Si-phian 第 118 章 - 巴克禮全羅

1

Lín tio̍h kám-siā Iâ-hô-hoa, in-ūi I sī hó; In-ūi I ê chû-ài éng-óan tī-teh.

2

Gōan Í-sek-lia̍t kóng, I ê chû-ài éng-óan tī-teh.

3

Gōan A-lûn ê ke kóng, I ê chû-ài éng-óan tī-teh.

4

Gōan kèng-ùi Iâ-hô-hoa ê lâng kóng, I ê chû-ài éng-óan tī-teh.

5

Góa tī gûi-kip ê tiong-kan kiû-kiò Iâ-hô-hoa; Iâ-hô-hoa chiū ìn góa, chiong góa hē tī khoan-khoah ê só͘-chāi.

6

Ū Iâ-hô-hoa kap góa tī-teh, góa chiū bô kiaⁿ; Lâng beh siáⁿ hoat-tit góa ta-ôa?

7

Tī hiah ê pang-chān góa--ê ê tiong-kan, ū Iâ-hô-hoa kap góa tī-teh; Só͘-í góa beh khòaⁿ-kìⁿ hiah ê òan-hūn góa ê lâng siū pò-èng.

8

Óa-khò Iâ-hô-hoa, Pí óa-khò lâng khah-hó.

9

Óa-khò Iâ-hô-hoa, Pí óa-khò ông-chhin khah-hó.

10

Bān peh-sìⁿ ûi-lûi góa; Góa óa-khò Iâ-hô-hoa ê miâ, beh châu-bia̍t in.

11

In ûi--góa, khùn--góa; Góa óa-khò Iâ-hô-hoa ê miâ, beh châu-bia̍t in.

12

In chhin-chhiūⁿ phang ûi góa; Chhin-chhiūⁿ sio chhì-phè ê hé, siū phah-hoa. Góa óa-khò Iâ-hô-hoa ê miâ beh châu-bia̍t in.

13

Lí chhut-la̍t chhia góa, beh hō͘ góa tó; Chóng-sī Iâ-hô-hoa pang-chān góa.

14

Iâ-hô-hoa sī góa ê khùi-la̍t, sī góa ê si-koa; I ia̍h chiâⁿ-chòe chín-kiù góa ê.

15

Tī gī-lâng ê pò͘-pîⁿ-lāi ū hoaⁿ-hí ê siaⁿ, chín-kiù ê siaⁿ; Iâ-hô-hoa ê chiàⁿ-chhiú si-chhut tōa kôan-lêng.

16

Iâ-hô-hoa ê chiàⁿ-chhiú kia̍h-kôaiⁿ; Iâ-hô-hoa ê chiàⁿ-chhiú si-chhut tōa kôan-lêng.

17

Góa bōe tì-kàu sí, iáu ōe o̍ah-teh; Sòa beh pò-iông Iâ-hô-hoa ê só͘-chòe.

18

Iâ-hô-hoa bat giâm-giâm kéng-kài góa; Chóng-sī bē ū chiong góa kau tī sí-bô.

19

Tio̍h kā góa khui gī ê mn̂g; Góa beh jı̍p--khì, kám-siā Iâ-hô-hoa.

20

Che sī Iâ-hô-hoa ê mn̂g, Gī ê lâng beh jı̍p--khì.

21

Góa beh kám-siā Lí, in-ūi Lí í-keng ìn góa; Koh chiâⁿ-chòe chín-kiù góa--ê.

22

Sai-hū só͘ khì-sak ê chio̍h, Í-keng chiâⁿ-chòe chhù-kak-thâu ê chio̍h.

23

Che sī Iâ-hô-hoa só͘-chòe--ê, Lán ê ba̍k-chiu khòaⁿ i chòe kî-kòai.

24

Che sī Iâ-hô-hoa só͘ tiāⁿ-tio̍h ê jı̍t; Lán tī chit-jı̍t ê tiong-kan beh hoaⁿ-hí khòai-lo̍k.

25

Iâ-hô-hoa ah, taⁿ kiû Lí chín-kiù; Iâ-hô-hoa ah, taⁿ kiû Lí hō͘ góan hoat-ta̍t.

26

Hōng Iâ-hô-hoa ê miâ lâi--ê, eng-kai tit-tio̍h hok-khì; Góan tùi Iâ-hô-hoa ê chhù kā lín chiok-hok.

27

Iâ-hô-hoa sī Siōng-tè, I ê kng chiò góan; Tio̍h ēng soh pa̍k chè-sū ê cheng-siⁿ kàu tôaⁿ-kak.

28

Lí sī góa ê Siōng-tè, góa beh kám-siā Lí; Lí sī góa ê Siōng-tè, góa beh chun Lí chòe kôaiⁿ.

29

Lín tio̍h kám-siā Iâ-hô-hoa, in-ūi I sī hó; In-ūi I ê chû-ài éng-óan tī-teh.