Si-phian 第 119 章 - 巴克禮全羅

1

Só͘ kiâⁿ ôan-chôan, chun-thàn Iâ-hô-hoa lu̍t-hoat ê, Chit-hō lâng ū hok-khì.

2

Chun-siú I kan-chèng ê ōe, Choan-sim chhē I--ê, chit-hō lâng ū hok-khì.

3

In bô chòe put-gī ê sū; In chun-thàn I ê tō-lō͘.

4

Lí bat chiong Lí kà-sī ê ōe hoan-hù góan; Sī ài góan un-khûn chun-siú.

5

Gōan góa ê chhu-hiòng tiāⁿ-tio̍h, Lâi siú Lí ê lu̍t-lē.

6

Góa tùi-tiōng Lí it-chhè ê kài-bēng, Chiū put-tì kiàn-siàu.

7

Góa ha̍k-sı̍p Lí kong-gī ê phòaⁿ-tòan, Chiū beh ēng chèng-tı̍t ê sim kám-siā Lí.

8

Góa beh siú Lí ê lu̍t-lē; Kiû Lí m̄-thang it-chīn pàng-sak góa.

9

Siàu-liân lâng tio̍h ēng sím-mı̍h lâi chheng-khì i ê só͘-kiâⁿ? Sī tio̍h chiàu Lí ê ōe lâi sòe-jī kiâⁿ.

10

Góa choan-sim chhē Lí; Kiû Lí m̄-thang hō͘ góa bê-lō͘ lī-khui Lí ê kài-bēng.

11

Góa chiong Lí ê giân-gú khǹg tī góa ê sim-lāi, Bián-tit góa tek-chōe Lí.

12

Iâ-hô-hoa ah, Lí sī eng-kai siū o-ló--ê; Kiû Lí chiong Lí ê lu̍t-lē kà-sī góa.

13

Lí só͘ kóng it-chhè ê phòaⁿ-sû, Góa ēng chhùi-tûn pò-iông--i.

14

Góa hoaⁿ-hí Lí kan-chèng ê lō͘, Chhin-chhiūⁿ hoaⁿ-hí it-chhè ê châi-bu̍t.

15

Góa beh chēng-chēng siūⁿ Lí kà-sī ê ōe, Ia̍h beh chù-tiōng Lí ê tō-lō͘.

16

Góa beh tī Lí ê lu̍t-lē-tiong ka-kī khòai-lo̍k, Góa bô bōe-kì-tit Lí ê ōe.

17

Kiû Lí ēng tōa-un khóan-thāi Lí ê lô͘-po̍k, hō͘ góa tit-tio̍h o̍ah; Góa chiū beh siú Lí ê ōe.

18

Kiû Lí khui góa ê ba̍k-chiu, Hō͘ góa khòaⁿ-chhut Lí lu̍t-hoat-tiong ê kî-biāu.

19

Góa tī tōe-chiūⁿ sī chòe kià-kha--ê; Kiû Lí m̄-thang tùi góa ún-ba̍t Lí ê kài-bēng.

20

Góa ê sim piak-lı̍h, In-ūi sî-siông chhiat-chhiat him-bō͘ Lí ê phòaⁿ-sû.

21

Lí chek-pī kiau-ngō͘ siū chiù-chó͘ ê lâng, Chiū-sī bê-lō͘ lī-khui Lí ê kài-bēng ê lâng.

22

Kiû Lí kā góa tû--khì lêng-jio̍k kap khòaⁿ-khin, In-ūi góa siú Lí kan-chèng ê ōe.

23

Kùi-cho̍k chē-teh, lām-sám gī-lūn góa; Nā-sī Lí ê lô͘-po̍k chēng-chēng siūⁿ Lí ê lu̍t-lē.

24

Lí kan-chèng ê ōe sī góa só͘ hoaⁿ-hí--ê, Sī góa ê bô͘-sū.

25

Góa ê sìⁿ-miā kha̍h-tiâu tī thô͘-hún, Kiû Lí, chiàu Lí ê ōe, chín-kiù góa o̍ah.

26

Góa kóng-khí góa só͘ kiâⁿ ê lō͘, Lí ìn góa; Kiû Lí chiong Lí ê lu̍t-lē kà-sī góa.

27

Kiû Lí hō͘ góa bêng-pe̍k Lí kà-sī ê lō͘, Góa chiū chēng-chēng siūⁿ Lí ê kî-sū.

28

Góa ê sim-sîn in-ūi iu-khó͘ lâi siau-iûⁿ; Kiû Lí, chiàu Lí ê ōe, hō͘ góa ióng-kiāⁿ.

29

Kiû Lí hō͘ góa lī-khui kan-chà ê lō͘, Chiong Lí ê lu̍t-hoat un-sù góa.

30

Góa ū kéng sìn-sı̍t ê lō͘, Chiong Lí ê phòaⁿ-sû hē tī góa ê bīn-chêng.

31

Góa lôan-bō͘ Lí kan-chèng ê ōe; Iâ-hô-hoa ah, kiû Lí m̄-thang hō͘ góa kiàn-siàu.

32

Lí khui-khoah góa ê sim ê sî, Góa chiū cháu tī Lí kài-bēng ê lō͘.

33

Iâ-hô-hoa ah, kiû Lí chiong Lí lu̍t-lē ê lō͘ chí-sī góa; Góa beh thiat-tí chun-siú.

34

Kiû Lí hō͘ góa tì-hūi, góa chiū siú Lí ê lu̍t-hoat; Koh beh choan-sim chip-siú.

35

Kiû Lí hō͘ góa kiâⁿ Lí kài-bēng ê lō͘, In-ūi chit ê lō͘ sī góa só͘ hoaⁿ-hí ê.

36

Kiû Lí hō͘ góa ê sim ǹg Lí kan-chèng ê ōe, Bô ǹg put-gī ê chîⁿ-châi.

37

Kiû Lí hō͘ góa ê ba̍k-chiu o̍at-cháu, bô khòaⁿ hu-ké; Koh hō͘ góa tī Lí ê lō͘-tiong lâi o̍ah.

38

Lí ê lô͘-po̍k kèng-ùi Lí, Kiû Lí ūi i kian-kò͘ Lí ê ōe.

39

Kiû Lí hō͘ góa só͘ kiaⁿ ê lêng-jio̍k lī-khui góa; In-ūi Lí ê phòaⁿ-sû sī hó.

40

Góa him-bō͘ Lí kà-sī ê ōe; Kiû Lí, tī Lí ê kong-gī, hō͘ góa lâi o̍ah.

41

Iâ-hô-hoa ah, gōan Lí chiàu Lí ê ōe, Hō͘ Lí ê chû-ài, chiū-sī Lí ê kiù-un, lîm-kàu góa.

42

Góa chiū ū ōe thang ìn hit ê lêng-jio̍k góa--ê; In-ūi góa óa-khò Lí ê ōe.

43

Kiû Lí hō͘ chin-lí ê ōe bô it-chīn lī-khui góa ê chhùi; In-ūi góa ǹg-bāng Lí ê phòaⁿ-tòan.

44

Góa beh siông-siông siú Lí ê lu̍t-hoat, Tı̍t-kàu éng-óan.

45

Góa beh kiâⁿ tī khoan-khoah ê só͘-chāi, In-ūi góa ū káng-kiù Lí kà-sī ê ōe.

46

Góa ia̍h beh tī kun-ông ê bīn-chêng káng-lūn Lí kan-chèng ê ōe, Ia̍h bô tì-kàu kiàn-siàu.

47

Góa beh tī Lí ê kài-bēng-tiong ka-kī khòai-lo̍k; Chiah ê kài-bēng pêng-sò͘ sī góa só͘ thiàⁿ-sioh--ê.

48

Góa thiàⁿ-sioh Lí ê kài-bēng, góa beh tùi i kia̍h-khí chhiú; Lí ê lu̍t-lē góa ia̍h beh chēng-chēng siūⁿ i.

49

Kiû Lí kì-tit tùi Lí ê lô͘-po̍k só͘ èng-ún ê ōe, In-ūi Lí bat hō͘ góa ū ǹg-bāng.

50

Lí ê ōe chiong góa kiù-o̍ah, Góa tī hōan-lān-tiong tùi che tit-tio̍h an-ùi.

51

Kiau-ngō͘ ê lâng chīn-chāi bú-bān góa; Chóng-sī góa bē-bat phian-lī Lí ê lu̍t-hoat.

52

Iâ-hô-hoa ah, góa kì-liām Lí tùi chá í-lâi ê phòaⁿ-sû, Chiū ka-kī tit-tio̍h an-ùi.

53

Góa in-ūi khì-sak Lí ê lu̍t-hoat ê pháiⁿ-lâng, Chiū tōa siū-khì, chhin-chhiūⁿ hé to̍h.

54

Góa tī kià-kha ê chhù, Pêng-sî ēng Lí ê lu̍t-lē chòe si-koa.

55

Iâ-hô-hoa ah, góa mî-kan kì-liām Lí ê miâ, Siú Lí ê lu̍t-hoat.

56

Góa tit-tio̍h án-ni, Sī in-ūi góa siú Lí kà-sī ê ōe.

57

Iâ-hô-hoa sī góa ê ki-gia̍p, Góa bat kóng, Góa beh siú Lí ê ōe.

58

Góa bat choan-sim kiû Lí ê un, Gōan Lí chiàu Lí ê ōe lîn-bín góa.

59

Góa chhim-chhim siūⁿ góa só͘ kiâⁿ ê lō͘, Chiū o̍at-tńg kha ǹg Lí kan-chèng ê ōe.

60

Góa siú Lí ê kài-bēng, Kóaⁿ-kín bô iân-chhiân.

61

Pháiⁿ-lâng ê soh pa̍k-tîⁿ góa; Chóng-sī góa bô bōe-kì-tit Lí ê lu̍t-hoat.

62

Góa in-ūi Lí kong-gī ê phòaⁿ-tòan, Pòaⁿ-mî beh khí-lâi kám-siā Lí.

63

Kìⁿ-nā kèng-ùi Lí, kap siú Lí ê kà-sī ê lâng, Góa kap in chòe-phōaⁿ.

64

Iâ-hô-hoa ah, Lí chû-ài piàn-móa tōe-bīn; Kiû Lí chiong Lí ê lu̍t-lē kà-sī góa.

65

Iâ-hô-hoa ah, Lí bat hó khóan-thāi Lí ê lô͘-po̍k, Sī chiàu Lí só͘ kóng ê ōe.

66

Kiû Lí chiong hó ê chhang-miâ kap tì-sek, kà-sī góa; In-ūi góa sìn Lí ê kài-bēng.

67

Góa bē siū-khó͘ í-chêng, ū kiâⁿ bê-lō͘; Chóng-sī góa taⁿ siú Lí ê ōe.

68

Lí sī hó, só͘-kiâⁿ ia̍h sī hó; Kiû Lí chiong Lí ê lu̍t-lē kà-sī góa.

69

Kiau-ngō͘ ê lâng chō-chok bô-iáⁿ ōe, kong-kek góa; Chóng-sī góa beh choan-sim siú Lí ê kà-sī.

70

In ê sim tūn, chhin-chhiūⁿ iû pau-ba̍t; Chóng-sī góa hoaⁿ-hí Lí ê lu̍t-hoat.

71

Góa ū siū-khó͘, sī chòe góa ê lī-ek; In-ūi beh hō͘ góa ha̍k-sı̍p Lí ê lu̍t-lē.

72

Lí só͘ kóng ê lu̍t-hoat sī chòe góa ê lī-ek; Iâⁿ-kè chheng-bān ê kim-gûn.

73

Lí ê chhiú chhòng-chō góa, chhiâⁿ-tî góa; Kiû Lí hō͘ góa tì-hūi, thang ha̍k-sı̍p Lí ê kài-bēng.

74

Kèng-ùi Lí ê lâng khòaⁿ-kìⁿ góa chiū beh hoaⁿ-hí; In-ūi tī Lí ê ōe, góa ū ǹg-bāng.

75

Iâ-hô-hoa ah, góa chai Lí ê phòaⁿ-tòan sī kong-gī; Lí hō͘ góa siū-khó͘ sī tùi tī sìn-sı̍t.

76

Kiû Lí ēng Lí ê chû-ài an-ùi góa; Chiàu Lí tùi Lí ê lô͘-po̍k só͘ kóng ê ōe.

77

Gōan Lí ê chû-pi lîm-kàu góa, hō͘ góa o̍ah; In-ūi Lí ê lu̍t-hoat sī góa só͘ hoaⁿ-hí--ê.

78

Gōan kiau-ngō͘ ê lâng siū kiàn-siàu, in-ūi in bô lí-iû óng-khut góa; Chóng-sī góa beh chēng-chēng siūⁿ Lí ê kà-sī.

79

Gōan kèng-ùi Lí ê lâng kui-ǹg góa; In chiū chai Lí kan-chèng ê ōe.

80

Gōan góa ê sim ôan-chôan siú Lí ê lu̍t-lē, Hō͘ góa put-tì kiàn-siàu.

81

Góa ê sim-sîn him-bō͘ Lí ê kiù-un kàu hūn--khì; Chóng-sī tī Lí ê ōe, góa ū ǹg-bāng.

82

Góa in-ūi ǹg-bāng Lí ê ōe, ba̍k-chiu hoe, Kóng, Lí sím-mı̍h sî beh an-ùi góa?

83

In-ūi góa chhin-chhiūⁿ tī hé-hun-tiong ê phê-tē; Chóng-sī góa bô bōe-kì-tit Lí ê lu̍t-lē.

84

Lí ê lô͘-po̍k ê jı̍t-chí ū jōa-chōe ah? Lí beh tī-sî sím-phòaⁿ khún-pek góa ê lâng.

85

Kiau-ngō͘ ê lâng, chiū-sī bô thàn Lí ê lu̍t-hoat--ê, Ku̍t hām-khiⁿ, beh hāi góa.

86

Lí ê kài-bēng it-chīn sêng-sı̍t; in bô in-toaⁿ khún-pek góa; Kiû Lí pang-chān góa.

87

In hiám-hiám bia̍t-bô góa tī sè-kan; Chóng-sī góa bô pàng-sak Lí ê kà-sī.

88

Kiû Lí chiàu Lí ê chû-ài hō͘ góa o̍ah; Góa chiū beh siú Lí ê chhùi kan-chèng ê ōe.

89

Iâ-hô-hoa ah, Lí ê ōe an-tiāⁿ tī thiⁿ--nih, Tı̍t-kàu éng-óan.

90

Lí ê sêng-sı̍t chûn kàu bān-tāi; Lí kiàn-lı̍p tōe, tōe chiū tn̂g-tn̂g tī--teh.

91

Chiàu Lí ê tēng-lē, in kàu-taⁿ iáu tī--teh; In-ūi bān-mı̍h lóng sī Lí ê chhe-ēng.

92

Góa nā m̄-sī hoaⁿ-hí Lí ê lu̍t-hoat, Chiū chá-chá tī góa ê khó͘-lān-tiong bia̍t-bô lah.

93

Góa éng-éng bô bōe-kì-tit Lí ê kà-sī; In-ūi Lí ēng che hō͘ góa o̍ah.

94

Góa sī Lí-ê, kiû Lí kiù góa; In-ūi góa chhē Lí ê kà-sī.

95

Pháiⁿ-lâng tng-tán góa, beh bia̍t-bô góa, Chóng-sī góa beh káng-kiù Lí kan-chèng ê ōe.

96

Góa khòaⁿ só͘-ū ê ôan-chôan, lóng sī iú-hān; To̍k-to̍k Lí ê bēng-lēng ke̍k-kî khui-khoah.

97

Góa thiàⁿ-sioh Lí ê lu̍t-hoat kàu cháiⁿ-iūⁿ ah! Góa thong-jı̍t chēng-chēng siūⁿ.

98

Lí ê kài-bēng siông-siông kap góa tī--teh, Hō͘ góa pí góa ê tùi-te̍k khah ū tì-hūi.

99

Góa pí góa lóng-chóng ê sian-siⁿ khah thong-ta̍t; In-ūi góa chēng-chēng siūⁿ Lí kan-chèng ê ōe.

100

Góa pí lāu-lâng khah bêng-pe̍k, In-ūi góa siú Lí ê kà-sī.

101

Góa kìm góa ê kha, it-chhè ê pháiⁿ-lō͘ bô kiâⁿ; Hō͘ góa thang siú Lí ê ōe.

102

Góa bô phian-lī Lí ê phòaⁿ-tòan; In-ūi Lí ū kà-sī góa.

103

Lí ê ōe tī góa ê chiūⁿ-kiuⁿ kàu jōa tiⁿ! Tī góa ê chhùi, pí bı̍t khah-tiⁿ.

104

Góa tùi Lí ê kà-sī tit-tio̍h bêng-pe̍k; Só͘-í góa òan-hūn it-chhè ê siâ-lō͘.

105

Lí ê ōe chòe góa kha-chêng ê teng, Chòe góa lō͘-chiūⁿ ê kng.

106

Lí kong-gī ê phòaⁿ-tòan, góa bat chiù-chōa beh chun-siú; Góa koat-tòan án-ni kiâⁿ.

107

Góa siū-khó͘ kàu-ke̍k; Iâ-hô-hoa ah, kiû Lí chiàu Lí ê ōe hō͘ góa o̍ah.

108

Iâ-hô-hoa ah, kiû Lí kàm-la̍p góa ê chhùi só͘ hoaⁿ-hí hiàn ê o-ló, Koh chiong Lí ê phòaⁿ-sû kà-sī góa.

109

Góa ê sìⁿ-miā siông-siông tú-tio̍h gûi-hiám; Iáu-kú góa bô bōe-kì-tit Lí ê lu̍t-hoat.

110

Pháiⁿ-lâng siat lô-bāng beh hāi góa; Chóng-sī góa bô phian-lī Lí ê kà-sī.

111

Góa chiong Lí kan-chèng ê ōe, chòe éng-óan ê ki-gia̍p; In-ūi che sī góa sim-lāi só͘ hoaⁿ-hí--ê.

112

Góa hō͘ góa ê sim choan ǹg Lí ê lu̍t-lē; Éng-óan chun-thàn, tı̍t-kàu lō͘-bé.

113

Nn̄g-iūⁿ sim ê lâng sī góa só͘ thòng-hūn; To̍k-to̍k Lí ê lu̍t-hoat sī góa só͘ thiàⁿ-sioh.

114

Lí sī góa siám-bih ê só͘-chāi, koh sī góa ê tîn-pâi; Góa tī Lí ê ōe ū ǹg-bāng.

115

Chòe-pháiⁿ ê lâng ah, lín tio̍h lī-khui góa; Hō͘ góa thang siú góa ê Siōng-tè ê kài-bēng.

116

Kiû Lí chiàu Lí ê ōe hû-chhî góa, hō͘ góa o̍ah; Ia̍h bô hō͘ góa in-ūi só͘ ǹg-bāng--ê lâi kiàn-siàu.

117

Kiû Lí hû-chhî góa, góa chiū tit-kiù; Góa beh siông-siông tùi-tiōng Lí ê lu̍t-lē.

118

Kìⁿ-nā kiâⁿ chha-lō͘, lī-khui Lí ê lu̍t-lē ê lâng, Lí khòaⁿ-khin in; In-ūi in ê khúi-chà sī hu-ké.

119

Sè-kan ê pháiⁿ-lâng, Lí lóng kā in tû--khì, chhin-chhiūⁿ che-tái; In-ūi án-ni, góa thiàⁿ-sioh Lí kan-chèng ê ōe.

120

Góa in-ūi kiaⁿ-ùi Lí, góa ê bah chiū chhoah; Lí ê phòaⁿ-tòan ia̍h hō͘ góa kiaⁿ-hiâⁿ.

121

Góa péng-kong kiâⁿ-gī; Kiû Lí m̄-thang chiong góa pàng hō͘ ap-chè góa ê lâng.

122

Kiû Lí pó-jīn Lí ê lô͘-po̍k, thang tit-tio̍h hó kéng-gū; Bo̍h-tit hō͘ kiau-ngō͘ ê lâng ap-chè góa.

123

Góa in-ūi ǹg-bāng Lí ê kiù-un, kap Lí kong-gī ê ōe, Tì-kàu ba̍k-chiu hoe.

124

Kiû Lí chiàu Lí ê chû-ài khóan-thāi Lí ê lô͘-po̍k; Chiong Lí ê lu̍t-lē kà-sī góa.

125

Góa sī Lí ê lô͘-po̍k, kiû Lí hō͘ góa tì-hūi; Hō͘ góa ōe chai Lí kan-chèng ê ōe.

126

Hiān-kim tng sī Iâ-hô-hoa kiâⁿ tāi-chì ê sî; In-ūi lâng hòe-bô Lí ê lu̍t-hoat.

127

Só͘-í góa thiàⁿ-sioh Lí ê kài-bēng, Iâⁿ-kè kim, ia̍h iâⁿ-kè hó-kim.

128

Só͘-í Lí it-chhè ê kà-sī, bān-sū, góa lóng lia̍h-chòe chèng-tı̍t; Koh góa òan-hūn it-chhè ê siâ-lō͘.

129

Lí kan-chèng ê ōe sī kî-biāu; Só͘-í góa ê sim kín-sīn chip-siú.

130

Lí ê ōe chı̍t-ē khui-thiah, chiū hoat-chhut kng, Hō͘ gōng-lâng thong-ta̍t.

131

Góa khui-chhùi tı̍t-tı̍t chhóan; In-ūi góa chhiat-chhiat him-bō͘ Lí ê kài-bēng.

132

Kiû Lí o̍at-tńg ǹg góa, lîn-bín góa; Chhin-chhiūⁿ Lí pêng-siông khóan-thāi hiah ê kèng-ài Lí ê miâ ê lâng.

133

Kiû Lí ēng Lí ê ōe hō͘ góa ê kha-pō͘ ún-tàng; Bo̍h iông-ún sím-mı̍h chōe-ok kóan-hat góa.

134

Kiû Lí kiù-sio̍k góa, thoat-lī lâng ê ap-chè, Góa chiū beh siú Lí ê kà-sī.

135

Gōan Lí hō͘ Lí ê bīn ê kng chiò Lí ê lô͘-po̍k; Koh chiong Lí ê lu̍t-lē kà-sī góa.

136

Góa ê ba̍k-sái chhin-chhiūⁿ khoe-chúi teh lâu; In-ūi in bô siú Lí ê lu̍t-hoat.

137

Iâ-hô-hoa, Lí sī kong-gī-ê; Lí ê phòaⁿ-tòan ia̍h sī chèng-tı̍t--ê.

138

Lí só͘ bēng-lēng kan-chèng ê ōe, sī chiàu kong-gī, Ke̍k-kî sêng-sı̍t.

139

Góa ê sim jia̍t, chhin-chhiūⁿ hé sio-bia̍t góa; In-ūi góa ê tùi-te̍k bōe-kì-tit Lí ê ōe.

140

Lí ê ōe thòan-liān kàu chin cheng; Só͘-í Lí ê lô͘-po̍k chin ì-ài.

141

Góa pi-bî, hō͘ lâng khòaⁿ-khin, Chóng-sī góa bô bōe-kì-tit Lí ê kà-sī.

142

Lí ê kong-gī sī éng-óan ê kong-gī; Lí ê lu̍t-hoat sī chin-sı̍t.

143

Góa tú-tio̍h hōan-lān iu-khó͘; Chóng-sī Lí ê kài-bēng sī góa só͘ hoaⁿ-hí--ê.

144

Lí kan-chèng ê ōe éng-óan sī kong-gī; Kiû Lí hō͘ góa tì-hūi, góa chiū ōe o̍ah.

145

Iâ-hô-hoa ah, góa choan-sim kiû-kiò Lí, kiû Lí ìn góa; Góa beh kín-sīn siú Lí ê lu̍t-lē.

146

Góa tùi Lí kiû-kiò, kiû Lí kiù góa; Góa chiū beh siú Lí kan-chèng ê ōe.

147

Góa thàn thiⁿ bē kng kiû-kiò Lí; Tī Lí ê ōe góa ū ǹg-bāng.

148

Mî--sî, kiⁿ iáu-bē chhim, góa ê ba̍k-chiu í-keng nih-khui; In-ūi beh chēng-chēng siūⁿ Lí ê ōe.

149

Kiû Lí chiàu Lí ê chû-ài, thiaⁿ góa ê siaⁿ; Iâ-hô-hoa ah, kiû Lí chiong Lí ê phòaⁿ-tòan, hō͘ góa ōe o̍ah.

150

Kòan-liān kiâⁿ-pháiⁿ ê lâng pek-óa lâi; In lī-khui Lí ê lu̍t-hoat hn̄g-hn̄g.

151

Iâ-hô-hoa ah, Lí sī kūn-kūn; Lí ê kài-bēng lóng sī chin-sı̍t.

152

Góa káng-kiù Lí kan-chèng ê ōe, chá-chá í-keng chai, Sī Lí lı̍p-tiāⁿ kàu éng-óan--ê.

153

Kiû Lí khòaⁿ-kò͘ góa ê khó͘-lān, lâi khan-kiù góa; In-ūi góa bô bōe-kì-tit Lí ê lu̍t-hoat.

154

Kiû Lí kā góa sin-oan, kiù-sio̍k góa; Chiàu Lí ê ōe hō͘ góa o̍ah.

155

Kiù-un lī-khui pháiⁿ-lâng hn̄g-hn̄g; In-ūi in bô chhē Lí ê lu̍t-lē.

156

Iâ-hô-hoa ah, Lí ê chû-pi sī tōa; Kiû Lí chiàu Lí ê phòaⁿ-tòan hō͘ góa o̍ah.

157

Khún-pek góa ê, tí-te̍k góa ê, chin-chōe, Chóng-sī góa bô phian-lī Lí kan-chèng ê ōe.

158

Góa khòaⁿ-kìⁿ kan-ok ê lâng, chiū chin iàm-ò͘ⁿ; In-ūi in bô siú Lí ê ōe.

159

Lí khòaⁿ góa cháiⁿ-iūⁿ thiàⁿ-sioh Lí ê kà-sī; Iâ-hô-hoa ah, kiû Lí chiàu Lí ê chû-ài hō͘ góa o̍ah.

160

Lí ê ōe ê chóng-kun-thâu sī chin-sı̍t; Lí it-chhè kong-gī ê phòaⁿ-tòan sī éng-óan tī-teh.

161

Kùi-cho̍k bô in-toaⁿ khún-pek góa; Chóng-sī góa ê sim kiaⁿ-ùi Lí ê ōe.

162

Góa hoaⁿ-hí Lí ê ōe, Chhin-chhiūⁿ lâng tit-tio̍h chōe-chōe thâi-iâⁿ ê mı̍h.

163

Pe̍h-chha̍t-ōe sī góa só͘ thòng-hūn, só͘ iàm-chiān--ê; Lí ê lu̍t-hoat sī góa só͘ thiàⁿ-sioh--ê.

164

Góa in-ūi Lí kong-gī ê phòaⁿ-tòan, Ta̍k-jı̍t chhit-pái o-ló Lí.

165

Thiàⁿ-sioh Lí ê lu̍t-hoat ê lâng ū tōa pêng-an, Bô chı̍t-hāng ōe tîⁿ-pòaⁿ in ê kha.

166

Iâ-hô-hoa ah, góa ū teh ǹg-bāng Lí ê kiù-un, Ū kiâⁿ Lí ê kài-bēng.

167

Góa ê sim ū siú Lí kan-chèng ê ōe, chiah ê ōe, góa chīn-chāi ì-ài.

168

Góa ū siú Lí ê kà-sī, kap Lí kan-chèng ê ōe; In-ūi góa it-chhè só͘ kiâⁿ--ê, lóng tī Lí ê bīn-chêng.

169

Iâ-hô-hoa ah, gōan góa kiû-kiò ê siaⁿ thàu-kàu Lí ê bīn-chêng; Kiû Lí chiàu Lí ê ōe, siúⁿ-sù góa tì-hūi.

170

Gōan góa khún-kiû ê ōe kàu Lí ê bīn-chêng; Kiû Lí chiàu Lí ê ōe khan-kiù góa.

171

Gōan góa ê chhùi-tûn hoat-chhut o-ló ê ōe, In-ūi Lí chiong Lí ê lu̍t-lē kà-sī góa.

172

Gōan góa ê chı̍h chhiùⁿ-koa o-ló Lí ê ōe; In-ūi Lí it-chhè ê kài-bēng lóng sī kong-gī.

173

Gōan Lí chhun-chhiú pang-chān góa; In-ūi góa ū kéng Lí ê kà-sī.

174

Iâ-hô-hoa ah, góa chhiat-chhiat him-bō͘ Lí ê kiù-un; Lí ê lu̍t-hoat ia̍h sī góa só͘ hoaⁿ-hí--ê.

175

Gōan góa o̍ah--teh, góa ê sîn-hûn chiū beh o-ló Lí; Gōan Lí ê phòaⁿ-tòan pang-chān góa.

176

Góa bê-lō͘ chhin-chhiūⁿ phah-m̄-kìⁿ ê iûⁿ; kiû Lí chhē Lí ê lô͘-po̍k; In-ūi góa bô bōe-kì-tit Lí ê kài-bēng.