Si-phian 第 110 章 - 巴克禮全羅

1

Tāi-pı̍t ê si.1) Iâ-hô-hoa tùi góa ê chú kóng, Lí chē Góa ê iū-pêng, Thèng-hāu Góa hō͘ lí ê tùi-te̍k chòe Lí ê kha-ta̍h.

2

Iâ-hô-hoa beh tùi Sek-an chhun-chhut lí ū lêng-le̍k ê kóaiⁿ; Lí tio̍h tī lí tùi-te̍k ê tiong-kan chiáng-kôan.

3

Lí chhut-kun ê jı̍t, lí ê peh-sìⁿ beh ēng sèng-kiat ê chng-thāⁿ chòe saⁿ, kam-sim hiàn ka-kī; Lí ê chòng-teng kui-óa lí, chhin-chhiūⁿ chá-khí-sî só͘ kiat ê lō͘-chúi.

4

Iâ-hô-hoa í-keng chiù-chōa, tek-khak bô thè-hóe, kóng, Lí éng-óan chòe chè-si, Chiàu Be̍k-ki-sé-tek ê pan-lia̍t.

5

Tī lí chiàⁿ-pêng ê Chú, Tng I siū-khì ê jı̍t, beh phah-pāi lia̍t-ông.

6

I beh tī lia̍t-pang-tiong lâi sím-phòaⁿ, I beh hō͘ sin-si piàn-móa ta̍k só͘-chāi; I beh tī chōe-chōe kok phah-phòa tùi-te̍k ê thâu-khak.

7

I beh lim lō͘-piⁿ ê khoe-chúi; In-ūi án-ni, i beh kia̍h-khí thâu.