Si-phian 第 145 章 - 巴克禮全羅

1

Tāi-pı̍t o-ló ê si.1) Góa ê Siōng-tè góa ê Ông ah, Góa beh chun Lí chòe kôaiⁿ, góa beh éng-óan o-ló Lí ê miâ.

2

Góa beh jı̍t-jı̍t chiok-siā Lí; Ia̍h beh éng-óan o-ló Lí ê miâ.

3

Iâ-hô-hoa chì-tōa, eng-kai siū tōa ê o-ló; I ê tōa kàu bōe chhek-to̍k--tit.

4

Chit-tāi beh tùi hit-tāi o-ló Lí ê só͘-chòe; Ia̍h beh pò-iông Lí tōa kôan-lêng ê sū.

5

Góa beh chēng-chēng siūⁿ Lí chun-kùi êng-kng ê ui-giâm, Kap Lí kî-biāu ê só͘-chòe.

6

Lâng-lâng beh kóng-khí Lí thang kiaⁿ ê sū ê tōa kôan-lêng; Góa ia̍h beh pò-iông Lí ê chì-tōa.

7

In beh pò-iông Lí tōa-un ê kì-liām, Ia̍h beh chhiùⁿ-koa o-ló Lí ê kong-gī.

8

Iâ-hô-hoa ū un-hūi, ū lîn-bín; Bô khòai-khòai siū-khì, tōa-tōa ū chû-ài.

9

Iâ-hô-hoa hó khóan-thāi bān-lūi; I ê lîn-bín tì-ìm I it-chhè só͘ chō--ê.

10

Iâ-hô-hoa ah, Lí it-chhè só͘ chō--ê beh kám-siā Lí; Lí sèng ê peh-sìⁿ ia̍h beh o-ló Lí.

11

In kóng-khí Lí ê kok ê êng-kng; Tâm-lūn Lí ê tōa kôan-lêng.

12

Thang hō͘ sè-kan-lâng chai Lí tōa kôan-lêng ê só͘-chòe, Kap Lí kok ui-giâm ê êng-kng.

13

Lí ê kok sī éng-óan ê kok; Lí chip-chiáng ê kôan-pèng kàu bān-tāi.

14

Hōan-nā po̍ah-tó--ê, Iâ-hô-hoa hû-chhî in; Hōan-nā siū ap-chè--ê, hû in khí--lâi.

15

Bān-hāng-ū lóng kia̍h-ba̍k ǹg Lí, Lí chiàu-sî hō͘ in chia̍h-mı̍h.

16

Lí khui Lí ê chhiú, Hō͘ ū o̍ah-khì--ê lóng chiàu só͘-ài pá-chiok.

17

Iâ-hô-hoa tī I it-chhè só͘ kiâⁿ--ê, bô m̄ kong-gī, Tī I it-chhè só͘ chòe--ê, lóng ū chû-ài.

18

Hōan-nā kiû-kiò Iâ-hô-hoa ê, Iâ-hô-hoa kap in chhin-kūn, Chiū-sī chhin-kūn hiah ê sêng-sı̍t kiû-kiò I ê.

19

Kèng-ùi I ê, I beh chiâⁿ in ê sim só͘ ài; Ia̍h beh thiaⁿ in ê kiû-kiò, lâi chín-kiù in.

20

Iâ-hô-hoa pó-hō͘ it-chhè thiàⁿ I ê lâng; Chóng-sī it-chhè chòe-pháiⁿ ê lâng, I beh bia̍t-bô in.

21

Góa ê chhùi beh kóng-chhut o-ló Iâ-hô-hoa ê ōe; Gōan kìⁿ ū hiat-khì--ê, lóng éng-óan o-ló I ê sèng-miâ.