Chim-giân 第 30 章 - 巴克禮全羅

1

Ngá-ki ê kiáⁿ A-kó͘-jíⁿ ê ōe, chiū-sī be̍k-sī; Chit ê lâng tùi Í-thiat kóng, chiū-sī tùi Í-thiat kap Ou-kah kóng;

2

Góa pí chèng-lâng khah chhún-pūn, Iā bô ū lâng ê chhang-miâ.

3

Góa bô ha̍k-sı̍p tì-hūi, Iā m̄-bat Chì-sèng-ê ê chai-bat.

4

Chī-chūi chiūⁿ thiⁿ koh lo̍h--lâi? Chī-chūi chū-chı̍p hong tī chhiú-tiong-sim? Chī-chūi pau chúi tī saⁿ-á-lāi? Chī-chūi tiāⁿ-tio̍h tōe ê sì-ke̍k? I ê miâ kiò sím-mı̍h, I ê kiáⁿ miâ kiò sím-mı̍h, lí chai mah?

5

Siōng-tè ê ōe, ta̍k-kù lóng sī kè thòan-liān ê, Kìⁿ-nā óa-khò I ê, I chiū chòe in ê tîn-pâi.

6

I ê ōe, lí m̄-thang ke-thiⁿ; Kiaⁿ-liáu I chek-pī lí, lí chiū hián-bêng sī kóng pe̍h-chha̍t ê.

7

Góa kiû Lí nn̄g kiāⁿ sū; Tī góa bē sí ê tāi-seng, m̄-thang bô hō͘ góa.

8

Kiû Lí hō͘ hu-ké kap pe̍h-chha̍t lī-khui góa hn̄g-hn̄g; Hō͘ góa bô sòng-hiong iā bô hó-gia̍h; Ēng só͘ tio̍h ēng ê bí-niû hō͘ góa chia̍h;

9

Kiaⁿ-liáu góa pá-chiok m̄-jīn Lí; kóng Iâ-hô-hoa sī chī-chūi? Koh kiaⁿ-liáu góa sòng-hiong chiū thau-the̍h; Tì-kàu siat-to̍k góa ê Siōng-tè ê miâ.

10

M̄-thang tùi chú-lâng lâi kóng i ê lô͘-po̍k pháiⁿ-ōe, Kiaⁿ-liáu i chiù-chó͘ lí, lí chiū sǹg-chòe ū chōe.

11

Ū chı̍t-phài ê lâng chiù-chó͘ i ê lāu-pē, Iā bô kā i ê lāu-bú chiok-hok.

12

Ū chı̍t-phài ê lâng, ka-kī khòaⁿ-chòe chheng-khì; Chóng-sī bô sóe-tû i ê ù-òe.

13

Ū chı̍t-phài ê lâng ba̍k-chiu-thâu chīn-chāi kôaiⁿ; Ba̍k-chiu-phê iā thí kôaiⁿ-kôaiⁿ.

14

Ū chı̍t-phài ê lâng i ê gê chhin-chhiūⁿ kiàm, khí chhin-chhiūⁿ to; Beh thun-bia̍t tōe-bīn-chiūⁿ khùn-khó͘ ê lâng, kap sè-kan ê sòng-hiong lâng.

15

Gô͘-khî ū nn̄g ê cha-bó͘-kiáⁿ, siông-siông kóng, Hō͘ góa, hō͘ góa. Ū saⁿ-hāng bô ti-chiok ê; Liân hit-hō bô kóng kàu-gia̍h-ê ū sì-hāng;

16

Chiū-sī im-hú, kap bōe hôai-īn ê chio̍h-thai; Bô kàu-gia̍h chúi ê tōe, kap bô kóng, Kàu-gia̍h ê hé.

17

Hì-lāng lāu-pē, Khòaⁿ-khin m̄-thiaⁿ-thàn lāu-bú ê ōe, Hit-hō lâng ê ba̍k-chiu beh hō͘ soaⁿ-kok-tiong ê o͘-a teh--chhut-lâi. Hō͘ eng-á-kiáⁿ só͘ chia̍h.

18

Góa só͘ siūⁿ-bōe-chhut ê kî-biāu, ū saⁿ-hāng; Liân góa só͘ m̄-chai-ê ū sì-hāng.

19

Chiū-sī eng-chiáu tī khong-tiong ê lō͘; Chôa tī chio̍h-pôaⁿ-téng ê lō͘; Chûn tī hái-tiong ê lō͘; Lâm kap lú kau-ha̍p ê lō͘.

20

Îm-hū ê lō͘ iā sī án-ni, I chia̍h-liáu chhit i ê chhùi; Chiū kóng, Góa bô kiâⁿ pháiⁿ.

21

Ūi-tio̍h saⁿ-hāng tōe iô-choah, Liân tam-tng bōe-khí-ê ū sì-hāng.

22

Chiū-sī lô͘-po̍k chòe ông. Gōng-lâng chia̍h kàu-gia̍h;

23

Bô lâng-iân ê lú-chú chhut-kè; Lú-pī sòa-chiap chú-bú.

24

Tōe-bīn-chiūⁿ ū sì-hāng bî-sòe ê mı̍h, Chóng-sī ke̍k tì-sek.

25

Káu-hiā sī bô-la̍t ê chéng-lūi, Chóng-sī tī hē-thiⁿ ê sî pī-pān bí-niû.

26

Sa-hoan sī lóan-jio̍k ê chéng-lūi, Chóng-sī tī chio̍h-pôaⁿ-tiong khí-chhù.

27

Chháu-meh bô kun-ông, Chóng-sī lóng ōe hun-tūi chhut-khì.

28

Siān-lâng ēng chhiú khîⁿ, Chóng-sī tiàm tī ông-kiong.

29

Pō͘-kiâⁿ ui-hong-ê ū saⁿ-hāng, Liân kiâⁿ-ta̍h ui-hong-ê ū sì-hāng.

30

Sai, chiū-sī iá-siù tiong tē-it béng ê, Bô ūi-tio̍h pa̍t-mı̍h lâi siám-pī.

31

La̍h-káu, kap kang ê soaⁿ-iûⁿ; Í-kı̍p bô lâng tí-te̍k ê kun-ông.

32

Lí nā chū-ko gōng-gōng chòe, Á-sī chûn pháiⁿ liām-thâu; tio̍h ēng chhiú ng chhùi.

33

Phah gû-leng ōe chiâⁿ ni-iû, Phah-tio̍h phīⁿ ōe chhut-huih; Chhin-chhiūⁿ án-ni kek siū-khì ōe khí saⁿ-chiⁿ.