Si-phian 第 144 章 - 巴克禮全羅

1

Tāi-pı̍t ê si.1) Iâ-hô-hoa góa ê chio̍h-pôaⁿ, sī eng-kai o-ló--ê; I kà-sī góa ê chhiú ōe cheng-chiàn, Kà-sī góa ê chńg-thâu-á ōe saⁿ-thâi.

2

I sī góa ê chû-ài, góa ê soaⁿ-chē, Góa ê kôaiⁿ-tâi, góa ê kiù-chú; Góa ê tîn-pâi, sī góa só͘ óa-khò--ê; I hō͘ góa ê peh-sìⁿ hâng-ho̍k tī góa ê ē-bīn.

3

Iâ-hô-hoa ah, lâng sī sím-mı̍h, Lí kéng-jiân bat i? Lâng ê kiáⁿ sī sím-mı̍h, Lí kéng-jiân siàu-liām i?

4

Lâng chhin-chhiūⁿ pûn chı̍t ê khùi; I ê jı̍t-chí chhin-chhiūⁿ iáⁿ kè--khì.

5

Iâ-hô-hoa ah, kiû Lí hō͘ thiⁿ sûi-lo̍h, chhin-sin kàng-lîm; Bong soaⁿ, soaⁿ chiū chhut ian.

6

Kiû Lí hoat-chhut sih-nà, hō͘ in sì-sòaⁿ; Siā-chhut Lí ê chìⁿ, hō͘ in jiáu-lōan.

7

Lí tùi téng-bīn chhun-chhiú kiù góa; Kiù góa chhut tōa-chúi, Kiù góa thoat-lī gōa-pang lâng ê chhiú.

8

In ê chhùi kóng pe̍h-chha̍t, In ê chiàⁿ-chhiú sī kan-chà ê chiàⁿ-chhiú.

9

Siōng-tè ah, góa beh tùi Lí chhiùⁿ sin ê koa; Ēng cha̍p-tiâu-hiân ê sek, chhiùⁿ-koa o-ló Lí.

10

Lí sī hit ê chín-kiù lia̍t-ông--ê, Lí sī hit ê kiù lô͘-po̍k Tāi-pı̍t thoat-lī hāi-miā ê to--ê.

11

Kiû Lí chín-kiù góa, kiù góa thoat-lī gōa-pang lâng ê chhiú; In ê chhùi kóng pe̍h-chha̍t, In ê chiàⁿ-chhiú sī kan-chà ê chiàⁿ-chhiú.

12

Góan ê ta-po͘-kiáⁿ tng siàu-liân ê sî, chhin-chhiūⁿ chhiū-á tōa-châng; Góan ê cha-bó͘-kiáⁿ chhin-chhiūⁿ chhù-kak ê chio̍h, chiàu khí-keng ê khóan-sit tiau-tok--ê.

13

Góan ê chhek-chhng móa-móa, ōe chhut ta̍k-iūⁿ ê bí-niû; Góan ê iûⁿ tī soaⁿ-iá siⁿ-thòaⁿ, chiâⁿ-chheng chiâⁿ-bān.

14

Góan ê gû thoa-mı̍h móa-chāi; Bô ū lâng jı̍p-lâi chhim-chiàm, ia̍h bián chhut-khì cheng-chiàn; Góan ê koe-chhī, ia̍h bô ū thî-khàu ê siaⁿ.

15

Tú-tio̍h chit-hō kéng-hóng ê peh-sìⁿ, ū hok-khì; Ū Iâ-hô-hoa chòe in ê Siōng-tè, chit-hō ê peh-sìⁿ ū hok-khì.