Si-phian 第 140 章 - 巴克禮全羅

1

Tāi-pı̍t ê si, kau hō͘ Ga̍k-koaⁿ.1) Iâ-hô-hoa ah, kiû Lí kiù góa thoat-lī pháiⁿ-lâng; Pó-hō͘ góa thoat-lī kiông-ok ê lâng.

2

In ê sim-lāi tô͘-bô͘ kan-ok, Siông-siông chū-chı̍p ài kau-chiàn.

3

In hō͘ in ê chı̍h lāi chhin-chhiūⁿ chôa; Chhùi-tûn-ē ū to̍k-chôa ê to̍k. [sè-la̍h

4

Iâ-hô-hoa ah, kiû Lí pó-siú góa thoat-lī pháiⁿ-lâng ê chhiú; Pó-hō͘ góa thoat-lī kiông-ok ê lâng; In siūⁿ beh chhia hō͘ góa po̍ah-tó.

5

Kiau-ngō͘ ê lâng ūi góa àm-chīⁿ tiuⁿ o̍ah-tauh kap soh; In tī lō͘-piⁿ an lô-bāng, Siat khôan-thò, beh hāi góa. [sè-la̍h

6

Góa bat tùi Iâ-hô-hoa kóng, Lí sī góa ê Siōng-tè; Iâ-hô-hoa ah, kiû Lí àⁿ hī-khang thiaⁿ góa khún-kiû ê siaⁿ.

7

Chú Iâ-hô-hoa, góa kiù-un ê la̍t ah, Tī kau-chiàn ê jı̍t, Lí jia-cha̍h góa ê thâu-khak.

8

Iâ-hô-hoa ah, kiû Lí m̄-thang chiàu pháiⁿ-lâng ê só͘ ài; M̄-thang chiâⁿ in ê kè-bô͘, kiaⁿ-liáu in chū-ko. [sè-la̍h

9

Lūn-kàu hiah-ê ûi-khùn góa ê lâng ê thâu, Gōan in chhùi-tûn ê kan-ok im-ba̍t in ka-kī;

10

Gōan jia̍t-jia̍t ê hé-thòaⁿ lo̍h tī in ê sin-chiūⁿ; Gōan in siū hiat tī hé--nih, Hiat tī chhim-khiⁿ-lāi, bōe koh khí-lâi.

11

Kóng pháiⁿ-ōe ê lâng tī tōe-chiūⁿ tek-khak khiā-bōe-tiâu; Chai-ē tek-khak tui-jip kiông-pō ê lâng, chiong in táⁿ-tó.

12

Góa chai Iâ-hô-hoa beh ūi khùn-khó͘ ê lâng sin-oan, Beh ūi sòng-hiong lâng piān-bêng un-khut.

13

Gī-lâng tek-khak beh kám-siā Lí ê miâ; Chèng-tı̍t lâng beh khiā-khí Lí ê bīn-chêng.