Si-phian 第 105 章 - 巴克禮全羅

1

Lín tio̍h kám-siā Iâ-hô-hoa, kiû-kiò I ê miâ; Tī bān peh-sìⁿ ê tiong-kan pò-iông I ê só͘-chòe.

2

Tio̍h ǹg I gîm-si, ǹg I chhiùⁿ-koa o-ló, Tâm-lūn I it-chhè kî-biāu ê só͘-kiâⁿ.

3

Tio̍h in-ūi I ê sèng-miâ lâi khoa-kháu; Chhē Iâ-hô-hoa ê lâng, sim-lāi tio̍h hoaⁿ-hí.

4

Tio̍h kiû Iâ-hô-hoa kap I ê kôan-lêng; Siông-siông chhē-kìⁿ I ê bīn.

5

6

I ê lô͘-po̍k A-pek-la̍h-hán ê hō͘-è, I só͘ kéng Ngá-kok ê kiáⁿ-sun ah, Lín tio̍h siàu-liām I só͘-chòe kî-biāu ê sū, Kap I ê sîn-jiah, kap I ê chhùi phòaⁿ-tòan ê ōe.

7

I sī Iâ-hô-hoa, lán ê Siōng-tè; Chôan-tōe lóng ū I ê phòaⁿ-tòan.

8

I kì-liām I ê iok, tı̍t-kàu éng-óan; I só͘ hoan-hù ê ōe, tı̍t-kàu chheng-tāi;

9

Chiū-sī kap A-pek-la̍h-hán só͘ lı̍p ê iok, Tùi Í-sat só͘ chiù ê chōa.

10

I koh chiong chit ê iok tùi Ngá-kok tiāⁿ-tio̍h chòe lu̍t-lē; Tùi Í-sek-lia̍t tiāⁿ-tio̍h chòe éng-óan ê iok.

11

Kóng, Góa beh chiong Ka-lâm tōe siúⁿ-sù lí, Chòe lí sán-gia̍p ê hūn-gia̍h.

12

Tng-sî in ê jîn-teng iú-hān; Siàu-gia̍h chió-chió, koh tī-hia chòe chhut-gōa.

13

In tùi chit-cho̍k kiâⁿ kàu hit-cho̍k, Tùi chit-kok kàu pa̍t ê peh-sìⁿ.

14

I bô iông-ún sím-mı̍h lâng khi-hū in, Ūi-tio̍h in ê iân-kò͘ khiàn-chek chiah ê kun-ông;

15

Kóng, M̄-thang hōan-tio̍h Góa ê siū boah-iû--ê, Ia̍h m̄-thang pháiⁿ khóan-thāi Góa ê sian-ti.

16

I bēng-lēng ki-hng kàng-lo̍h tī hit ê thó͘-tōe; Chiong só͘ óa-khò ê bí-niû, it-khài tōan-cho̍at.

17

I tī in ê thâu-chêng chhe chı̍t-lâng khì; Iok-sek siū-bōe chòe lô͘-po̍k;

18

Lâng ēng kha-khàu siong i ê kha, I siū thih-liān khún-pa̍k;

19

Iâ-hô-hoa ê ōe chhì-liān i, Tı̍t-kàu I só͘ kóng--ê èng-giām.

20

Ông chhe lâng kā i tháu-khui, Chiū-sī tī-lí peh-sìⁿ--ê, kā i tháu-pàng;

21

Siat-lı̍p i chòe ông-ka ê chú, Kóan-lí i it-chhè só͘-ū--ê,

22

Thang sûi-ì pa̍k i ê jîn-sîn, Chiong tì-hūi kà-sī i ê tióng-ló.

23

Í-sek-lia̍t ia̍h kàu Ai-kı̍p, Ngá-kok chhut-gōa tī Hâm ê tōe.

24

Iâ-hô-hoa hō͘ i ê peh-sìⁿ siⁿ-thòaⁿ chōe-chōe; Hō͘ in pí tùi-te̍k khah-kiông.

25

I piàn-ōaⁿ tùi-te̍k ê sim, òan-hūn I ê peh-sìⁿ, Sòa ēng khúi-khiat ê kè-bô͘ khóan-thāi I ê lô͘-po̍k.

26

I chhe I ê lô͘-po̍k Mô͘-se, Kap I só͘ kéng ê A-lûn.

27

In tī tùi-te̍k ê tiong-kan kiâⁿ I ê sîn-jiah, Tī Hâm ê tōe kiâⁿ kî-sū.

28

I bēng-lēng o͘-àm, chiū ū o͘-àm; In bô ûi-ke̍h I ê ōe.

29

I hō͘ in ê chúi piàn huih, Hō͘ in ê hî lóng sí.

30

Tī in ê thó͘-tōe chhân-kap-á siⁿ chōe-chōe, Liân in ê ông ê ba̍t-pâng ia̍h ū.

31

I chı̍t-ē chhut-siaⁿ, hô͘-sîn kui-tīn pe--lâi, Koh ū sat-bú tī in ê kéng-lāi móa sì-kòe.

32

I lo̍h-pha̍uh hō͘ in chòe hō͘; Tī in ê thó͘-tōe kàng-lo̍h iām-hé.

33

I ia̍h phah in ê phû-tô-chhiū kap bû-hoa-kó chhiū, Húi-hōai in kéng-lāi ê chhiū-ba̍k.

34

I chı̍t-ē chhut-siaⁿ hông-thiông chiū lâi, Chháu-meh bōe-sǹg--tit.

35

It-chīn chia̍h in ê thó͘-tōe ê chhài-soe, Koh chia̍h in chhân-hn̂g só͘ chhut--ê.

36

I koh phah-sí in kok-lāi it-chhè ê tōa-kiáⁿ, Chiū-sī in khùi-la̍t ê khí-thâu.

37

I chhōa in chhut-lâi, tòa gûn tòa kim; I ê chi-phài tiong, bô chı̍t ê lóan-jio̍k ê lâng.

38

In chhut--lâi ê sî, Ai-kı̍p chiū hoaⁿ-hí, In-ūi Ai-kı̍p bat ūi-tio̍h in lâi kiaⁿ.

39

I khí hûn chòe pò͘-phâng, Mî--sî ēng hé chiò-kng.

40

In chı̍t-ē kiû, I chiū hō͘ ian-chhun pe--lâi, Koh ēng thiⁿ ê piáⁿ hō͘ in pá-chiok.

41

I phah-khui chio̍h-pôaⁿ, chúi chiū chhèng-chhut; Tī ta-tōe chúi lâu chhin-chhiūⁿ hô.

42

In-ūi I kì-liām I sèng ê ōe, Kap I ê lô͘-po̍k A-pek-la̍h-hán.

43

I chhōa I ê peh-sìⁿ tāi-ia̍t chhut-lâi, Chhōa I kéng ê peh-sìⁿ chhiùⁿ hoaⁿ-hí ê koa chhut--lâi.

44

I chiong lia̍t-kok ê tōe siúⁿ-sù in, In chiū sêng-chiap hiah ê peh-sìⁿ tio̍h-bôa só͘ tit-tio̍h--ê;

45

Beh hō͘ in thàn I ê lu̍t-lē, Siú I ê hoat-tō͘. Lín tio̍h o-ló Iâ-hô-hoa.