Si-phian 第 111 章 - 巴克禮全羅

1

Lín tio̍h o-ló Iâ-hô-hoa. Tī chèng-tı̍t lâng ê hōe-tiong, kap kong-hōe tiong, Góa beh choan-sim kám-siā Iâ-hô-hoa.

2

Iâ-hô-hoa ê só͘ chòe chin-tōa, Hōan-nā hoaⁿ-hí I só͘ chòe--ê, lóng beh chhâ-khó i.

3

I só͘ kiâⁿ--ê sī chun-kùi ui-giâm; I ê gī éng-éng tī-teh.

4

I kiâⁿ kî-sū, hō͘ lâng kì-liām; Iâ-hô-hoa ū un-hūi, ū lîn-bín.

5

I siúⁿ-sù bí-niû hō͘ kèng-ùi I ê lâng; I beh éng-óan kì-liām I ê iok.

6

I chiong I tōa kôan-lêng ê só͘-chòe hián-bêng tī I ê peh-sìⁿ; Chiong lia̍t-pang ê gia̍p siúⁿ-sù in.

7

I ê chhiú só͘-chòe sī sêng-sı̍t kong-pêng; I ê kà-sī lóng sī khak-sı̍t.

8

Sī éng sè-tāi kian-kò͘--ê, Sī chiàu sêng-sı̍t chèng-tı̍t siat-lı̍p--ê.

9

I ǹg I ê peh-sìⁿ si-hêng kiù-sio̍k; I tiāⁿ-tio̍h I ê iok, tı̍t-kàu éng-óan; I ê miâ sī sèng, thang kiaⁿ-ùi.

10

Kèng-ùi Iâ-hô-hoa sī tì-hūi ê kun-pún; Kìⁿ-nā chiàu án-ni kiâⁿ-ê, chiah ū chhang-miâ; Iâ-hô-hoa ê miâ-siaⁿ tı̍t-kàu éng-óan.