Si-phian 第 108 章 - 巴克禮全羅

1

Tāi-pı̍t ê si-koa.1) Siōng-tè ah, góa ê sim chū-chāi; Góa beh gîm-si, góa ê sim-sîn beh chhiùⁿ-koa o-ló.

2

Khîm--ah, sek--ah, lín tio̍h cheng-sîn khí-lâi; Góa pún-sin beh chin-chá cheng-sîn khí--lâi.

3

Iâ-hô-hoa ah, góa beh tī bān peh-sìⁿ ê tiong-kan kám-siā Lí; Tī lia̍t-pang ê tiong-kan chhiùⁿ-koa o-ló Lí.

4

In-ūi Lí ê chû-ài khah-tōa thiⁿ, Lí ê sêng-sı̍t kàu kiong-chhong.

5

Siōng-tè ah, gōan Lí kôaiⁿ-tōa pôaⁿ-kè chiah ê thiⁿ; Gōan Lí ê êng-kng pôaⁿ-kè chôan-tōe.

6

Kiû Lí thiaⁿ góan, ēng chiàⁿ-chhiú khan-kiù góan; Thang hō͘ Lí só͘ thiàⁿ ê lâng tit-tio̍h kiù.

7

Siōng-tè í-keng chí I ê sèng-kiat lâi kóng, Góa beh tāi-ia̍t; Góa beh pun-khui Sī-kiàm, niû Sò͘-kat ê soaⁿ-kok.

8

Ki-lia̍t sī Góa-ê; Má-ná-se ia̍h sī Góa-ê; Í-hoat-liân sī Góa ê thâu-khoe; Iû-tāi sī Góa ê kôan-pèng.

9

Mô͘-ap beh chòe Góa ê e̍k-phûn; Góa beh hiat góa ê ôe tī Í-tong; Góa beh in-ūi khah-iâⁿ Hui-lī-sū lâi tōa-siaⁿ hoah.

10

Chī-chūi ōe chhōa góa jı̍p kian-kò͘ ê siâⁿ? Chī-chūi chhōa góa jı̍p Í-tong ê tōe?

11

Siōng-tè ah, Lí kiàm m̄-sī khì-sak góan mah? Siōng-tè ah, Lí bô kap góan ê kun-peng saⁿ-kap khì.

12

Kiû Lí pang-chān góan, kong-kek tùi-te̍k; In-ūi lâng ê chín-kiù sī khang-khang.

13

Góan óa-khò Siōng-tè, chòe-chiâⁿ tōa tāi-chì; In-ūi thún-ta̍h góan ê tùi-te̍k--ê, chiū-sī I.