Si-phian 第 109 章 - 巴克禮全羅

1

Tāi-pı̍t ê si; kau hō͘ Ga̍k-koaⁿ.1) Góa só͘ o-ló ê Siōng-tè ah, kiû Lí bo̍h-tit chēng-chēng;

2

In-ūi pháiⁿ-lâng ê chhùi, kap kan-chà ê chhùi, in í-keng thí-khui kong-kek góa; In ēng pe̍h-chha̍t ê chı̍h tùi góa kóng-ōe.

3

In ēng òan-hūn ê ōe pau-ûi góa; Koh bô in-toaⁿ lâi kong-kek góa.

4

Góa thiàⁿ--in, in hóan-tńg chòe góa ê tùi-te̍k; To̍k-to̍k góa choan-bū kî-tó.

5

In tùi góa ēng pháiⁿ pò hó, Ēng òan-hūn pò jîn-ài.

6

Gōan Lí phài chı̍t ê pháiⁿ-lâng kóan-hat i, Phài chı̍t ê tùi-te̍k khiā tī i ê chiàⁿ-pêng.

7

I siū sím-phòaⁿ ê sî, gōan i chhut-lâi siū tēng-chōe; Gōan i ê kî-tó pìⁿ-chòe chōe-kòa.

8

Gōan i ê jı̍t-chí té-chió; Gōan pa̍t-lâng tit-tio̍h i ê chit.

9

Gōan i ê kiáⁿ-jî chòe ko͘-jî, I ê bó͘ chòe kóaⁿ-hū.

10

Gōan i ê kiáⁿ-jî sì-kòe khì kiû-khit; Tùi in pha-hng ê só͘-chāi chhut-lâi thó-chia̍h.

11

Gōan chè-chú ēng kè-tì chhú i it-chhè só͘-ū--ê; Gōan siⁿ-hūn-lâng chhiúⁿ i tio̍h-bòa só͘ tit-tio̍h--ê.

12

Gōan bô lâng chiap-sio̍k si-un hō͘ i; Gōan bô lâng khó-lîn i ê ko͘-jî.

13

Gōan i ê hō͘-è tōan-cho̍at, In ê miâ-jī siū chhat-bia̍t, bô thôan tī ē-tāi.

14

Gōan i ê chó͘-kong ê chōe-ok hō͘ Iâ-hô-hoa kì-tit; Gōan i ê lāu-bú ê chē-kòa bô tit-tio̍h chhat-siau.

15

Gōan hiah ê chōe-ok siông-siông tī Iâ-hô-hoa ê bīn-chêng, Tì-kàu I bia̍t in ê miâ tī sè-kan.

16

In-ūi i bô siūⁿ-tio̍h beh kiâⁿ lîn-bín; Hóan-tńg khún-pek hit ê sòng-hiong khùn-khó͘ ê lâng, Beh hāi-sí hiah ê siong-sim ê lâng.

17

I ài chiù-chó͘, chiù-chó͘ chiū kàu tī i; I m̄-ài chiok-hok, chiok-hok chiū lī-khui i hn̄g-hn̄g.

18

I ēng chiù-chó͘ chòe saⁿ lâi chhēng; chiù-chó͘ chiū chhin-chhiūⁿ chúi jı̍p i ê pak-lāi, Chhin-chhiūⁿ iû jı̍p i ê kut.

19

Gōan chit ê chiù-chó͘ chòe i chhēng tī sin-khu ê i-ho̍k, Chòe i siông-siông hâ ê io-tòa.

20

Che chiū-sī góa ê tùi-te̍k, kap ēng pháiⁿ-ōe kong-kek góa ê sîn-hûn ê lâng, Tùi Iâ-hô-hoa hia só͘ siū ê pò-èng.

21

Chú Iâ-hô-hoa ah, kiû Lí in-ūi Lí ê miâ hó khóan-thāi góa; In-ūi Lí ê chû-ài chin-hó, kiû Lí khan-kiù góa.

22

In-ūi góa sòng-hiong, khùn-khó͘, Góa ê lāi-sim siū-siong.

23

Góa ê hè-siū chhin-chhiūⁿ jı̍t-iáⁿ chiām-chiām chhiâ; Góa chhin-chhiūⁿ chháu-meh siū kóaⁿ-chhut.

24

Góa in-ūi kìm-chia̍h, kha-thâu-u sng-nńg; Góa ê bah siau-sán, bô lūn-te̍k.

25

Góa siū in ê húi-pòng; In khòaⁿ-kìⁿ góa, chiū iô-thâu.

26

Iâ-hô-hoa góa ê Siōng-tè ah, kiû Lí pang-chān góa; Chiàu Lí ê chû-ài chín-kiù góa;

27

Hō͘ in chai che sī chhut tī Lí ê chhiú; Sī Lí Iâ-hô-hoa só͘ kiâⁿ ê sū.

28

Chhut-chāi in chiù-chó͘, kiû Lí sù-hok; In khí--lâi ê sî, beh tú-tio̍h kiàn-siàu, Lí ê lô͘-po̍k beh hoaⁿ-hí.

29

Gōan góa ê tùi-te̍k ēng lêng-jio̍k chòe-saⁿ chhēng; Gōan in ēng in ê kiàn-siàu chòe phàu, moa sin-khu.

30

Góa beh ēng góa ê chhùi tōa-tōa kám-siā Iâ-hô-hoa; Góa beh tī chèng-lâng ê tiong-kan o-ló I.

31

In-ūi I beh khiā tī sòng-hiong lâng ê chiàⁿ-pêng, Beh kiù i thoat-lī sím-phòaⁿ i ê sìⁿ-miā ê lâng.