Si-phian 第 136 章 - 巴克禮全羅

1

Lín tio̍h kám-siā Iâ-hô-hoa, in-ūi I sī hó; In-ūi I ê chû-ài éng-óan tī-teh.

2

Lín tio̍h kám-siā chiah ê siōng-tè ê Siōng-tè; In-ūi I ê chû-ài éng-óan tī-teh.

3

Lín tio̍h kám-siā bān-chú ê Chú; In-ūi I ê chû-ài éng-óan tī-teh.

4

Kám-siā hit ê ka-kī kiâⁿ tōa kî-sū ê; In-ūi I ê chû-ài éng-óan tī-teh.

5

Kám-siā hit ê ēng tì-hūi chhòng-chō thiⁿ ê; In-ūi I ê chû-ài éng-óan tī-teh.

6

Kám-siā hit ê pho͘ tōe tī chúi ê téng-bīn ê; In-ūi I ê chû-ài éng-óan tī-teh.

7

Kám-siā hit ê chhòng-chō tōa ê kng-thé ê; In-ūi I ê chû-ài éng-óan tī-teh.

8

Chiū-sī jı̍t-thâu lâi kóan jı̍t--sî; In-ūi I ê chû-ài éng-óan tī-teh;

9

Ge̍h kap chhiⁿ kóan mî--sî; In-ūi I ê chû-ài éng-óan tī-teh.

10

Kám-siā hit ê phah-sí Ai-kı̍p lâng ê tōa-kiáⁿ ê; In-ūi I ê chû-ài éng-óan tī-teh.

11

Chhōa Í-sek-lia̍t lâng tùi in tiong-kan chhut-lâi ê; In-ūi I ê chû-ài éng-óan tī-teh.

12

Ēng tōa kôan-lêng ê chhiú kap chhun-chhut-lâi ê chhiú-kut; In-ūi I ê chû-ài éng-óan tī-teh.

13

Kám-siā hit ê pun-khui Âng-hái ê; In-ūi I ê chû-ài éng-óan tī-teh.

14

Iā chhōa Í-sek-lia̍t tùi hit ê tiong-kan keng-kè ê; In-ūi I ê chû-ài éng-óan tī-teh.

15

Chiong Hoat-ló kap i ê kun-peng hiat tī Âng-hái ê; In-ūi I ê chû-ài éng-óan tī-teh.

16

Kám-siā hit ê chhōa I ê peh-sìⁿ kiâⁿ tī khòng-iá ê; In-ūi I ê chû-ài éng-óan tī-teh.

17

Kám-siā hit ê phah-sí tōa kun-ông ê; In-ūi I ê chû-ài éng-óan tī-teh.

18

Thâi-sí ū miâ-siaⁿ ê ông ê; In-ūi I ê chû-ài éng-óan tī-teh.

19

Thâi-sí A-mô͘-lī ông Se-hông; In-ūi I ê chû-ài éng-óan tī-teh.

20

Koh thâi-sí Pa-san ông Go̍k; In-ūi I ê chû-ài éng-óan tī-teh.

21

Chiong in ê tōe siúⁿ-sù chòe gia̍p; In-ūi I ê chû-ài éng-óan tī-teh.

22

Chiū-sī siúⁿ-sù I ê lô͘-po̍k Í-sek-lia̍t chòe gia̍p; In-ūi I ê chû-ài éng-óan tī-teh.

23

I siàu-liām lán tī pi-bî ê ūi; In-ūi I ê chû-ài éng-óan tī-teh.

24

Chín-kiù lán thoat-lī lán ê tùi-te̍k; In-ūi I ê chû-ài éng-óan tī-teh.

25

I siúⁿ-sù bí-niû hō͘ kìⁿ ū hiat-khì ê; In-ūi I ê chû-ài éng-óan tī-teh.

26

Lín tio̍h kám-siā thiⁿ-téng ê Siōng-tè; In-ūi I ê chû-ài éng-óan tī-teh.