Si-phian 第 135 章 - 巴克禮全羅

1

Lín tio̍h o-ló Iâ-hô-hoa. Lín tio̍h o-ló Iâ-hô-hoa ê miâ; Iâ-hô-hoa chiah ê lô͘-po̍k, tiàm tī Iâ-hô-hoa ê chhù,

2

Tiàm tī lán ê Siōng-tè ê chhù ê īⁿ-lāi ê, Lín tio̍h o-ló I.

3

Lín tio̍h o-ló Iâ-hô-hoa, in-ūi Iâ-hô-hoa sī hó; tio̍h chhiùⁿ-koa o-ló I ê miâ, in-ūi che sī chin biāu.

4

In-ūi Iâ-hô-hoa kéng Ngá-kok kui I ka-kī, Kéng Í-sek-lia̍t chòe ka-kī te̍k-pia̍t ê peh-sìⁿ.

5

Góa chai Iâ-hô-hoa chòe tōa, Iā chai lán ê Chú pôaⁿ-kè lóng-chóng ê sîn-bêng.

6

Iâ-hô-hoa tī thiⁿ-téng, tī tōe-chiūⁿ, tī hái-tiong, tī it-chhè ê chhim-ian, Lóng chhut-chāi I ê ì-sù lâi kiâⁿ.

7

I hō͘ hûn-bū tùi tōe-ke̍k chhèng-khí; Ūi-tio̍h hō͘ chhòng-chō sih-nà, Tùi I ê khò͘-pâng tiong tòa hong chhut-lâi.

8

I chiong Ai-kı̍p lâng kap cheng-siⁿ thâu-chiūⁿ-ê, Lóng kā in phah-sí.

9

Ai-kı̍p ah, I kiâⁿ sîn-jiah kî-sū tī lí ê tiong-kan, Tī Hoat-ló kap i ê chèng jîn-sîn.

10

I phah-iâⁿ chōe-chōe pang-kok, Koh thâi-sí tōa kôan-lêng ê ông;

11

Chiū-sī A-mô͘-lī ông Se-hông, Kap Pa-san ông Go̍k, Í-kı̍p Ka-lâm ta̍k-kok.

12

Chiong in ê tōe chòe gia̍p, Chiū-sī hō͘ I ê peh-sìⁿ Í-sek-lia̍t chòe gia̍p.

13

Iâ-hô-hoa ah, Lí ê miâ lâu kàu éng-óan; Iâ-hô-hoa ah, Lí thang kì-liām ê miâ lâu kàu bān-tāi.

14

In-ūi Iâ-hô-hoa beh kā I ê peh-sìⁿ sin-oan; Ūi-tio̍h I chiah ê lô͘-po̍k hê-sim tńg-ì.

15

Gōa-pang ê ngó͘-siōng sī gûn--ê kim--ê, Sī lâng ê chhiú só͘ chō--ê.

16

In ū chhùi, iā bōe kóng-ōe; Ū ba̍k-chiu, iā bōe khòaⁿ;

17

In ū hī-khang, iā bōe thiaⁿ; Chhùi-lāi iā bô chhóan-khùi.

18

Chō-in--ê khò-in--ê, Lóng beh chhin-chhiūⁿ in.

19

Í-sek-lia̍t-ke ah, lín tio̍h o-ló Iâ-hô-hoa; A-lûn ê ke ah, lín tio̍h o-ló Iâ-hô-hoa;

20

Lī-bī ê ke ah, lín tio̍h o-ló Iâ-hô-hoa; Kèng-ùi Iâ-hô-hoa ê lâng ah, lín tio̍h o-ló Iâ-hô-hoa.

21

Iâ-hô-hoa khiā-khí tī Iâ-lō͘-sat-léng; Gōan I tùi Sek-an tit-tio̍h o-ló. Lín tio̍h o-ló Iâ-hô-hoa.