Chim-giân 第 1 章 - 巴克禮全羅

1

Í-sek-lia̍t ông Tāi-pı̍t ê kiáⁿ Só͘-lô-bûn ê chim-giân.

2

Beh hō͘ lâng ōe hiáu-tit tì-hūi kap kà-sī, Bêng-pe̍k thong-ta̍t ê ōe;

3

Hō͘ lâng siū kà-sī, ōe ēng tì-hūi pān tāi-chì, Ēng kong-gī, phòaⁿ-tòan, chèng-tı̍t;

4

Hō͘ gōng-tı̍t ê lâng ū lêng-khiàu, Hō͘ siàu-liân lâng ū tì-sek kap kè-e̍k;

5

Hō͘ tì-hūi ê lâng thiaⁿ-kìⁿ, ke-thiⁿ ha̍k-būn; Hō͘ chhang-miâ ê lâng tit-tio̍h chin ê kiàn-sek;

6

Hō͘ lâng bêng-pe̍k chim-giân kap só͘ chhut ê chhai.

7

Kèng-ùi Iâ-hô-hoa sī tì-sek ê kun-pún; Gû-gōng ê lâng biáu-sī tì-hūi kap kà-sī.

8

Góa ê kiáⁿ, tio̍h thiaⁿ lí ê lāu-pē ê kàu-tok; M̄-thang khì-sak lí ê lāu-bú ê kà-sī.

9

In-ūi che beh chòe lí thâu-khak-téng ê súi-bō, Lí ê ām-kún ê kim-liān.

10

Góa ê kiáⁿ, pháiⁿ-lâng nā ín-iú lí, Lí m̄-thang thàn i.

11

In nā kóng, Lí kap góan khì, Lán lâi bih-teh thâi lâng, Bô in-toaⁿ tng-tán bô-chōe ê lâng,

12

Lán chhin-chhiūⁿ im-hú kā in o̍ah-o̍ah thun--lo̍h-khì: In chhin-chhiūⁿ hām-lo̍h khiⁿ ê lâng, hō͘ lán chòe chı̍t-ē thun--lo̍h-khì;

13

Lán beh tit-tio̍h ta̍k-iūⁿ ê pó-mı̍h, Ēng só͘ chhiúⁿ-ê, tún-móa lán ê chhù;

14

Lí lâi jı̍p góan ê tóng, Tāi-ke ū kong-kiōng ê gûn-tē.

15

Góa ê kiáⁿ, bo̍h-tit kap in tâng kiâⁿ, Iok-sok lí ê kha bo̍h-tit ta̍h in ê lō͘.

16

In-ūi in ê kha cháu-khì kiâⁿ-pháiⁿ, In kóaⁿ-kín beh hō͘ lâng lâu-huih.

17

Siat lô-bāng hō͘ chiáu-á khòaⁿ-kìⁿ, Che sī khang-khang.

18

Chiah ê lâng bih-teh sī lâu in ka-kī ê huih, Tng-tán sī hāi ka-kī ê sìⁿ-miā.

19

Kìⁿ-nā tham châi-lī--ê, in ê lō͘ sī án-ni, Chiū-sī chhiúⁿ-the̍h ka-kī ê sìⁿ-miā.

20

Tì-hūi tī koe-lō͘ tōa-siaⁿ kiò, Tī khui-khoah ê só͘-chāi chhut i ê siaⁿ.

21

Tī lāu-jia̍t ê koe-lō͘-thâu, tōa-siaⁿ kiò, Tī siâⁿ-mn̂g-kháu, tī siâⁿ-lāi, kóng-chhut i ê ōe;

22

Kóng, Gōng-tı̍t lâng ài gōng-tı̍t, Bú-bān lâng ài bú-bān, Gû-gōng lâng òan-hūn tì-sek, beh kàu sím-mı̍h sî ah?

23

Góa chek-pī lín, lín tio̍h o̍at-tńg; Khòaⁿ ah, góa beh ēng góa ê sîn kàng-lo̍h hō͘ lín, Ēng góa ê ōe chí-sī lín.

24

In-ūi góa bat kiò, lín m̄-thiaⁿ; Góa bat chhun-chhiú, bô lâng tì-ì;

25

Lín hóan-tńg khòaⁿ-khin góa it-chhè ê khòan-kài, M̄-khéng siū góa ê chek-pī.

26

Só͘-í lín tú-tio̍h hōan-lān, góa beh chhìn-chhiò, Lín tú-tio̍h kiaⁿ-hiâⁿ, góa beh lâng-gīn.

27

Lín ê kiaⁿ-hiâⁿ chhin-chhiūⁿ kông-hong chhe-lâi, Lín ê chai-hō chhin-chhiūⁿ kńg-lê-hong sàu-lâi, Hōan-lān thòng-khó͘ lîm-kàu lín sin-chiūⁿ.

28

Hit-sî in beh kiû góa, góa m̄-thiaⁿ, Chhiat-chhiat chhē góa, chhē bōe tio̍h.

29

In-ūi in òan-hūn tì-sek, Bô hoaⁿ-hí kèng-ùi Iâ-hô-hoa.

30

M̄-thiaⁿ góa ê khòan-kài, Biáu-sī góa ê chek-pī.

31

Só͘-í in beh chia̍h ka-kī kiâⁿ-chòe ê ké-chí, Hō͘ in tit-tio̍h só͘ kè-bô͘ kàu pá-ià.

32

Gōng-tı̍t lâng ê pōe-biū beh hō͘ i tì-kàu sí, Gû-gōng lâng an-ia̍t, beh hō͘ i tì-kàu bia̍t-bô.

33

To̍k-to̍k thiaⁿ-thàn góa ê beh an-jiân khiā-khí; Beh hióng-siū an-chēng, bô kiaⁿ tú-tio̍h chai-ē.