Si-phian 第 104 章 - 巴克禮全羅

1

Góa ê sim-sîn ah, lí tio̍h o-ló Iâ-hô-hoa. Iâ-hô-hoa góa ê Siōng-tè ah, Lí sī chì-tōa; Lí ēng chun-êng ui-giâm chòe-saⁿ lâi chhēng.

2

Lí chhēng kng-bêng chhin-chhiūⁿ gōa-saⁿ; Thí-khui thiⁿ chhin-chhiūⁿ tiùⁿ-pak.

3

I tī chúi-tiong an-tì I lâu-koh ê thong-îⁿ, Ēng hûn chòe I ê chhia, Ēng hong ê sı̍t lâi kiâⁿ;

4

Ēng hong chòe I ê sù-chiá, Ēng iām-hé chòe I ê chhe-ēng;

5

Chiong tōe hē tī i ê tōe-ki téng, Hō͘ i éng-éng bô iô-choah.

6

Lí ēng chhim-ian chhin-chhiūⁿ i-chiûⁿ jia-khàm tōe-bīn; Chiah ê chúi im-kè soaⁿ-niá.

7

Lí chı̍t-ē hoah, chúi chiū kín-kín cháu; Lí ê lûi chı̍t-ē tân, chúi chiū kín-kín lâu;

8

Chhèng kàu soaⁿ-thâu, lo̍h kàu soaⁿ-kok, Kui tī Lí kā in tiāⁿ-tio̍h ê só͘-chāi.

9

Lí tiāⁿ-tio̍h kài-hān hō͘ chúi bōe-ōe pôaⁿ-kè, Bô koh tò-tńg-lâi jia-khàm tōe-bīn.

10

Hō͘ chúi-chôaⁿ chhèng-chhut tī soaⁿ-kok, Lâu tī soaⁿ-tiong;

11

Hō͘ soaⁿ--nih ê cháu-siù lóng ū thang lim, Iá-lû tit-tio̍h chí chhùi-ta.

12

Thiⁿ-tiong ê pe-chiáu hioh tī chúi-piⁿ, Háu tī chhiū-ki téng.

13

I tùi I ê lâu-koh-tiong kòan-ak soaⁿ-niá, Tùi Lí só͘ chòe ê hāu-kó tōe chiū chhiong-chiok.

14

I hō͘ chháu hoat-siⁿ, hō͘ cheng-siⁿ thang chia̍h, Iā ū chhài-soe chòe lâng ê lō͘-ēng, Hō͘ chia̍h-mı̍h tùi tōe--nih chhut.

15

Koh ū chiú hō͘ lâng ê sim hoaⁿ-hí, Ū iû lūn-te̍k lâng ê bīn, Ū chia̍h-mı̍h pó͘-ióng lâng ê sim-la̍t.

16

Iâ-hô-hoa ê chhiū lóng tit-tio̍h chhiong-chiok ê lūn-te̍k; Chiū-sī I só͘ chai Lī-pa-lùn ê pek-hiuⁿ-chhiū.

17

Pe-chiáu choh-siū tī hit lāi-bīn; Ho̍h khiā-khí tī siông-chhiū ê tiong-kan.

18

Kôaiⁿ-soaⁿ sī hō͘ iá-soaⁿ-iûⁿ tiàm, Chio̍h-pôaⁿ sī sa-hoan siám-bih ê só͘-chāi.

19

I ēng ge̍h lâi tiāⁿ-tio̍h sî-choeh; Jı̍t-thâu iā chai thang lo̍h.

20

Lí hō͘ i àm, chiū chòe mî--sî; Hit-sî chhiū-nâ-lāi ê pah-siù chiū lóng pê--chhut-lâi.

21

Sai-á-thûn háu, beh jiàu mı̍h-chia̍h, Tùi Siōng-tè thó in ê chia̍h-mı̍h.

22

Jı̍t-thâu chı̍t-ē chhut, in chiū cháu--khì bih, Tó tī in ê tōng-lāi.

23

Lâng chhut-khì chòe-kang, Tio̍h-bôa kàu ê-hng-sî.

24

Iâ-hô-hoa ah, Lí só͘ chō--ê cháiⁿ-iūⁿ hiah chōe! Lóng sī Lí ēng tì-hūi chō-chiâⁿ--ê; Piàn-tōe móa-móa Lí ê pù-ū.

25

Hia ū hái, tōa koh khoah, Kî-tiong ū sǹg-bōe-liáu ê tōng-bu̍t, Tōa-sòe ê o̍ah-mı̍h lóng ū.

26

Tī-hia ū chûn teh kiâⁿ; Ū Lí só͘ chhòng-chō ê tōa-hî iû-lâi iû-khì.

27

Chiah-ê lóng teh thèng-hāu Lí, Thang chiàu-sî hō͘ in chia̍h-mı̍h.

28

Lí hō͘ in, in chiū khioh--khí-lâi; Lí thí-khui Lí ê chhiú, in tit-tio̍h hó-mı̍h kàu-pá.

29

Lí ng Lí ê bīn, in chiū khòa-lū; Lí chiong in ê khùi siu-hôe, in chiū sí-bô, Lâi kui tī thô͘-hún.

30

Lí hoat-chhut Lí ê sîn, in chiū siū chhòng-chō; Lí hō͘ tōe-bīn ōaⁿ chòe sin.

31

Gōan Iâ-hô-hoa ê êng-kng éng-óan tī-teh; Gōan Iâ-hô-hoa ūi-tio̍h I só͘-chō--ê lâi hoaⁿ-hí.

32

I khòaⁿ tōe, tōe chiū tín-tāng; I bong soaⁿ, soaⁿ chiū chhut-ian.

33

Góa beh chı̍t-sì-lâng ǹg Iâ-hô-hoa gîm-si; Góa iáu o̍ah ê sî beh ǹg góa ê Siōng-tè chhiùⁿ-koa o-ló.

34

Gōan I lia̍h góa ê chēng-chēng-siūⁿ chòe ha̍h-ì; Góa beh in-ūi Iâ-hô-hoa hoaⁿ-hí.

35

Gōan chōe-jîn tùi sè-chiūⁿ siau-bia̍t, Gōan pháiⁿ-lâng lóng bô--khì; Góa ê sim-sîn ah, tio̍h o-ló Iâ-hô-hoa; Lín tio̍h o-ló Iâ-hô-hoa.