Si-phian 第 112 章 - 巴克禮全羅

1

Lín tio̍h o-ló Iâ-hô-hoa. Kèng-ùi Iâ-hô-hoa, tōa hoaⁿ-hí I ê bēng-lēng--ê, Chit-hō lâng ū hok-khì.

2

I ê hō͘-è tī sè-kan tek-khak kiông-sēng; Chèng-tı̍t ê lâng ê āu-tāi, tek-khak beh tit-tio̍h hok-khì.

3

I ê ke-lāi ū hè-mı̍h, ū chîⁿ-châi; I ê kong-gī chûn kàu éng-óan.

4

Chèng-tı̍t ê lâng tī o͘-àm ê tiong-kan, ū kng ūi-tio̍h i hoat-hiān; I ū un-hūi, ū lîn-bín, ū kong-gī.

5

Si-un lâi chioh lâng--ê, ū hok-khì; I siū sím-phòaⁿ ê sî, beh sò͘-bêng ka-kī ê sū.

6

I éng-éng bô iô-choah; Gī-lâng siū kì-liām, tı̍t-kàu éng-óan.

7

I m̄-kiaⁿ pháiⁿ siau-sit; I ê sim kian-kò͘, óa-khò Iâ-hô-hoa.

8

I ê sim chū-chāi, lóng bô kiaⁿ-hiâⁿ, Tı̍t-kàu i khòaⁿ-kìⁿ i ê tùi-te̍k siū pò-èng.

9

I tōa siá-si, i chín-chè sòng-hiong lâng; I ê jîn-gī chûn kàu éng-óan; I ê kak tit-tio̍h kú-khí, ū êng-kng.

10

Pháiⁿ-lâng khòaⁿ-liáu bōe-khat-tit, Tek-khak kā-gê chhiat-chhí, lâi siau-bia̍t; Pháiⁿ-lâng ê sim-gōan beh kui tī bô.