Si-phian 第 139 章 - 巴克禮全羅

1

Tāi-pı̍t ê si, kau hō͘ Ga̍k-koaⁿ.1) Iâ-hô-hoa ah, Lí í-keng kàm-chhat góa, bat góa.

2

Góa chē--lo̍h-khì, góa peh--khí-lâi, Lí lóng chai; Lí tùi hn̄g-hn̄g chai góa ê liām-thâu.

3

Góa kiâⁿ-lō͘, góa tó tī bîn-chhn̂g, Lí lóng siông-sè chai; Góa it-chhè só͘-kiâⁿ--ê, Lí iā chhim-chai.

4

Iâ-hô-hoa ah, góa ê chhùi só͘ kóng ê ōe, Lí bô chı̍t-kù m̄-chai.

5

Lí tī góa ê chêng-āu ûi góa, Hōaⁿ-chhiú tī góa ê téng-bīn.

6

Chit khóan ê chai-bat kî-biāu, góa bōe-ōe chhek-to̍k; Chin-kôaiⁿ, góa bōe-ōe kàu.

7

Góa beh khì toh-lo̍h, siám-pī Lí ê sîn? Góa beh cháu-khì toh-lo̍h, siám-pī Lí ê bīn?

8

Góa nā chiūⁿ thiⁿ, Lí tī-hia; Góa nā khùn tī im-kan, Lí ia̍h tī-hia.

9

Góa nā thí-khui chheng-chá ê sı̍t, Pe kàu hái ê ke̍k-thâu lâi khiā-khí;

10

Chiū nā tī-hia, Lí ê chhiú ia̍h beh ín-chhōa góa, Lí ê chiàⁿ-chhiú ia̍h beh khan góa.

11

Góa nā kóng, Ou-àm beh jia-khàm góa, Koh sì-ûi ê kng beh pìⁿ-chòe àm-mî;

12

Chiū o͘-àm ia̍h bōe-ōe jia-khàm góa, hō͘ Lí bô khòaⁿ-kìⁿ; Ou-àm mî chhin-chhiūⁿ jı̍t--sî hoat-kng. Ou-àm kap kng-bêng, chāi Lí khòaⁿ lóng sī chı̍t-iūⁿ.

13

In-ūi góa ê chōng-hú, sī Lí só͘ chhòng-chō--ê; Góa tī lāu-bú ê pak-tó͘-lāi, Lí ū pì-iū góa.

14

Góa beh kám-siā Lí, in-ūi góa siū-chō kî-biāu thang kiaⁿ; Lí ê só͘-chòe kî-biāu; Che sī góa ê sim chhim chai--ê.

15

Góa tī àm-tiong siū-chō, Tī tōe ê chin-tóe siū liân-lo̍k, Hit-sî góa ê hêng-thé bô ún-môa tī Lí.

16

Góa bē chiâⁿ-hêng ê thé-chit, Lí ê ba̍k-chiu í-keng khòaⁿ-kìⁿ, Só͘ tiāⁿ-tio̍h ê jı̍t, iáu-bē ū chı̍t-jı̍t, Lóng kì tī Lí ê chheh.

17

Siōng-tè ah, Lí ê ì-sù tùi tī góa, kàu chiah pó-pòe! Hit ê siàu-gia̍h, kàu chiah chōe!

18

Góa nā beh sǹg--i, pí hái-soa khah-chōe; Góa khùn cheng-sîn ê sî, iû-gôan kap Lí saⁿ-kap tī-teh.

19

Siōng-tè ah, Lí tek-khak beh châu-bia̍t pháiⁿ-lâng; Só͘-í lín chiah ê ài hō͘ lâng lâu-huih--ê, tio̍h lī-khui góa khì.

20

In-ūi in kóng pháiⁿ-ōe, tú-tak Lí; Lí ê tùi-te̍k ia̍h lām-sám chheng Lí ê miâ.

21

Iâ-hô-hoa ah, òan-hūn Lí--ê, góa kiám bô òan-hūn in mah? Khí-lâi kong-kek Lí--ê, góa kiám bô iàm-chiān in mah?

22

Góa chīn-chāi òan-hūn in, lia̍h in chòe góa ê tùi-te̍k.

23

Siōng-tè ah, kiû Lí kàm-chhat góa, chai góa ê sim-su; Chhì-giām góa, chai góa ê ì-sù.

24

Khòaⁿ góa ū sím-mı̍h pháiⁿ só͘-kiâⁿ bô, Chhōa góa kiâⁿ éng-o̍ah ê lō͘.