Chim-giân 第 29 章 - 巴克禮全羅

1

Lâng ta̍uh-ta̍uh siū chek-ho̍at, iû-gôan ngī i ê ām-kún, I beh hut-jiân-kan pāi-hōai, lóng bô hoat-tō͘ thang i-tī.

2

Gī-lâng ke-thiⁿ chōe-chōe ê sî, peh-sìⁿ chiū khòai-lo̍k; Pháiⁿ-lâng chiáng-kôan ê sî, peh-sìⁿ chiū thó͘-khùi.

3

Him-bō͘ tì-hūi ê, hō͘ i ê lāu-pē khòai-lo̍k; Kap kī-lú kiat-kau-ê, hoa-hùi i ê chîⁿ-châi.

4

Ông chiàu kong-pêng hō͘ kok kian-kò͘; Ài siū pò͘-lō͘ chiū chhia-tó i.

5

Thiám-mī i ê chhù-piⁿ ê, Chiū-sī siat lô-bāng tîⁿ i ê kha.

6

Tī pháiⁿ-lâng ê chōe-tiong ū lô-bāng; To̍k-to̍k gī-lâng chhiùⁿ-koa hoaⁿ-hí.

7

Gī-lâng chhâ-chai sòng-hiong lâng ê àn-kiāⁿ; Pháiⁿ-lâng bô bêng-lí, chiū m̄-chai.

8

Bú-bān ê lâng kiáu-jiáu siâⁿ, chhin-chhiūⁿ pàng hé sio; To̍k-to̍k tì-sek ê lâng hō͘ siū-khì lóng soah.

9

Tì-hūi ê lâng kap gōng-lâng saⁿ-chiⁿ, He̍k-sī siū-khì á-sī chhiò, lóng bōe-ōe an-chēng.

10

Ài thâi lâng-ê òan-hūn ôan-chôan ê lâng; To̍k-to̍k chèng-tı̍t ê lâng beh tı̍h i ê sìⁿ-miā.

11

Gû-gōng ê lâng ū siū-khì chiū lóng hián-chhut; Nā-sī tì-sek ê lâng chiū iok-sok hō͘ i soah.

12

Chiáng-kôan-ê nā thiaⁿ-thàn pe̍h-chha̍t ōe, I ê jîn-sîn chiū lóng pháiⁿ.

13

Sòng-hiong ê lâng, kap pō-gio̍k ê lâng, saⁿ tú-tio̍h; Iâ-hô-hoa chiò-kng in nn̄g téng-hō lâng ê ba̍k-chiu.

14

Ông chiàu sêng-sı̍t phòaⁿ-tòan sòng-hiong lâng, I ê chō-ūi beh éng-óan kian-kò͘.

15

Kóaiⁿ-á kap chek-pī ōe ke-thiⁿ tì-hūi; Pàng chhut-chāi i ê gín-ná, ōe hō͘ i ê lāu-bú kiàn-siàu.

16

Pháiⁿ-lâng ke-thiⁿ ê sî, chōe-kòa iā ke-thiⁿ; Gī-lâng beh khòaⁿ-kìⁿ in sit-pāi.

17

Kàu-tok lí ê kiáⁿ, i chiū beh hō͘ lí an-sim; I iā beh hō͘ lí ê sim hoaⁿ-hí.

18

Nā bô be̍k-sī īⁿ-siōng, peh-sìⁿ chiū hòng-chhiòng; To̍k-to̍k chip-siú lu̍t-hoat ê, chiū ū hok-khì.

19

Kan-ta ēng ōe, lô͘-po̍k m̄-khéng siū kàu-tok; I sui-jiân bêng-pe̍k, iā bô tì-ì.

20

Lí khòaⁿ-kìⁿ kóaⁿ-kín kóng-ōe ê lâng bô? Gōng-lâng pí i khah ū thang ǹg-bāng.

21

Lâng ū lô͘-po̍k tùi sòe-hàn khóan-thāi i kè-thâu; Chit ê lô͘-po̍k kàu lō͘-bé beh piàn-chòe i ê kiáⁿ.

22

Ài siū-khì ê lâng khí saⁿ-chiⁿ, Tōa siū-khì ê lâng chōe-chōe hōan-chōe.

23

Lâng ê kiau-ngō͘ beh hō͘ i kàng-kē; Sim khiam-pi ê lâng beh hō͘ i tit-tio̍h êng-kng.

24

Kap chha̍t pun-chng ê lâng, sī òan-hūn ka-kī ê sìⁿ-miā; I thiaⁿ-kìⁿ chiù-chōa ê ōe, iā bô kóng-chhut.

25

Kiaⁿ-ùi lâng ê, chiū-sī siat lô-bāng; To̍k-to̍k óa-khò Iâ-hô-hoa ê, beh tit-tio̍h an-ún.

26

Chōe-chōe lâng kiû chiáng-kôan-ê ê un-tián; To̍k-to̍k lâng ê siū phòaⁿ-tòan sī tùi Iâ-hô-hoa.

27

Bô kong-tō ê lâng, sī gī-lâng só͘ iàm-ò͘ⁿ; Kiâⁿ chèng-tı̍t ê lâng, sī pháiⁿ-lâng só͘ iàm-ò͘ⁿ.