Si-phian 第 14 章 - 巴克禮全羅

1

Tāi-pı̍t ê si, kau hō͘ Ga̍k-koaⁿ.1) Gōng-lâng sim-lāi kóng, Bô ū Siōng-tè. In thàn siâ-ok, kiâⁿ khó-ò͘ⁿ ê sū; Bô chı̍t-lâng kiâⁿ-hó.

2

Iâ-hô-hoa tùi thiⁿ àⁿ-lo̍h khòaⁿ sè-kan-lâng, Beh khòaⁿ ū bêng-lí--ê, Ū chhē-kiû Siōng-tè--ê á-bô.

3

In lóng oai-chho̍ah, it-khài piàn-chòe ù-òe; Bô lâng kiâⁿ-hó, liân chı̍t-ê ia̍h bô.

4

Chòe-pháiⁿ ê lâng kiám lóng bōe hiáu-tit mah? In thun-chia̍h Góa ê peh-sìⁿ chhin-chhiūⁿ chia̍h piáⁿ, Ia̍h bô kiû-kiò Iâ-hô-hoa.

5

In tī-hia tōa-tōa kiaⁿ-hiâⁿ; In-ūi Siōng-tè tī gī-lâng ê cho̍k-lūi-tiong.

6

Lín hō͘ sòng-hiong lâng ê kè-bô͘ pìⁿ-chòe kiàn-siàu, Chóng-sī Iâ-hô-hoa chòe i tô-siám ê só͘-chāi.

7

Gōan Í-sek-lia̍t ê chín-kiù tùi Sek-an chhut! Iâ-hô-hoa kiù I siū-lia̍h ê peh-sìⁿ tò-tńg-lâi, Hit-sî Ngá-kok beh khòai-lo̍k, Í-sek-lia̍t beh hoaⁿ-hí.