Chim-giân 第 3 章 - 巴克禮全羅

1

Góa ê kiáⁿ, m̄-thang bōe kì-tit góa ê kà-sī; Lí ê sim tio̍h chip-siú góa ê kài-bēng.

2

In-ūi hiah-ê beh chiong kú-tn̂g ê jı̍t-chí, tn̂g ê hè-siū, Kap pêng-an, ke -thiⁿ hō͘ lí.

3

M̄-thang hō͘ chû-ài sêng-sı̍t lī-khui lí; Tio̍h pa̍k tī lí ê ām-kún, Khek tī lí ê sim-pi.

4

Án-ni lí beh tī Siōng-tè kap lâng ê bīn-chêng, Tit-tio̍h un-tián kap hó miâ-siaⁿ.

5

Lí tio̍h choan-sim óa-khò Iâ-hô-hoa, M̄-thang óa-khò lí ka-kī ê gâu.

6

Tī lí it-chhè só͘ kiâⁿ ê sū lóng tio̍h jīn I, I beh chí-tiám lí ê lō͘.

7

M̄-thang ka-kī khòaⁿ-chòe tì-hūi, Tio̍h kèng-ùi Iâ-hô-hoa, lī-khui pháiⁿ-sū.

8

Che ōe hō͘ lí ê sin-thé ióng-kiāⁿ, Lūn-te̍k lí ê kun-kut.

9

Tio̍h ēng lí ê châi-bu̍t, Kap lí it-chhè khí-thâu se̍k ê thó͘-sán, chun-kèng Iâ-hô-hoa.

10

Án-ni lí ê chhek-chhng beh tīⁿ móa-móa, Lí ê chiú-khut beh ū sin-chiú móa--chhut-lâi.

11

Góa ê kiáⁿ, m̄-thang khòaⁿ-khin Iâ-hô-hoa ê kéng-kài, Ia̍h m̄-thang iàm-chiān I ê chek-pī.

12

In-ūi Iâ-hô-hoa chek-pī I só͘ thiàⁿ--ê, Chhin-chhiūⁿ lāu-pē chek-pī i só͘ hoaⁿ-hí ê kiáⁿ.

13

Tit-tio̍h tì-hūi--ê, tit-tio̍h chhang-miâ, Chit-hō lâng ū hok-khì.

14

In-ūi tit-tio̍h i iâⁿ-kè tit-tio̍h gûn, I ê tek-lī khah-iâⁿ hó-kim.

15

Pí âng-pó-chio̍h khah kùi-khì; Lí só͘ him-bō͘-ê, bô chı̍t-hāng ōe pí-tit i.

16

I ê chiàⁿ-chhiú ū tn̂g hè-siū, I ê tò-chhiú ū hó-gia̍h kap chun-kùi.

17

I ê lō͘ sī khòai-lo̍k ê lō͘; I ê lō͘-kèng lóng sī pêng-an.

18

Tùi-tī chhî-siú i ê lâng, sī chòe o̍ah-miā chhiū, Khîⁿ-tiâu i ê, ta̍k-ê ū hok-khì.

19

Iâ-hô-hoa ēng tì-hūi kiàn-lı̍p tōe, Ēng chhang-miâ an-tì thiⁿ.

20

Ēng I ê tì-sek hō͘ chhim-ian lı̍h-khui, Kiong-chhong lo̍h lō͘-chúi.

21

Góa ê kiáⁿ, tio̍h chip-siú chin ê tì-hūi kap kè-e̍k; M̄-thang hō͘ in lī-khui lí ê ba̍k-chiu.

22

Án-ni in beh tī lí ê lêng-hûn chòe o̍ah-miā; Tī lí ê ām-kún chòe súi ê chng-thāⁿ.

23

Lí chiū beh an-jiân kiâⁿ lí ê lō͘; Lí ê kha ia̍h bô tio̍h-tak.

24

Lí tó-teh, tek-khak bô kiaⁿ; Lí tó-teh, beh chin hó-khùn.

25

Hut-jiân lâi ê kiaⁿ-hiâⁿ, lí m̄-bián kiaⁿ; Pháiⁿ-lâng só͘ tú-tio̍h ê pāi-hōai, lí iā m̄-bián kiaⁿ.

26

In-ūi Iâ-hô-hoa beh chòe lí só͘ óa-khò--ê; I beh pó-siú lí ê kha bô hām-lo̍h lô-bāng.

27

Lí ê chhiú nā ū kiâⁿ-hó ê khùi-la̍t, m̄-thang the-sî, Chiū tio̍h the̍h hō͘ hit-ê eng-kai tit-tio̍h ê lâng.

28

Lí nā ū piān, m̄-thang tùi lí ê chhù-piⁿ kóng, Chhiáⁿ khì, Bîn-á-jı̍t koh lâi, góa beh hō͘ lí.

29

Lí ê chhù-piⁿ tī lí ê hū-kūn an-jiân khiā-khí; Lí m̄-thang siat kè-bô͘ hāi i.

30

Lâng m̄-bat hām-hāi lí; Lí m̄-thang bô in-toaⁿ kap i oan-ke.

31

M̄-thang him-sōan kiông-pō ê lâng; Ia̍h m̄-thang kéng i só͘ kiâⁿ ê lō͘.

32

In-ūi hêng-ge̍k ê lâng sī Iâ-hô-hoa só͘ iàm-ò͘ⁿ; Chèng-tı̍t ê lâng I kap i chhin-bı̍t.

33

Iâ-hô-hoa ê chiù-chó͘ kàu tī pháiⁿ-lâng ê ke; Nā-sī hó-lâng ê chhù I siúⁿ-sù hok-khì hō͘ i.

34

Bú-bān lâng--ê, I bú-bān i; Si-un hō͘ khiam-pi ê lâng.

35

Tì-hūi ê lâng beh sêng-chiap êng-kng; Gû-gōng ê lâng seng-kôaiⁿ iā chiâⁿ-chòe kiàn-siàu.