Si-phian 第 107 章 - 巴克禮全羅

1

Lín tio̍h kám-siā Iâ-hô-hoa, in-ūi I sī hó, In-ūi I ê chû-ài éng-éng tī-teh.

2

Iâ-hô-hoa só͘ kiù-sio̍k--ê tio̍h kóng che ōe, Chiū-sī I tùi tùi-te̍k chhiú-tiong só͘ kiù-sio̍k--ê;

3

Tùi ta̍k-kok, tùi tang tùi sai, tùi lâm tùi pak, Só͘ chū-chı̍p--ê lóng tio̍h án-ni kóng.

4

In tī khòng-iá pha-hng ê lō͘ phiau-liû, Chhē bô siâⁿ thang khiā-khí.

5

Iā iau, iā chhùi-ta, In ê sim-sîn hūn--khì.

6

In chiū tī khó͘-lān-tiong ai-kiû Iâ-hô-hoa; I tùi in ê hōan-lān-tiong chín-kiù in.

7

Koh chhōa in kiâⁿ tı̍t ê lō͘, Hō͘ in khì kàu thang khiā-khí ê siâⁿ.

8

Ūi-tio̍h Iâ-hô-hoa ê chû-ài kap I tùi sè-kan lâng só͘ kiâⁿ ê kî-sū, Gōan lâng lóng o-ló I.

9

In-ūi I hō͘ pek-chhiat him-bō͘ ê sim tit-tio̍h ti-chiok; Hō͘ iau-gō ê sim tit-tio̍h hó-mı̍h kàu pá.

10

Hiah-ê chē tī o͘-àm sí-ìm-tiong ê lâng, Siū khùn-khó͘ kap thih-liān pé-pa̍k ê lâng;

11

Sī in-ūi in pōe-ge̍k Siōng-tè ê ōe, Khòaⁿ-khin Chì-kôaiⁿ--ê ê chí-ì.

12

Só͘-í I ēng lô-khó͘ kà-koai in ê sim; In po̍ah-tó, bô lâng hû-chō͘.

13

In chiū tī khó͘-lān-tiong ai-kiû Iâ-hô-hoa, I tùi in ê hōan-lān-tiong khan-kiù in.

14

I tùi o͘-àm sí-ìm-tiong chhōa in chhut--lâi, Chhoah-tn̄g pa̍k in ê soh.

15

Ūi-tio̍h Iâ-hô-hoa ê chû-ài kap I tùi sè-kan lâng só͘ kiâⁿ ê kî-sū, Gōan lâng lóng o-ló I.

16

In-ūi I phah-phòa tâng ê mn̂g, Chām-tn̄g thih ê mn̂g-kông.

17

Gōng-lâng in-ūi in ê kè-sit, Koh in-ūi in ê chōe-ok, siū khó͘-chhó͘.

18

In ê sim iàm-ò͘ⁿ ta̍k-iūⁿ ê chia̍h-mı̍h, Chiū óa-kūn sí ê mn̂g.

19

In chiū tī khó͘-lān-tiong ai-kiû Iâ-hô-hoa; I tùi in ê hōan-lān-tiong khan-kiù in.

20

I chhut bēng-lēng i-hó in, Kiù in thoat-lī sí-bô.

21

Ūi-tio̍h Iâ-hô-hoa ê chû-ài, kap I tùi sè-kan lâng só͘ kiâⁿ ê kî-sū, Gōan lâng lóng o-ló I.

22

Ia̍h gōan in hiàn kám-siā ê chè, Chhut hoaⁿ-hí ê siaⁿ kóng-khí I ê só͘-chòe.

23

Chē-chûn kè-hái, Tī tōa-chúi-tiong keng-êng sū-gia̍p--ê,

24

In khòaⁿ-kìⁿ Iâ-hô-hoa ê só͘-chòe, Kap I tī chhim-ian só͘ kiâⁿ ê kî-sū;

25

In-ūi I chı̍t-ē bēng-lēng, kông-hong chiū khí; Hái-tiong ê éng chiū giâ--khí-lâi;

26

In chiūⁿ kàu kiong-chhong, lo̍h kàu hái-tóe; In in-ūi gûi-hiám, sîn-hûn chiū siau-sòaⁿ.

27

In tian-tian tó-tó, tang-tó sai-oai, chhin-chhiūⁿ chiú-chùi ê lâng, In ê tì-hūi bû-hoat khó-si.

28

In chiū tī khó͘-lān-tiong ai-kiû Iâ-hô-hoa, I tùi in ê hōan-lān-tiong chhōa in chhut--lâi.

29

I hō͘ kông-hong tiāⁿ, Hái-éng chiū pêng-chēng.

30

Hong tiāⁿ, éng chēng, in chiū hoaⁿ-hí; I chiū chhōa in kàu só͘ ài khì ê hái-kháu.

31

Ūi-tio̍h Iâ-hô-hoa ê chû-ài kap I tùi sè-kan-lâng só͘ kiâⁿ ê kî-sū, Gōan lâng lóng o-ló I.

32

Gōan in tī peh-sìⁿ ê hōe-tiong chun I chòe kôaiⁿ, Tī tióng-ló ê chē-ūi o-ló I.

33

I hō͘ kang-hô pìⁿ-chòe khòng-iá, Hō͘ chúi-chôaⁿ pìⁿ-chòe ta-sò ê tōe.

34

I hō͘ pûi-tōe pìⁿ kiâm ê tōe, Lóng sī in-ūi khiā-khí tī-hia ê lâng ê chōe-ok.

35

I hō͘ khòng-iá pìⁿ-chòe thâm-khut, Hō͘ ta-tōe pìⁿ-chòe chúi-chôaⁿ.

36

I hō͘ iau-gō ê lâng tiàm tī-hia, Hō͘ in ōe khí-chō thang khiā-khí ê siâⁿ;

37

Koh chèng-choh chhân-hn̂g, chai phû-tô, Tit-tio̍h só͘ chhut ê thó͘-sán.

38

I koh siúⁿ-sù hok-khì hō͘ in, hō͘ in siⁿ-thòaⁿ chōe-chōe, Ia̍h hō͘ in ê cheng-siⁿ bô kiám-chió.

39

In koh in-ūi pō-gio̍k, hōan-lān, iu-khó͘, Chiū kiám-chió koh pi-kē.

40

I hō͘ kùi-cho̍k siū khòaⁿ-khin, Hō͘ in phiau-liû tī pha-hng bô lō͘ ê só͘-chāi.

41

Chóng-sī I kú-khí sòng-hiong lâng, hō͘ in thoat-lī khó͘-lān, Hō͘ i ê ka-cho̍k heng-ōng chhin-chhiūⁿ iûⁿ-kûn.

42

Chèng-tı̍t ê lâng beh khòaⁿ-kìⁿ lâi hoaⁿ-hí; It-chhè pháiⁿ-lâng ê chhùi beh that-ba̍t.

43

Kìⁿ-nā ū tì-hūi ê lâng beh koan-sim chiah ê tāi-chì, Ia̍h beh siàu-liām Iâ-hô-hoa ê chû-ài.