tio̍h ū tì-hūi; Koh ín-chhōa lí ê sim tī chèng-tı̍t ê lō͘.

20

Hò͘ⁿ lim-chiú ê, tham-chia̍h bah ê, Lí m̄-thang kap i óng-lâi, kiat-kau á chòe-tīn.

21

In-ūi hò͘ⁿ-chiú tham-chia̍h-ê, beh tì-kàu sòng-hiong; Ài khùn-ê beh tì-kàu chhēng phòa-saⁿ.

22

Lí tio̍h thiaⁿ-thàn siⁿ lí ê lāu-pē; Lí ê lāu-bú lāu ê sî, iā m̄-thang khòaⁿ-khin i.

23

Tio̍h bóe chin-lí, m̄-thang bōe-chhut; Tì-hūi, kà-sī, kap bêng-lí, iā tio̍h án-ni.

24

Gī-lâng ê lāu-pē beh tōa khòai-lo̍k; Lâng siⁿ-tio̍h tì-hūi ê kiáⁿ beh in-ūi i lâi hoaⁿ-hí.

25

Lí tio̍h hō͘ lí ê pē-bú hoaⁿ-hí, Hō͘ siⁿ lí ê bú khòai-lo̍k.

26

Góa ê kiáⁿ, tio̍h chiong lí ê sim hiàn hō͘ góa, Lí ê ba̍k-chiu iā tio̍h hoaⁿ-hí góa hiah ê lō͘.

27

In-ūi chhiong-ki sī chhim-khiⁿ, Îm-hū sī o̍eh ê chíⁿ.

28

I teh tng-tán chhin-chhiūⁿ chha̍t, Tī lâng ê tiong-kan ke-thiⁿ khúi-chà ê lâng.

29

Chī-chūi ū chai-ē? chī-chūi ū iu-būn? chī-chūi ū saⁿ-chiⁿ? Chī-chūi ū thó͘-khùi? chī-chūi bô iân-kò͘ siū siong? Chī-chūi ba̍k-chiu âng-bū?

30

Chiū-sī hit-hō lim-chiú m̄-chai soah, Sì-kòe chhē tiau-hô ê chiú, hit-hō lâng.

31

Chiú chiâⁿ-chòe âng, Tī poe-lāi chiâⁿ-chòe sek-chúi; Lim-liáu ku̍t-âu, lí m̄-thang khòaⁿ i.

32

Kàu-bé chhin-chhiūⁿ chôa teh kā lí, Chhin-chhiūⁿ to̍k-chôa teh chhioh lí.

33

Lí ê ba̍k-chiu beh khòaⁿ kî-īⁿ ê sū, Lí ê sim beh hoat-chhut kōai-biū.

34

Lí beh chhin-chhiūⁿ tó tī hái-tiong, Á-sī chhin-chhiūⁿ khùn tī chûn-ûi-téng ê lâng.

35

Lí beh kóng, Lâng phah góa, góa bô siū-siong, Lâng kòng góa, góa m̄-chai; Góa tī-sî cheng-sîn? góa koh khì chhē chiú.