Chim-giân 第 2 章 - 巴克禮全羅

1

Góa ê kiáⁿ, lí nā sêng-siū góa ê ōe, Chûn góa ê bēng-lēng tī sim-lāi;

2

Hō͘ lí àⁿ hī-khang thiaⁿ tì-hūi, Choan-sim kiû chhang-miâ;

3

Kiû tit-tio̍h bêng-lí, Tōa-siaⁿ kiû chhang-miâ;

4

Nā chhē i chhin-chhiūⁿ chhē gûn, Chhiau-chhē i chhin-chhiūⁿ chhiau-chhē khǹg-ba̍t ê pó-pòe;

5

Lí chiū bêng-pe̍k kèng-ùi Iâ-hô-hoa ê sū, Chhē-tio̍h bat Siōng-tè ê lí.

6

In-ūi Iâ-hô-hoa siúⁿ-sù tì-hūi, Chai-bat kap chhang-miâ lóng tùi I ê chhùi chhut.

7

I kā chèng-tı̍t ê lâng chek-chū chin ê tì-hūi, Kā kiâⁿ-chòe toan-chiàⁿ ê lâng chòe tîn-pâi.

8

Thang pó-siú kong-pêng ê lō͘, Pó-hō͘ sèng-tô͘ ê lō͘.

9

Lí chiū bêng-pe̍k kong-gī phòaⁿ-tòan, Chèng-tı̍t kap it-chhè ê hó-lō͘.

10

In-ūi tì-hūi beh jı̍p lí ê sim, Tì-sek chòe lí ê sîn-hûn só͘ hoaⁿ-hí--ê.

11

Kè-e̍k beh pó-hō͘ lí, Chhang-miâ beh pó-siú lí.

12

Beh hō͘ lí siám-pī pháiⁿ-lō͘, Thoat-lī kóng hêng-ge̍k ê lâng.

13

Hit-hō lâng pàng-sak chèng-tı̍t ê lō͘, Kiâⁿ o͘-àm ê lō͘.

14

In hoaⁿ-hí chòe-pháiⁿ, Ì-ài pháiⁿ-lâng ê hêng-ge̍k.

15

In ê lō͘ oan-khiau, In ê só͘-kiâⁿ hêng-ge̍k.

16

Beh hō͘ lí siám-pī îm-hū, Chiū-sī kóng thiám-mī ōe ê kī-lú.

17

I khì-sak siàu-liân ê sî ê phit-phòe, Bōe kì-tit i ê Siōng-tè ê iok.

18

In-ūi i ê chhù ǹg tī sí-bô, I ê lō͘ thàu im-hú.

19

Kìⁿ-nā kàu i hia--ê, bô chı̍t-ê tò-tńg, Iā bōe-ōe jı̍p o̍ah-miā ê lō͘.

20

Tì-hūi beh hō͘ lí kiâⁿ hó-lâng ê lō͘, Siú gī-lâng ê lō͘.

21

In-ūi chèng-tı̍t ê lâng beh khiā-khí tōe-bīn, Ôan-chôan ê lâng iā beh lâu tī-hia.

22

To̍k-to̍k pháiⁿ-lâng beh tùi tōe-bīn chián-tû, kan-chà ê lâng beh tùi hia pu̍ih-chhut.