Si-phian 第 106 章 - 巴克禮全羅

1

Lín tio̍h o-ló Iâ-hô-hoa. Lín tio̍h kám-siā Iâ-hô-hoa; in-ūi I sī hó; I ê chû-ài éng-óan tī--teh.

2

Chī-chūi ōe kóng-khí Iâ-hô-hoa ê tōa kôan-lêng? Chī-chūi ōe piáu-bêng I it-chhè ê miâ-siaⁿ?

3

Kìⁿ-nā chun-siú kong-pêng, siông-siông kiâⁿ kong-gī--ê; Chit-hō lâng chiū ū hok-khì.

4

Iâ-hô-hoa ah, Lí ēng un-hūi Khóan-thāi Lí ê peh-sìⁿ, kiû Lí ia̍h ēng che kì-liām góa; Ēng Lí ê kiù-un lîm-kàu góa.

5

Hō͘ góa khòaⁿ-kìⁿ Lí kéng ê peh-sìⁿ ê hok-khì, Hoaⁿ-hí Lí ê kok ê khòai-lo̍k, Kap Lí ê sán-gia̍p saⁿ-kap êng-kng.

6

Góan kap góan ê chó͘-kong pîⁿ-pîⁿ hōan-chōe, Góan chok-gia̍t, kiâⁿ pháiⁿ.

7

Góan ê chó͘-kong tī Ai-kı̍p bô bêng-pe̍k Lí ê kî-sū; Bô kì-liām Lí hong-sēng ê chû-ài; Hóan-tńg tī hit ê hái, chiū-sī tī Âng-hái, kiâⁿ pōe-ge̍k.

8

Nā-sī I in-ūi ka-kī ê miâ chín-kiù in, Ūi-tio̍h beh hián-bêng I ê tōa kôan-lêng.

9

Koh hoah Âng-hái, hái chiū ta; I chhōa in keng-kè chhim ê só͘-chāi, ná chhin-chhiūⁿ keng-kè khòng-iá.

10

I kiù in thoat-lī òan-hūn in ê lâng ê chhiú, Tùi tùi-te̍k ê chhiú-tiong kiù-sio̍k in.

11

Chúi im-ba̍t in ê tùi-te̍k; In chiū bô lâu chı̍t-ê.

12

Hit-tia̍p in chiah sìn I ê ōe; Chhiùⁿ-koa o-ló I.

13

In khòai-khòai bōe-kì-tit I ê só͘-chòe; Bô thèng-hāu I ê chí-kàu;

14

Hóan-tńg tī khòng-iá tōa khí tham-chia̍h; Tī pha-hng ê só͘-chāi chhì Siōng-tè.

15

I chiong in só͘ kiû--ê hō͘--in, Chóng-sī hō͘ in ê sîn-hûn soe-lám.

16

In koh tī iâⁿ-tiong òan-tò͘ Mô͘-se, Kap Iâ-hô-hoa ê sèng ê A-lûn.

17

Tōe chiū khui, thun Tāi-tan, Iám-ba̍t A-pí-lân ê tóng.

18

Ū hé tī in ê tóng-tiong hoat-khí, Ū hé-iām sio-bia̍t hiah ê pháiⁿ-lâng.

19

In tī Hô-lia̍t chō gû-á, Phak-pài só͘ chù ê siōng.

20

Án-ni chiong in ê êng-kng, Ōaⁿ chòe chia̍h-chháu ê gû-á siōng.

21

Bōe-kì-tit kiù in ê Siōng-tè, Bat kiâⁿ tōa ê tāi-chì tī Ai-kı̍p--ê;

22

Kiâⁿ kî-sū tī Hâm ê tōe, Kiâⁿ thang kiaⁿ ê sū tī Âng-hái.

23

Só͘-í I kóng beh bia̍t-bô in, Nā m̄-sī ū I só͘ kéng ê Mô͘-se, tng koat-lia̍t ê sî, khiā I ê bīn-chêng, Bán-hôe I ê siū-khì, kiaⁿ-liáu I bia̍t-bô in.

24

In koh khòaⁿ-khin hit ê hó ê tōe, M̄-sìn I ê ōe.

25

Tī in pò͘-pîⁿ-lāi hoat-chhut òan-hūn ê ōe, M̄-thiaⁿ Iâ-hô-hoa ê siaⁿ.

26

Só͘-í I tùi in kia̍h-khí chhiú chiù-chōa, Beh hō͘ in sí tī khòng-iá.

27

Hō͘ in ê hō͘-è sí tī lia̍t-kok ê tiong-kan, Sì-sòaⁿ tī ta̍k só͘-chāi.

28

In koh kap Pa-le̍k-pí-jíⁿ liân-ha̍p, Chia̍h chè-hiàn sí--ê ê mı̍h.

29

In án-ni kiâⁿ, jiá I ê siū-khì; Chiū ū un-e̍k liû-hêng tī in tiong-kan.

30

Hit-sî Hui-nî-hap khí--lâi, kiâⁿ hêng-ho̍at; Un-e̍k chiah soah.

31

Chit-ê chiū kā i sǹg-chòe gī, Sè-sè tāi-tāi, tı̍t kàu éng-óan.

32

In tī Bí-lī-pa ê chúi, koh hō͘ Iâ-hô-hoa siū-khì, Sīm-chì Mô͘-se ūi-tio̍h in ê iân-kò͘ iā siū khui-sún;

33

Sī in-ūi in ngó͘-ge̍k I ê sîn, Tì-kàu Mô͘-se kóng-chhut sò-sèng ê ōe.

34

Iâ-hô-hoa hoan-hù in châu-bia̍t hiah ê peh-sìⁿ; In bô thiaⁿ-thàn.

35

Hóan-tńg kap gōa-pang lâng hūn-cha̍p, O̍h in ê só͘-chòe;

36

Ho̍k-sāi in ê ngó͘-siōng, Che sī chiâⁿ-chòe hāi in ê o̍ah-tauh.

37

Chiong in ê kiáⁿ cha-bó͘-kiáⁿ chè-sū kúi-sîn,

38

Lâu bô-chōe ê lâng ê huih, chiū-sī in ê kiáⁿ cha-bó͘-kiáⁿ ê huih, chiong in chè-sū Ka-lâm ê ngó͘-siōng; Hit ê tōe chiū hō͘ huih phah lâ-sâm.

39

Án-ni in hō͘ ka-kī ê só͘-chòe phah lâ-sâm, Tī in ê só͘-kiâⁿ hōan-tio̍h îm-hēng.

40

Só͘-í Iâ-hô-hoa ê siū-khì tùi I ê peh-sìⁿ hoat-chhut, Iàm-ò͘ⁿ I ê sán-gia̍p.

41

Chiong in kau-tài gōa-pang lâng ê chhiú; Òan-hūn in ê lâng chiū kóan-hat in.

42

In ê tùi-te̍k iā ap-chè in, In chiū khut-ho̍k tī tùi-te̍k ê chhiú-ē.

43

I chōe-chōe pái chín-kiù in; Chóng-sī in tī in ê kè-bô͘-tiong pōe-ge̍k I; In-ūi ka-kī ê chōe-ok kàng-chòe pi-chiān.

44

Iáu-kú I thiaⁿ-kìⁿ in ai-kiò ê sî, chiū thé-thiap in ê gûi-kip;

45

Ūi-tio̍h in lâi kì-liām I ê iok, Chiàu I hong-sēng ê chû-ài hôe-sim tńg-ì.

46

I iā hō͘ in tī lóng-chóng lia̍h in ê lâng ê bīn-chêng, Tit-tio̍h lîn-bín.

47

Iâ-hô-hoa góan ê Siōng-tè ah, kiû Lí chín-kiù góan, Tùi gōa-pang-tiong chū-chı̍p góan; Thang hō͘ góan chiok-siā Lí ê sèng-miâ, Lia̍h Lí ê siū o-ló chòe tāi-ia̍t.

48

Tio̍h o-ló Iâ-hô-hoa, Í-sek-lia̍t ê Siōng-tè, Tùi éng-óan kàu éng-óan. Gōan chèng peh-sìⁿ lóng kóng, A-bēng. Lín tio̍h o-ló Iâ-hô-hoa.