Si-phian 第 141 章 - 巴克禮全羅

1

Tāi-pı̍t ê si.1) Iâ-hô-hoa ah, góa bat kiû-kiò Lí; Kiû Lí kín-kín lîm-kàu góa; Góa kiû-kiò Lí ê sî, Gōan Lí àⁿ hī-khang thiaⁿ góa ê siaⁿ.

2

Gōan góa ê kî-tó, chhin-chhiūⁿ hiuⁿ, pâi tī Lí ê bīn-chêng; Gōan góa ê kia̍h-khí chhiú, chhin-chhiūⁿ ê-hng-sî ê chè-sū.

3

Iâ-hô-hoa ah, kiû Lí kò͘-siú góa ê chhùi; Pé-siú góa chhùi-tûn ê mn̂g.

4

Kiû Lí bô hō͘ góa ê sim phian-ǹg siâ-ok, Tì-kàu góa kap chok-gia̍t ê lâng tâng-kiâⁿ pháiⁿ-tāi; Ia̍h bô hō͘ góa chia̍h in ê hó-mı̍h.

5

Gī-lâng phah góa, góa sǹg-chòe jîn-chû; I chek-pī góa, góa sǹg-chòe thâu-khak-téng boah-iû; Góa ê thâu-khak bô beh o̍at-siám; Tng in kiâⁿ-pháiⁿ ê sî, góa iû-gôan beh kî-tó.

6

In ê sím-phòaⁿ-koaⁿ siū hiat-lo̍h soaⁿ-khàm; In beh thiaⁿ góa ê ōe, in-ūi che ōe sī tiⁿ.

7

Góan ê kut-thâu sì-sòaⁿ tī bōng-piⁿ; Chhin-chhiūⁿ lâng choh-chhân, lôe-khui hit ê thô͘.

8

Chú Iâ-hô-hoa ah, góa ê ba̍k-chiu ǹg Lí; Góa óa-khò Lí, kiû Lí m̄-thang pàng-sak góa ê sîn-hûn bô i-óa.

9

Kiû Lí pó-hō͘ góa thoat-lī in ūi-tio̍h góa tiuⁿ ê o̍ah-tauh, Kap kiâⁿ-pháiⁿ ê lâng ê khôan-thò.

10

Gōan pháiⁿ-lâng hām-lo̍h tī in ê lô-bāng; Chóng-sī góa tit-tio̍h thoat-lī.