Chim-giân 第 4 章 - 巴克禮全羅

1

Lín chiah ê kiáⁿ ah, tio̍h thiaⁿ lāu-pē ê kà-sī; Tio̍h chù-ì lâi tit-tio̍h bêng-lí.

2

In-ūi góa ēng hó ê tō-lí hō͘ lín; M̄-thang khì-sak góa ê hoat-tō͘.

3

Góa sī lāu-pē ê kiáⁿ; Tī lāu-bú ê bīn-chêng chòe i tē-it thiàⁿ ê iù-siù kiáⁿ.

4

Lāu-pē kà-sī góa, kā góa kóng, Lí ê sim tio̍h kì-tiâu góa ê ōe, Chun-siú góa ê bēng-lēng, chiū tit-tio̍h o̍ah.

5

Tio̍h tit-tio̍h tì-hūi, tio̍h tit-tio̍h chhang-miâ, M̄-thang bōe kì-tit, m̄-thang lī-khui góa só͘ kóng ê ōe.

6

M̄-thang khì-sak tì-hūi, i beh pó-hō͘ lí; Tio̍h thiàⁿ i, i beh chiàu-kò͘ lí.

7

Tì-hūi sī kun-pún, tio̍h tit-tio̍h tì-hūi; Tī lí it-chhè só͘ tit-tio̍h ê tiong-kan, tio̍h tit-tio̍h chhang-miâ.

8

Lí nā chun-tiōng i, i beh hō͘ lí seng-kôaiⁿ; Lí nā lôan-bō͘ i, i chiū hō͘ lí êng-kng.

9

I beh ēng súi ê bō tì tī lí ê thâu-khak; Chiong êng-kng ê bián-liû hō͘ lí.

10

Góa ê kiáⁿ, tio̍h thiaⁿ lâi chiap-la̍p góa ê ōe, Chiū beh chia̍h tn̂g hè-siū.

11

Góa í-keng chí-sī lí tì-hūi ê lō͘, Ín-chhōa lí kiâⁿ chèng-tı̍t ê lō͘-kèng.

12

Lí kiâⁿ ê sî, bô tì-kàu chó͘-gāi; Lí cháu, ia̍h bô tì-kàu tio̍h-tak.

13

Tio̍h chip-siú kà-sī, m̄-thang pàng-sang; Tio̍h kín-sīn siú i, in-ūi i sī lí ê o̍ah-miā.

14

Hiong-ok ê lâng ê lō͘ bo̍h-tit jı̍p; Pháiⁿ-lâng ê lō͘ bo̍h-tit kiâⁿ.

15

Tio̍h siám-pī i, m̄-thang tùi hia kè; Tio̍h o̍at-cháu lī-khui i, chìn-chêng khì.

16

In-ūi i nā bô hāi lâng, chiū bōe khùn-tit; Nā bô hō͘ lâng po̍ah-tó, chiū khùn bōe lo̍h-bîn.

17

In-ūi in tùi hiong-ok tit-tio̍h chia̍h-piáⁿ; Tùi kiông-pō tit-tio̍h lim-chiú.

18

To̍k-to̍k gī-lâng ê lō͘, chhin-chhiūⁿ thàu-chá ê kng, Ná-chiò ná-kng, kàu jı̍t-tiong-tàu.

19

Pháiⁿ-lâng ê lō͘, chhin-chhiūⁿ o͘-àm; In tio̍h-tak m̄-chai sím-mı̍h iân-kò͘.

20

Góa ê kiáⁿ tio̍h chù-ì thiaⁿ góa ê ōe, Àⁿ hī-khang thiaⁿ góa só͘ kóng--ê.

21

M̄-thang hō͘ i lī-khui lí ê ba̍k-chiu, Tio̍h kì-tiâu tī lí ê sim-lāi.

22

In-ūi chhē-tio̍h i ê lâng, chiū tit-tio̍h o̍ah-miā; Koh thong seng-khu tit-tio̍h ióng-kiāⁿ.

23

Lí tio̍h chīn-la̍t pó-siú lí ê sim. In-ūi i sī o̍ah-miā ê kun-gôan.

24

Lí ê chhùi tio̍h tû-khì siâ-phiah; Lí ê chhùi-tûn tio̍h lī-khui hêng-ge̍k.

25

Lí ê ba̍k-chiu tio̍h khòaⁿ tı̍t-tı̍t; Lí ê ba̍k-chiu tio̍h khòaⁿ thâu-chêng.

26

Tio̍h siu-pîⁿ lí ê kha ê lō͘; Tio̍h kian-kò͘ lí lóng-chóng ê lō͘-tô͘.

27

M̄-thang phian-chó phian-iū; Tio̍h hō͘ lí ê kha lī-khui pháiⁿ.