Si-phian 第 146 章 - 巴克禮全羅

1

Lín tio̍h o-ló Iâ-hô-hoa. Góa ê sim ah, lí tio̍h o-ló Iâ-hô-hoa.

2

Góa it-seng beh o-ló Iâ-hô-hoa; Góa iáu-o̍ah ê sî, beh chhiùⁿ-koa o-ló góa ê Siōng-tè.

3

Lín bo̍h--tit óa-khò kun-ông, bo̍h--tit óa-khò sè-kan lâng; In chı̍t-tiám-á bōe-ōe pang-chān.

4

I chı̍t-ē tn̄g-khùi, chiū kui-thó͘; I só͘ kè-e̍k--ê, tī hit-jı̍t chiū siau-bia̍t.

5

Ū Ngá-kok ê Siōng-tè chòe i ê pang-chān, Ǹg-bāng i ê Siōng-tè Iâ-hô-hoa ê, chit-hō lâng ū hok-khì;

6

I sī chhòng-chō thiⁿ, tōe, hái, kap kî-tiong ê bān-mı̍h; I pó-siú sêng-sı̍t kàu tī éng-óan;

7

I ūi-tio̍h siū un-khut ê lâng sin-oan; Siúⁿ-sù chia̍h-mı̍h hō͘ iau-gō--ê. Iâ-hô-hoa tháu-pàng siū koaiⁿ-kaⁿ--ê;

8

Iâ-hô-hoa khui chhiⁿ-mî-lâng ê ba̍k-chiu; Iâ-hô-hoa hû-khí siū ap-chè ê lâng; Iâ-hô-hoa thiàⁿ-sioh gī-lâng;

9

Iâ-hô-hoa pó-hō͘ chhut-gōa lâng; Hû-chhî ko͘-jî kóaⁿ-hū; To̍k-to̍k pháiⁿ-lâng ê tō-lō͘, hō͘ i oan-khiau.

10

Iâ-hô-hoa beh chòe ông kàu éng-óan; Sek-an ah, lí ê Siōng-tè beh chòe ông kàu bān-tāi. Lín tio̍h o-ló Iâ-hô-hoa.